ភ្នំពេញៈ ខណៈវិស័យកសិកម្មរបស់កម្ពុជាកំពុងបង្ហាញពីកំណើនជាបណ្ដើរៗពីមួយឆ្នាំទៅមួយឆ្នាំ ជាមួយនឹងរោងចក្រកែច្នែជាច្រើនត្រូវបានបង្កើតឡើង បញ្ហាប្រឈមនៅតែមានសម្រាប់វិស័យនេះ ខណៈវិធានការការពាររបស់សហភាពអឺរ៉ុបស្តីពីការនាំចូលអង្ករពីកម្ពុជា អាចជាការបារម្ភដ៏ធំមួយដល់ឧស្សាហកម្មស្រូវអង្កររបស់ប្រទេសនេះក្នុងឆ្នាំ ២០១៩។
ជាមួយនឹងការកែលម្អជាច្រើន មន្ដ្រីមកពីក្រសួងកសិកម្ម បង្ហាញពីសុទិដ្ឋិនិយមថា ឆ្នាំ ២០១៩ នឹងជាឆ្នាំដំណើរការល្អមួយទៀតសម្រាប់វិស័យនេះ។
លោក ស្រី វុឌ្ឍី អ្នកនាំពាក្យក្រសួងកសិកម្ម បានឲ្យដឹងថា ប្រសិនបើសម្លឹងមើលទៅឧស្សាហកម្មនេះទាំងមូល វិស័យនេះមានរោងចក្រកែច្នៃផលិតផលកសិកម្មជាច្រើនត្រូវបានគេរំពឹងថា នឹងត្រូវដាក់ឲ្យដំណើរការនៅឆ្នាំនេះ ដែលវានឹងធានាតម្លៃសម្រាប់កសិករ។
លោកថ្លែងថា៖ «យើងមានរោងចក្រកែច្នៃផ្លែឈើថ្មីមួយ រោងចក្រកែច្នៃដំឡូងមី ឃ្លាំងស្ដុកស្រូវ និងឡសម្ងួត ជាច្រើនដែលត្រៀមរួចហើយសម្រាប់ប្រតិបត្តិការពេញលេញនៅឆ្នាំនេះ»។
លោកបន្តថា៖ «រោងចក្រទាំងអស់នេះនឹងធានាពីទីផ្សារ និងតម្លៃផលិតផលរបស់យើង»។
រោងចក្រកែច្នៃផ្លែឈើស្រស់របស់កូរ៉េខាងត្បូងមានតម្លៃ ១០ លានដុល្លារដំបូង នៅខេត្តកំពង់ស្ពឺ រំពឹងថា នឹងដំណើរការនៅឆ្នាំនេះ ដែលអាចស្រូបយកផ្លែឈើជាង ៥០,០០០ តោនក្នុងមួយឆ្នាំ សម្រាប់នាំចេញ ដែលរួមមានផ្លែដូង ផ្លែទុរេន ផ្លែមង្ឃុត និងផ្លែឈើស្រស់ផ្សេងទៀត។
ក្រុមហ៊ុន Green Leader Holdings Group Co Ltd មានមូលដ្ឋាននៅទីក្រុងហុងកុង ដែលកំពុងសាងសង់រោងចក្រកែច្នៃដំឡូងមីដំបូងរបស់ខ្លួននៅខេត្តក្រចេះ ខណៈក្រុមហ៊ុនគ្រោងវិនិយោគសរុប ១៥០ លានដុល្លារ នៅក្នុងឧស្សាហកម្មដំឡូងមីរបស់កម្ពុជា។ រោងចក្រនៅខេត្តក្រចេះរំពឹងថា នឹងប្រតិបត្តិការនៅខែកុម្ភៈ ឆ្នាំនេះ។
លោក ស្រី វុឌ្ឍី បានឲ្យដឹងថារោងចក្រទាំងនេះនឹងនាំយកផលិតផលកសិកម្មកម្ពុជាកាន់តែច្រើនទៅទីផ្សារអន្តរជាតិ។
លោកថ្លែងថា៖ «ហើយផ្លែចេករបស់យើងត្រៀមរួចហើយសម្រាប់ការនាំចេញនៅឆ្នាំនេះផងដែរ ហើយក្រសួងកសិកម្ម នឹងកៀរគរវិនិយោគិនកាន់តែច្រើនឲ្យសម្លឹងមើលការវិនិយោគដ៏មានសក្ដានុពល»។ លោកបន្តថា ក្រសួងជឿជាក់ថា ការនាំចេញអង្ករនឹងត្រូវកើនឡើងផងដែរនៅឆ្នាំនេះ។
លោកលើកឡើងថា៖ «យើងមានមោទនភាពលើឧស្សាហកម្មស្រូវអង្កររបស់យើង។ នៅពេលនេះយើងមានស្ដង់ដារ និងសមត្ថភាពខ្ពស់ក្នុងការស្ដុក និងសម្ងួតស្រូវ ហើយយើងនឹងបង្កើនការនាំចេញអង្ករទៅប្រទេស ចិន នៅឆ្នាំនេះ»។
