.jpg)
កូវីដ១៩ បានធ្វើឱ្យប្រាក់ចំណូលអ្នកក្នុងវិស័យទេសចរណ៍រងប៉ះពាល់យ៉ាងខ្លាំង។ រ៉ាហ៊ីម
ភ្នំពេញៈ ចំនួននៃការរៀបចំឥណទានឡើងវិញនៅតាមគ្រឹះស្ថានធនាគារ និងមីក្រូហិរញ្ញវត្ថុនៅកម្ពុជាបានកើនដល់ ៤,២ ពាន់លានដុល្លារ គិតត្រឹមដំណាច់ឆ្នាំ ២០២០ ចាប់តាំងពីវិធានការនេះត្រូវបានប្រកាសកាលពីចុងខែមីនា ឆ្នាំ ២០២០ ដើម្បីបន្ធូរបន្ថយបន្ទុកអ្នកខ្ចីប្រាក់នៅក្នុងវិស័យសំខាន់ៗចំនួន ៤ ដែលទទួលរងផលប៉ះពាល់ធ្ងន់ធ្ងរពីការរីករាលដាលជំងឺកូវីដ ១៩។
យោងតាមរបាយការណ៍ប្រចាំឆ្នាំរបស់ធនាគារជាតិនៃកម្ពុជា (NBC) កាលពីឆ្នាំមុន មានការរៀបចំឥណទានឡើងវិញប្រហែល ៤,២ ពាន់លានដុល្លារ ឬ ២៨៥ ០៧៤ គណនី។
កាលពីចុងខែមីនា NBC បានចេញសារាចរណែនាំមួយដល់ធនាគារ និងគ្រឹះស្ថានហិរញ្ញវត្ថុទាំងអស់ត្រូវរៀបចំឥណទានឡើងវិញ សម្រាប់កម្ចីនៅក្នុងវិស័យអាទិភាព ៤ សំដៅរក្សាស្ថិរភាពហិរញ្ញវត្ថុ គាំទ្រសកម្មភាពសេដ្ឋកិច្ច និងបន្ធូរបន្ថយបន្ទុកអ្នកខ្ចីប្រាក់ដែលប្រឈមនឹងការធ្លាក់ចុះប្រាក់ចំណូលក្នុងអំឡុងពេលការរីករាលដាលជំងឺកូវីដ ១៩។ សារាចរនេះនឹងត្រូវអនុវត្តរហូតដល់ពាក់កណ្ដាលឆ្នាំ ២០២១។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដាកាលពីថ្ងៃពុធ បានស្នើឱ្យរដ្ឋាភិបាលត្រូវបន្តពេលវេលារៀបចំឥណទានឡើងវិញរយៈពេលវែងជាងនេះទៀត ដោយសារវាអាចជួយអតិថិជន ទោះបីជាមានវ៉ាក់សាំងជំងឺកូវីដ ១៩ ក៏ដោយ។
លោកថ្លែងថា៖ «តាងនាមឱ្យវិស័យហិរញ្ញវត្ថុ ខ្ញុំចង់ស្នើឱ្យរដ្ឋាភិបាលពិចារណាការបន្តពេលបន្ថែមទៀតសម្រាប់ការរៀបចំឥណទានឡើងវិញដល់អតិថិជន ខណៈក្រុមហ៊ុនជាច្រើនកំពុងតែជម្នះក្នុងការស្ទុះងើបឡើងវិញ»។
លោក កាំង តុងងី ប្រធាននាយកដ្ឋានទំនាក់ទំនងរបស់សមាគមមីក្រូហិរញ្ញវត្ថុកម្ពុជា (CMA) បានប្រាប់ ភ្នំពេញ ប៉ុស្ដិ៍ កាលពីឆ្នាំ ២០២០ ថា សមាជិករបស់ CMA ដែលរួមមានធនាគារ ៤ បានផ្ដល់ការរៀបចំឥណទានឡើងវិញសរុប ១,៣៨២ លានដុល្លារ ដល់ជាង ២៨៥ ០០០ អតិថិជន។
លោកលើកឡើងថា៖ «ជំងឺកូវីដ ១៩ បានប៉ះពាល់អវិជ្ជមានលើវិស័យមីក្រូហិរញ្ញវត្ថុនៅក្នុងកម្រិតដែលអាចគ្រប់គ្រងបាន។ គោលនយោបាយរៀបចំឥណទានឡើងវិញបានបន្ធូរបន្ថយបន្ទុក ដែលបានបណ្ដាលមកពីកូវីដ ១៩ លើអតិថិជនជាច្រើន ដូច្នេះពួកគេអាចបន្តជីវភាពរស់នៅបាន ហើយប្រវត្តិឥណទានរបស់ពួកគេនឹងមិនរងផលប៉ះពាល់ដោយសារតែការរៀបចំឥណទានឡើងវិញនោះទេ។ ការរៀបចំឥណទានឡើងវិញជាងពាក់កណ្ដាលត្រូវបានធ្វើឡើងសម្រាប់កម្ចីក្រុមហ៊ុនតូចៗ ដែលប្រាក់ចំណូលត្រូវរងផលប៉ះពាល់ដោយសារជំងឺកូវីដ ១៩»។
លោក សាយ សូនី អនុប្រធានប្រតិបត្តិប្រាសាក់បានប្រាប់ ភ្នំពេញ ប៉ុស្ដិ៍ កាលពីថ្ងៃពុធថា ការរៀបចំឥណទានឡើងវិញនៅគ្រឹះស្ថានកំពុងធ្លាក់ចុះ ដោយសារការធូរស្រាលស្ថានការណ៍ជំងឺកូវីដ ១៩ ជាពិសេសការរកបានវ៉ាក់សាំង។
លោកបញ្ជាក់ថា៖ «យើងនៅតែមើលឃើញនិន្នាការការធ្លាក់ចុះការរៀបចំឥណទានដែលបានស្នើសុំពីអតិថិជនរបស់យើង ដោយសារតែពួកគេអាចចាប់ផ្ដើមអាជីវកម្មរបស់ពួកគេជាថ្មី និងរកប្រាក់ចំណូលដើម្បីសងកម្ចីតាមពេលវេលាកំណត់ការសង»។ លោកបន្តថា៖ «យើងផ្ដល់ឱកាសដល់វិស័យមួយចំនួន ប៉ុន្តែយើងកត់សម្គាល់ថា អត្រាការរៀបចំឥណទានឡើងវិញខ្ពស់ដល់វិស័យដែលជាប់ទាក់ទងនឹងវិស័យទេសចរណ៍»៕LA
