ភ្នំពេញៈ ចំនួននៃការរៀបចំឥណទានឡើងវិញនៅគ្រឹះស្ថានហិរញ្ញវត្ថុនៅកម្ពុជាមានចំនួន ២៨៩ ៤២២ នាក់ដែលស្មើនឹងតម្លៃ ១ ៣៩៧ លានដុល្លារ គិតត្រឹមខែកុម្ភៈ ខណៈអ្នកនៅក្នុងឧស្សាហកម្មនេះបានឱ្យដឹងថា ការស្នើសុំកំពុងធ្លាក់ចុះ។
ធនាគារជាតិនៃកម្ពុជា (NBC) កាលពីខែមីនា ឆ្នាំ ២០២០ បានចេញសារាចរណ៍មួយដល់គ្រឹះស្ថានហិរញ្ញវត្ថុទាំងអស់ឱ្យរៀបចំឥណទានឡើងវិញក្នុងវិស័យអាទិភាពចំនួន ៤ គឺទេសចរណ៍ កាត់ដេរ សំណង់ ការដឹកជញ្ជូន និងឡូជីស្ទិក ដែល NBC ចាត់ទុកថា ជាវិស័យទទួលរងផលប៉ះពាល់ខ្លាំងបំផុតពីការរីករាលដាលជំងឺកូវីដ ១៩។
សារាចរនេះមានបំណងរក្សាស្ថិរភាពហិរញ្ញវត្ថុ គាំទ្រសកម្មភាពសេដ្ឋកិច្ច និងបន្ធូរបន្ថយបន្ទុកអ្នកជាប់បំណុលដែលកំពុងប្រឈមការធ្លាក់ចុះចំណូលក្នុងអំឡុងពេលការរីករាលដាលកូវីដ ១៩។ សារាចរនេះនឹងត្រូវអនុវត្តរហូតដល់ពាក់កណ្ដាលឆ្នាំ ២០២១ នេះ។
តាមទិន្នន័យពីសមាគមមីក្រូហិរញ្ញវត្ថុកម្ពុជា (CMA) គិតចាប់តាំងពីបើកឱ្យមានការស្នើសុំរៀបឥណទានឡើងវិញកាលពីខែមីនាឆ្នាំមុនរហូតមកដល់ដំណាច់ខែកុម្ភៈ ឆ្នាំ ២០២១ មានអតិថិជន ៣០៧ ៨៧៥ នាក់ នៃសមាជិក CMA ដែលរួមមានធនាគារ ៤ ផងដែរនោះបានដាក់ពាក្យស្នើសុំការរៀបចំឥណទានឡើងវិញ។ ក្នុងនោះមានអតិថិជន ២៨៩ ៤២២ នាក់ ត្រូវបានអនុម័តជាមួយតម្លៃសរុប ១ ៣៩៧ លានដុល្លារ។
លោក កាំង តុងងី ប្រធាននាយកដ្ឋានទំនាក់ទំនង CMA បានប្រាប់ ភ្នំពេញ ប៉ុស្ដិ៍ កាលពីថ្ងៃទី ៣ ខែមីនាថា ទិន្នន័យបានបង្ហាញការធ្លាក់ចុះជាបន្តបន្ទាប់ក្នុងការស្នើសុំការរៀបចំឥណទានឡើងវិញ។ នេះជាសញ្ញាដ៏ល្អដែលថា ផលប៉ះពាល់ពីជំងឺកូវីដ ១៩ បានធ្លាក់ចុះ។
លោកថ្លែងថា៖ «ដោយមានការផ្ទុះឡើងក្នុងសហគមន៍នៅពេលថ្មីៗនេះ CMA រំពឹងថា នឹងមានការកើនឡើងការស្នើសុំការរៀបចំឥណទានឡើងវិញក្នុងរយៈពេលជាច្រើនខែខាងមុខនេះ ដោយសារតែអតិថិជនភាគច្រើនបង់ប្រាក់ប្រចាំខែ។ ខណៈនេះយើងកំពុងចាំមើលផលប៉ះពាល់ពិតប្រាកដ ប៉ុន្តែយើងមិនរំពឹងថានឹងមានផលប៉ះពាល់ធ្ងន់ធ្ងរណាដូចកាលពីពាក់កណ្ដាលឆ្នាំ ២០២០ ដោយសារតែសកម្មភាពពាណិជ្ជកម្ម ឬអាជីវកម្មជាច្រើននៅតែបន្តដំណើរការ ទោះបីមានល្បឿនយឺតក៏ដោយ។ ប្រជាជនហាក់មានបទពិសោធជាមួយនឹងការរីករាលដាលបែបនេះ ហើយកំពុងបន្តជីវិតប្រចាំថ្ងៃរបស់ពួកគេដោយប្រុងប្រយ័ត្ន»។
លោក សាយ សូនី អនុប្រធានជាន់ខ្ពស់នៃគ្រឹះស្ថានមីក្រូហិរញ្ញវត្ថុ ប្រាសាក់ បានអង្កេតឃើញនិន្នាការរៀបចំឥណទានឡើងវិញកំពុងធ្លាក់ចុះ ទោះបីមានព្រឹត្តិការណ៍សហគមន៍ ២០ កុម្ភៈក៏ដោយ។
យោងតាមលោក តុងងី ភាគច្រើននៃការរៀបចំឥណទានឡើងវិញគឺក្នុងវិស័យជំនួញ និងពាណិជ្ជកម្ម។ លោកបញ្ជាក់ថា៖ «អតិថិជនដែលរងផលប៉ះពាល់ពីកូវីដ ១៩ នៅតែអាចសុំរៀបចំឥណទានឡើងវិញរហូតដល់ខែមិថុនា ឆ្នាំ ២០២១។ ដោយសារមានការផ្ទុះឡើងក្នុងសហគមន៍ពេលថ្មីៗ យើងរំពឹងថា ចំនួននៃការស្នើសុំនឹងកើនឡើង ប៉ុន្តែមិនច្រើនដូចកាលពីដើមឆ្នាំ ២០២០ ទេ»៕ LA