.jpg)
ម្ចាស់ហាងលក់សៀវភៅនៅប្រេស៊ីលវេចខ្ចប់ទំនិញសៀវភៅ។ AFP
ទីក្រុងម៉ិកស៊ីកូៈ ឧស្សាហកម្ម ពាណិជ្ជកម្មអេឡិចត្រូនិករបស់តំបន់អាមេរិកឡាទីន កំពុងកើនឡើងយ៉ាងខ្លាំង ពេលដែលហាងរាប់លានទូទាំងតំបន់នេះប្តូរធ្វើអាជីវកម្មតាមអនឡាញក្នុងពេលនៃការរីករាលដាលជំងឺ កូវីដជាការកើនឡើងដ៏ច្រើនលើកដំបូងដោយបង្ខំឱ្យអាជីវកម្មបែបប្រពៃណីសម្របខ្លួនដើម្បីរស់រាន។
វិស័យនេះជាផ្នែកមួយនៃជ័យជម្នះដ៏ធំបំផុតនៃការផ្ទុះឡើងវីរុសកូរ៉ូណាដោយក្តីព្រួយបារម្ភនៃការឆ្លង និងវិធានការបិទប្រទេសតម្រូវឱ្យប្រជាជនស្នាក់នៅផ្ទះ។
លោក Oscar Silva អ្នកជំនាញក្នុងយុទ្ធសាស្ត្រសកលជាមួយក្រុមហ៊ុនប្រឹក្សាយោបល់ KPMG ក្នុងប្រទេសម៉ិកស៊ិក បាននិយាយថា៖ «កូវីដ ១៩ ជាផ្នែកជំរុញនៃនិន្នាការហើយក្នុងពាណិជ្ជកម្មអេឡិចត្រូនិកវាមានអំណាចខ្លាំងណាស់»។
លោកនិយាយថា៖ «ប្រជាជនអាមេរិកឡាទីនជាង ១០ លាននាក់ ដែលមិនដែលទិញទំនិញតាមអនឡាញ ពេលនេះគេធ្វើជាប្រចាំ»។
ក្រុមហ៊ុនអនឡាញគ្របដណ្តប់នៅក្នុងតំបន់នោះ មិនមែន Amazon ឬក៏ eBay នោះទេ ប៉ុន្តែជា Mercado Libre ដែលមានគំរូអាជីវកម្មស្រដៀងគ្នា និងមានវត្តមានក្នុងប្រទេសចំនួន ១៨។
ទោះបីជាភាពវឹកវរផ្នែកសេដ្ឋកិច្ចបង្កដោយការរីករាលដាលកូវីដ-១៩ ក្រុមហ៊ុនរបស់អាហ្សង់ទីនបានបង្កើនការលក់រហូតទ្វេដងក្នុងត្រីមាសទី ២ នៃឆ្នាំនេះ ដោយការកើនឡើងអតិថិជនរហូតដល់ ៤៥ ភាគរយ ដល់ចំនួន ៥១,១ លាននាក់។
មូលធននីយកម្មទីផ្សាររបស់ខ្លួនបានកើនដល់ ៥៥ ពាន់លានដុល្លារ ប្រជែងជាមួយក្រុមហ៊ុនយក្សរបស់ប្រេស៊ីល Vale ដែលគេឱ្យតម្លៃបំផុតនៅតំបន់អាមេរិកឡាទីន។
លោក Silva បាននិយាយថា ទម្លាប់របស់អតិថិជនទំនងទទួលយកការផ្លាស់ប្តូរទៅរកអេឡិចត្រូនិក។
លោកនិយាយថា ប្រជាជនព្រួយបារម្ភពីការក្លែងបន្លំ ឬថាផលិតផលមិនដូចអ្វីដែលគេរំពឹងទុក។ វាពិតជាទំនងណាស់ ដែលថាភាគរយធំនៃអតិថិជនទាំងនេះនឹងបន្តទុកចិត្ត បន្ទាប់ពីដឹងថា ពាណិជ្ជកម្មអនឡាញ ងាយស្រួល និងប្រសិទ្ធភាព»។
លោក David Geisen ប្រធាននៃក្រុមហ៊ុនលក់អនឡាញបាននិយាយថា៖ «អ្នកប្រើប្រាស់ដ៏ស្មោះត្រង់នៅពេលនេះទិញបានតែរយៈពេល ១២ ថ្ងៃនូវអ្វីដែលគេនាំចូល ដោយពីមុនមានរយៈពេល ១៧ ថ្ងៃ។ អ្នកប្រើប្រាស់ញឹកញាប់ ទិញបានក្នុង ២៤ ថ្ងៃដោយពីមុនប្រើពេល ៧៩ ថ្ងៃ រីឯ អ្នកប្រើប្រាស់ម្តងម្កាលទិញបានក្នុងរយៈពេល ២៩ ថ្ងៃដែលពីមុនប្រើពេល ១ ឆ្នាំ»។
នៅពេលចាប់ផ្តើមរីករាលដាលអ្នកលក់ដាច់បំផុតរួមមាន ម៉ាស់ ជែលសម្លាប់បាក់តេរី ទែរម៉ូម៉ែត្រជាដើម ប៉ុន្តែតម្រូវការជាបន្តបន្ទាប់បានពង្រីកដល់ទំនិញ និងសេវាកម្មផ្សេងៗទៀត។
ការរីកដុះដាលនេះបានពង្រីកខ្លួនដល់សេដ្ឋកិច្ចដែលគ្រប់គ្រងដ៏តឹងរ៉ឹងរបស់ប្រទេស គុយបា ជាមួយការលក់កើនឡើងនៅលើផ្លាតហ្វម tuenvio.com របស់រដ្ឋាភិបាលដែលព្យាយាមបំពេញការចង់បានរបស់អតិថិជនខ្លះ។
លោក Jorge Noris អាយុ ៣៤ ឆ្នាំជាបុគ្គលិកផ្នែក IT បាន និយាយថា៖ «ខ្ញុំបានទិញប្រមាណ ៤០ ដង ហើយខ្ញុំមានបញ្ហាប្រហែល ៤០ ដងដូចគ្នា»។ ក៏មានបញ្ហារអាក់រអួលនៅម៉ិកស៊ិកដែរ។
រសម្នាក់ដែលសាកល្បងទិញទូរស័ព្ទ ១ គ្រឿងតាមអនឡាញបានត្អូញត្អែរថា គាត់បែរជាទទួលបានភេសជ្ជៈទៅវិញ ទោះបីជាហាងនោះជាផ្នែករបស់លោក Carlos Slim ជាសេដ្ឋីរបស់ម៉ិកស៊ិក ប៉ុន្តែក្រោយមកបានបញ្ជូនឱ្យគាត់តាមការបញ្ជាទិញត្រឹមត្រូវ៕ RR
