ភ្នំពេញៈ មន្ត្រីជាន់ខ្ពស់រដ្ឋាភិបាលកម្ពុជាបានអះអាងថា ក្រុមហ៊ុនអាកាសចរណ៍វៀតណាម Vietnam Airlines ដែលកាន់កាប់ភាគហ៊ុនចំនួន ៤៩ ភាគរយ នៃក្រុមហ៊ុនអាកាសចរណ៍ Cambodia Angkor Air ពិតជាបានលក់ភាគហ៊ុនរបស់ខ្លួនទៅឲ្យអ្នកវិនិយោគិនថ្មី។
ថ្លែងក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់រដ្ឋលេខាធិការដ្ឋានអាកាសចរស៊ីវិល» ដែលរៀបចំនៅទីស្តីការគណៈរដ្ឋមន្ត្រីកាលពីថ្ងៃព្រហស្បតិ៍ លោក ស៊ីន ចាន់សិរីវុត្ថា អ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិលបាននិយាយថា អាជ្ញាធរកម្ពុជាពិតបានទទួលព័ត៌មានថា ក្រុមហ៊ុនអាកាសចរណ៍វៀតណាម Vietnam Airlines បានលក់ភាគហ៊ុនខ្លួនក្នុងក្រុមហ៊ុនអាកាសចរណ៍ដែលចុះបញ្ជីនៅកម្ពុជា Cambodia Angkor Air ទៅឲ្យអ្នកវិនិយោគថ្មី។ លោកបន្តថា ទោះយ៉ាងណាលោកមិនទាន់មានព័ត៌មានលម្អិតពីកិច្ចសន្យាទិញលក់នេះទេ។
លោកថ្លែងថា៖ «យើងមិនមានព័ត៌មានលម្អិតទេ តែយើងដឹងថា ការលក់ភាគហ៊ុននេះពិតជាមានមែន»។
បើតាមលោក ចាន់សិរីវុត្ថា នៅក្នុងក្រុមហ៊ុន Cambodia Angkor Air មានភាគហ៊ុនចំនួន ៣ គឺចំណែករបស់រដ្ឋ (កម្ពុជា) ឯកជន និងក្រុមហ៊ុន Vietnam Airlines។ ការទិញលក់នៅពេលនេះគឺធ្វើឡើងចំពោះភាគហ៊ុន ឯកជន និងរបស់ក្រុមហ៊ុន Vietnam Airlines តែប៉ុណ្ណោះ។
ទោះជាយ៉ាងណាលោកប្រាប់ថា ប្រតិបត្តិការទិញលក់ភាគហ៊ុននៅក្នុងក្រុមហ៊ុន Cambodia Angkor Air នាពេលនេះនៅមិនទាន់មានការផ្លាស់ប្តូររចនាសម្ព័ន្ធគ្រប់គ្រងទេ។ លោកប្រាប់ថា៖ «រហូតមកដល់ពេលនេះគឺក្រុមហ៊ុននៅរក្សាធនធានមនុស្សនៅដដែលទាំងអស់ដោយផ្លាស់ប្តូរតែម្ចាស់ភាគហ៊ុនប៉ុណ្ណោះ»។
ទាក់ទងនឹងផែនការរបស់រដ្ឋាភិបាលកម្ពុជាក្នុងការគ្រប់គ្រងក្រុមហ៊ុនអាកាសចរណ៍នេះលោក សិរីវុត្ថា បានបញ្ជាក់ថា រដ្ឋគ្មានបំណងទាញយកក្រុមហ៊ុនមកគ្រប់គ្រងដោយផ្ទាល់ទេ ព្រោះវាជាក្រុមហ៊ុនរដ្ឋចម្រុះជាមួយឯកជន។ លោកបានថ្លែងថា៖ «ដូចយើងដឹងហើយថា ប្រទេសកម្ពុជាមានគោលនយោបាយមិនឲ្យមានសិទ្ធិផ្តាច់មុខ ដូច្នេះក្រុមហ៊ុននេះក៏ត្រូវប្រឈមមុខនឹងការប្រកួតប្រជែងជាមួយក្រុមហ៊ុនផ្សេងៗដែរ»។