វិស័យនេះបានដាក់ឲ្យដំណើរការឃ្លាំងស្ដុកស្រូវមួយចំនួនកាលពីឆ្នាំមុន នៅខេត្តកំពង់ធំ កំពង់ចាម ព្រៃវែង តាកែវ និងបាត់ដំបង។
ទោះបីយ៉ាងនេះក្តី លោក ស្រី វុឌ្ឍី បានបញ្ជាក់ថា វិស័យនេះនៅតែមើលឃើញពីបញ្ហាប្រឈមទាក់ទងនឹងឡូជីស្ទិក និងហេដ្ឋារចនាសម្ព័ន្ធ ដែលចាំបាច់ត្រូវការដោះស្រាយ។ លោកបន្ថែមថា៖ «យើងត្រូវការពេលវេលា ក្នុងការកែលម្អឡូជីស្ទិក និងហេដ្ឋារចនាសម្ព័ន្ធយើង ព្រមទាំងតម្លៃអគ្គិសនី ដើម្បីកាត់បន្ថយតម្លៃផលិត និងប្រកួតប្រជែងជាមួយទីផ្សារអន្តរជាតិ»។
លោក ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា (CRF) យល់ស្របនឹងការបារម្ភដែលបានបញ្ជាក់ខាងលើនេះ។ លោកថ្លែងថា៖ «បើធៀបនឹងប្រទេសជិតខាង តម្លៃផលិតរបស់យើងគឺនៅតែខ្ពស់ និងពិបាកក្នុងការជំរុញការនាំចេញអង្ករ ដែលយើងចាំបាច់ត្រូវចាត់វិធានការកាន់តែច្រើននៅឆ្នាំនេះ ដើម្បីបង្កើនការនាំចេញ»។
លោកបន្តថា ផលិតផលផ្លែឈើមានសក្ដានុពលខ្ពស់សម្រាប់ការនាំចេញ ប៉ុន្តែបញ្ហាប្រឈមនៅតែមានសម្រាប់ផលិតផលផ្សេងទៀត ដូចជា ដំឡូងមី ផ្លែស្វាយ ម្រេច ពោត ស្វាយចន្ទី ផ្លែមៀន និងផ្លែចេក។ លោក ហ៊ុន ឡាក់ បានឲ្យដឹងថា បញ្ហាស្ដង់ដារអនាម័យ គឺជាបញ្ហាមួយដ៏សំខាន់ ខណៈរដ្ឋាភិបាលចាំបាច់ត្រូវបង្កើតទំនាក់ទំនងទីផ្សារ និងកិច្ចព្រមព្រៀងពាណិជ្ជកម្មដ៏រឹងមាំមួយ។
លោកថ្លែងថា៖ «ប្រសិនបើយើងអាចដោះស្រាយបញ្ហានេះបាន ខ្ញុំជឿជាក់ថា ផ្លែឈើរបស់យើងនឹងអាចទៅដល់ទីផ្សារអន្តរជាតិក្នុងចំនួនច្រើន និងជួយជំរុញសេដ្ឋកិច្ចរបស់យើង»។
លោក សុង សារ៉ន អគ្គនាយកក្រុមហ៊ុន AMRU Rice Co.,Ltd បានឲ្យដឹងថា ការវិនិយោគកាន់តែច្រើនលើរោងចក្រកែច្នៃ គឺជាតម្រូវការដើម្បីរក្សាកំណើនវិស័យនេះ។
លោកបញ្ជាក់ថា៖ «នៅពេលយើងអាចកែច្នៃវត្ថុធាតុដើមរបស់យើងបាន បន្ទាប់មកយើងអាចបន្ថែមតម្លៃកាន់ច្រើនដល់ផលិតផលនេះ ដូច្នេះឆ្នាំ ២០១៩ ផលិតផលអង្ករ ដំឡូងមី និងស្វាយចន្ទី នឹងមានភាពល្អប្រសើរ»។
លោកបន្តថា៖ «វត្ថុធាតុដើមរបស់យើងមួយចំនួន មិនអាចកែច្នៃទៅជាផលិតផលសម្រេចបានទេ វាពិបាកក្នុងការប្រកួតប្រជែងជាមួយទីផ្សារខណៈយើងនៅតែពឹងផ្អែកលើការនាំចូលក្រៅផ្លូវការ បន្ទាប់មកវាផ្ដល់ហានិភ័យសម្រាប់វិស័យរបស់យើង»។
ទោះយ៉ាងនេះក្តីលោក សុង សារ៉ន លើកឡើងថា វិធានការពាររបស់សហភាពអឺរ៉ុប នឹងជាករណីរសើបសម្រាប់ឧស្សាហកម្មស្រូវអង្កររបស់ប្រទេស កម្ពុជា ក្នុងឆ្នាំ ២០១៩ នេះ។
លោកបញ្ជាក់ថា៖ «វិធានការពារគឺនៅតែមានការបារម្ភសម្រាប់ឧស្សាហកម្មស្រូវអង្ករ ប៉ុន្តែខ្ញុំនៅតែជឿជាក់ថា សហភាពអឺរ៉ុប នឹងសម្របសម្រួលលក្ខខណ្ឌមួយចំនួន ជាពិសេសអង្ករក្រអូបរបស់យើង»៕LA