.jpg)
គ្រឹះស្ថានមីក្រូហិរញ្ញវត្ថុនៅកម្ពុជាបានធ្វើការរៀបចំឥណទានឡើងវិញក្នុងទំហំឥណទាន ៤៨៨ លានដុល្លារ នៅក្នុងចំណោមអ្នកបានស្នើសុំរៀបចំឥណទានឡើងវិញជាង ១៣ ម៉ឺននាក់។ ហុង មិនា
ភ្នំពេញៈ គ្រឹះស្ថានមីក្រូហិរញ្ញវត្ថុនៅកម្ពុជាបានធ្វើការរៀបចំឥណទានឡើងវិញក្នុងទំហំឥណទានជិត ៥០០ លានដុល្លារ នៅក្នុងចំណោមអ្នកបានស្នើសុំរៀបចំឥណទានឡើងវិញជាង ១៣ ម៉ឺននាក់ ដែលនេះជាវិធានការមួយជួយសម្រាលបន្ទុកដល់អតិថិជនគ្រឹះស្ថានមីក្រូហិរញ្ញវត្ថុក្នុងអំឡុងនៃការរាតត្បាតជំងឺកូវីដ ១៩។
លោក កាំង តុងងី ប្រធាននាយកដ្ឋានទំនាក់ទំនងនៃសមាគមមីក្រូហិរញ្ញវត្ថុកម្ពុជា (CMA) បានប្រាប់ឲ្យដឹងថា គិតត្រឹមថ្ងៃទី ១០ ខែឧសភា មានអតិថិជន ១៣៧ ១៥៨ នាក់បានធ្វើការស្នើសុំរៀបចំឥណទានឡើងវិញ។ ក្នុងនោះអតិថិជន ១១៨ ១៨២ នាក់ ស្មើនឹង ៩០ ភាគរយ ត្រូវបានគ្រឹះស្ថានមីក្រូហិរញ្ញវត្ថុសម្រេចធ្វើការរៀបចំឥណទានឡើងវិញ ដែលមានទំហំឥណទានជាង ៤៨៨ លានដុល្លារ។
លោកបន្តថា ការប្រមូលទិន្នន័យនេះធ្វើឡើងក្នុងគោលបំណងតាមដានផលប៉ះពាល់ជាក់ស្តែងនៃជំងឺកូវីដ ១៩ ទៅលើអតិថិជនការគាំពារអតិថិជនរបស់គ្រឹះស្ថានជាសមាជិក និងការវិវត្តទូទៅនៃវិស័យមីក្រូហិរញ្ញវត្ថុទាំងមូល ដើម្បីធ្វើការវាយតម្លៃ និងផ្ញើរបាយការណ៍ជូនភាគីពាក់ព័ន្ធ។
លោកថ្លែងថា៖ «ក្នុងកាលៈទេសៈដ៏លំបាកដែលបណ្តាលមកពីជំងឺកូវីដ ១៩ សមាគមបាននិងកំពុងធ្វើការយ៉ាងសកម្មជាមួយសមាជិក និងដៃគូពាក់ព័ន្ធនានា ពិសេសធនាគារជាតិនៃកម្ពុជា ក្នុងការជួយដល់អតិថិជនដែលរងផលប៉ះពាល់នេះ»។
លោកបន្តថា៖ «សមាគមស្វាគមន៍នូវរាល់កិច្ចសហការនានាជាមួយភាគីទាំងឡាយណាដែលមានសុច្ឆន្ទៈពិតប្រាកដនៅក្នុងការចូលរួមជួយដោះស្រាយបញ្ហារបស់អតិថិជននៃគ្រឹះស្ថានមីក្រូហិរញ្ញវត្ថុ»។
លោក ប៊ុន មុនី នាយកគ្រឹះស្ថានមីក្រូហិរញ្ញវត្ថុ វិថី ភីអិលស៊ី បានប្រាប់ថា ការរាតត្បាតជំងឺកូវីដ ១៩ បានធ្វើឲ្យប៉ះពាល់យ៉ាងខ្លាំងដល់វិស័យមីក្រូហិរញ្ញវត្ថុ។ លោកបន្តថា ជាក់ស្តែងគ្រឹះស្ថានរបស់លោកមានកំណើនឥណទានខូចកើនដល់ ៣,៥ ភាគរយនាពេលបច្ចុប្បន្ន។
លោកថ្លែងថា៖ «តាមពិតជាការប៉ះពាល់ហើយ ខែមុនៗគ្រឹះស្ថានខ្ញុំចាប់ផ្តើមខាតមែនទែន ដោយសារគេអត់សងដូច្នេះវាប៉ះពាល់ធ្ងន់ធ្ងរ ប៉ុន្តែយើងទទួលយកទាំងអស់គ្នា ពីព្រោះយើងយល់ពីវិបត្តិនៃវីរុសកូរ៉ូណា។ ខ្ញុំសង្ឃឹមថា ចាប់ពីខែក្រោយទៅ ស្ថានភាពជំងឺនេះនឹងធូរស្រាលឡើងវិញ»។
គ្រឹះស្ថានមីក្រូហិរញ្ញវត្ថុអាចរៀបចំឥណទានឡើងវិញជូនអតិថិជនបានលុះត្រាតែមានការស្នើសុំពីអតិថិជន ដោយយោងតាមកិច្ចសន្យារវាងគ្រឹះស្ថាន និងអតិថិជន គោលការណ៍ការពារអតិថិជន ក៏ដូចជាលក្ខខណ្ឌផ្លូវច្បាប់មួយចំនួនទៀត។ នេះបើតាមសេចក្តីប្រកាសព័ត៌មានរបស់ CMA។
សេចក្តីប្រកាសព័ត៌មានបញ្ជាក់ថា បើគ្មានដំណោះស្រាយសមស្របតាមលក្ខខណ្ឌបច្ចេកទេសនោះទេ នឹងអាចបង្កឲ្យមានផលប៉ះពាល់ធ្ងន់ធ្ងរដល់សេដ្ឋកិច្ចទាំងមូល។
សេចក្តីប្រកាសព័ត៌មានបានបន្តថា៖ «សមាគមនៅតែបន្តលើកទឹកចិត្ត និងស្វាគមន៍ចំពោះអតិថិជនដែលរងផលប៉ះពាល់ពិតប្រាកដពីជំងឺកូវីដ ១៩ សូមមេត្តាទាក់ទងទៅគ្រឹះស្ថានដែលខ្លួនបានទទួលប្រាក់កម្ចី ឬតាមរយៈមន្រ្តីឥណទានផ្ទាល់ ដើម្បីទទួលបាននូវដំណោះស្រាយសមស្រប»។
គិតត្រឹមដំណាច់ត្រីមាសទី១ ឆ្នាំ ២០២០ គ្រឹះស្ថានមីក្រូហិរញ្ញវត្ថុមានទំហំឥណទានសរុប ៧,៤ ពាន់លានដុល្លារ នៃអតិថិជនជាង ២,២ លាននាក់ ខណៈប្រាក់បញ្ញើសរុបមានចំនួនជាង ៣,៦ ពាន់លានដុល្លារនៃអតិថិជនជាង ២,៨ លាននាក់។ នេះបើយោងតាម CMA៕ LA