ទោះយ៉ាងណាលោកបន្តថា រដ្ឋាភិបាលកម្ពុជាអាចមានវិធីសាស្ត្រផ្សេងៗទៀតក្នុងការជួយធ្វើឲ្យក្រុមហ៊ុននេះអាចបន្តនិរន្តរភាព តែក៏នឹងមិនធ្វើអ្វីខុសពីគោលការណ៍របស់អង្គការពាណិជ្ជកម្មពិភពលោក ចំពោះការធ្វើអន្តរាគមន៍ក្រុមហ៊ុនរបស់រដ្ឋដែរ។
យោងតាមសារព័ត៌មាន Vietnamtimes ដែលចេញផ្សាយក្នុងសប្តាហ៍នេះបានឲ្យដឹងថា ក្រុមហ៊ុនអាកាសចរណ៍ Vietnam Airlines បានចុះកិច្ចសន្យាលក់យន្តហោះ A321 ចំនួន ៥ គ្រឿងដែលមានទឹកប្រាក់សរុប $៣៧ លាន រួមជាមួយភាគហ៊ុនចំនួន ៤៩ ភាគរយក្នុងក្រុមហ៊ុនអាកាសចរណ៍ជាតិកម្ពុជា Cambodia Angkor Air ទៅឲ្យអ្នកវិនិយោគមួយដែលមិនត្រូវបានប្រាប់ឲ្យដឹងពីអត្តសញ្ញាណ។
Cambodia Angkor Air ត្រូវបានបង្កើតឡើងក្នុងឆ្នាំ ២០០៩ ជាក្រុមហ៊ុនអាកាសចរណ៍ជាតិកម្ពុជាបន្ទាប់ពីការដួលរលំនៃក្រុមហ៊ុនអាកាសចរណ៍ជាតិ Royal Air Cambodge បាន ៨ ឆ្នាំ។ ក្រុមហ៊ុននេះធ្វើប្រតិបត្តិការលើផ្លូវហោះហើរក្នុង និងក្រៅស្រុកជាង ១០ ជាមួយនឹងការរៀបចំរបស់ក្រុមហ៊ុនអាកាសចរណ៍ Vietnam Air។ បច្ចុប្បន្ន Cambodia Angkor Air មានយន្តហោះប្រភេទ A321 ចំនួន ៥ គ្រឿង។
នៅក្នុងរបាយការណ៍សវនកម្មរបស់ខ្លួនសម្រាប់ឆ្នាំ ២០១៩ ក្រុមហ៊ុន Vietnam Air បានឲ្យដឹងថា លក្ខខណ្ឌប្រតិបត្តិការមានការលំបាក។
លោក ចាន់សិរីវុត្ថា បានលើកឡើងទៀតថា តាមការសិក្សារបស់អង្គការអាកាសចរណ៍ស៊ីវិលអន្តរជាតិ ការផ្ទុះឡើងនៃជំងឺកូវីដ ១៩ បានធ្វើឲ្យមានផលប៉ះពាល់យ៉ាងខ្លាំងចំពោះវិស័យអាកាសចរណ៍ដោយមានសេណារីយោធំៗចំនួន ២ ត្រូវបានលើកឡើង គឺ V Shape អ្នកដំណើរមានការថយចុះ ៤៧ ភាគរយដែលស្មើនឹង ៥០៣ លាននាក់ និងបាត់បង់ចំណូលប្រមាណ ១១២ ពាន់លានដុល្លារ បើជំងឺនេះបន្តរីករាលដាលទៅដល់ខែមិថុនា និង U Shape នឹងមានការធ្លាក់ចុះ ៥៨ ភាគរយស្មើនឹង ៦០៧ លាននាក់ និងមានតម្លៃ ១៣៥ ពាន់លានដុល្លារ បើការរីករាលដាលនេះឈានដល់ខែកក្កដា ឬសីហា៕ LA