ភ្នំពេញៈ ស្ថានភាពអាជីវកម្មលក់ទូរស័ព្ទ Huawei តាមហាងលក់រាយមួយចំនួននៅទីក្រុងភ្នំពេញ រយៈពេលជាង ១ សប្តាហ៍មកនេះ មិនបានបង្ហាញពីសញ្ញាវិជ្ជមាននោះទេ បន្ទាប់ពីក្រុមហ៊ុន Google បានកាត់ផ្តាច់ទំនាក់ទំនងអាជីវកម្មជាមួយក្រុមហ៊ុនបច្ចេកវិទ្យាដ៏ធំរបស់ចិនមួយនេះ។
កញ្ញា ណុប ម៉ាណែត អ្នកទទួលខុសត្រូវផ្នែកស្តុកនៃហាងលក់ទូរស័ព្ទ សៀវ លីន នៅទីក្រុងភ្នំពេញបានប្រាប់ថា ការលក់ទូរស័ព្ទស្មាតហ្វូន Huawei នៅហាងរបស់គាត់បានធ្លាក់ជាបន្តបន្ទាប់ ពិសេសស្មាតហ្វូនតម្លៃខ្ពស់របស់ Huawei។
កញ្ញានិយាយថា៖ «ការលក់ធ្លាក់ចុះនាពេលនេះអាចមកពីពួកគាត់ ព្រួយបារម្ភថាមិនអាច Update កម្មវិធីផ្សេងៗបាន»។ ជាមួយគ្នានេះដែរ ណុប ម៉ាណែត បានកត់សម្គាល់ថា អតិថិជនយកទូរស័ព្ទ Huawei មកលក់វិញក៏មានច្រើនផងដែរ។
លោកប្រធានាធិបតីអាមេរិក ដូណាល់ ត្រាំ កាលពីពេលថ្មីៗនេះបានហាមក្រុមហ៊ុនអាមេរិកមិនឲ្យធ្វើពាណិជ្ជកម្មបច្ចេកវិទ្យា សេវា និងគ្រឿងផ្គុំក្នុងវិស័យទូរគមនាគមន៍ជាមួយក្រុមហ៊ុន Huawei ដោយចោទក្រុមហ៊ុននេះថាកំពុងបង្កការគំរាមកំហែងដល់សន្ដិសុខជាតិអាមេរិក។
ម្ចាស់ហាងលក់ទូរស័ព្ទមួយកន្លែងស្ថិតនៅម្តុំផ្សារដេប៉ូ ដែលសុំមិនបញ្ចេញឈ្មោះ និយាយថា ការលក់ទូរស័ព្ទ Huawei មួយរយៈនេះមានភាពស្ងប់ស្ងាត់ខ្លាំង ហើយការផ្គត់ផ្គង់ពីក្រុមហ៊ុនចែកចាយក៏ធ្លាក់ចុះដែរ។ លោកបន្តថា៖ «ព័ត៌មានពីការបញ្ឈប់ទំនាក់ទំនងជាមួយក្រុមហ៊ុនអាមេរិក អាចជាហេតុផលធំជាងគេដែលធ្វើឲ្យអតិថិជនរបស់ Huawei ងាកទៅប្រើផលិតផលរបស់ក្រុមហ៊ុនផ្សេងៗជំនួស»។
ទោះបីក្រុមហ៊ុន Google បានប្រកាសហើយថា ទូរស័ព្ទស្មាតហ្វូនរបស់ Huawei ដែលមាននៅលើទីផ្សារហើយនឹងនៅតែអាចប្រើប្រាស់បានធម្មតា លើកលែងតែម៉ូដែលចុងក្រោយ ក៏ប៉ុន្តែអារម្មណ៍របស់អ្នកប្រើនៅតែមិនស្ងប់។
ម្ចាស់ហាងខាងលើថ្លែងថា៖ «អារម្មណ៍អ្នកប្រើប្រាស់ទូរស័ព្ទ Huawei ភាគច្រើននៅតែបារម្ភខ្លាចមិនអាចចូលកម្មវិធីផ្សេងៗបាន តែសម្រាប់ខ្ញុំគិតថា នឹងមិនមានបញ្ហាទេសម្រាប់ផលិតផលដែលបានចេញលក់រួចមកហើយ»។
ការហាមឃាត់នេះមានន័យថា ទូរស័ព្ទស៊េរីក្រោយរបស់ក្រុមហ៊ុន Huawei មិនអាចប្រើប្រាស់ប្រព័ន្ធប្រតិបត្តិការ Android តទៅទៀតទេ ហើយកម្មវិធីរបស់ Google ផ្សេងទៀតដូចជា Gmail និង Play Store ក៏មិនអាចប្រើបានដែរសម្រាប់ Huawei។
ម្ចាស់ហាងលក់ទូរស័ព្ទម្នាក់ផ្សេងទៀតនៅផ្សារឃ្លាំងរំសេវ លោក តារា (ឈ្មោះដាក់ឲ្យ) បាននិយាយថា ក្នុងសប្តាហ៍នេះមានអតិថិជនជាច្រើនបានយកទូរស័ព្ទ Huawei មកលក់។
លោកបន្តថា៖ «ដោយសារខ្ញុំនៅសល់ក្នុងស្តុកច្រើន ដូច្នេះនៅពេលនេះខ្ញុំក៏កាត់បន្ថយការទិញត្រឡប់មកវិញខ្លះដែរ»។ លោកថ្លែងថា៖ «ខ្ញុំនឹងប្រមូលទិញទូរស័ព្ទ Huawei ឡើងវិញ បើខ្ញុំលក់វាចេញអស់មួយចំនួនវិញ»។
ក្រៅពីក្រុមហ៊ុនអាមេរិក ក្រុមហ៊ុនជប៉ុនដូចជា ក្រុមហ៊ុន Panasonic ក្រុមហ៊ុន SoftBank និងក្រុមហ៊ុនរបស់ប្រទេសផ្សេងទៀតដែលជាសម្ព័ន្ធមិត្តរបស់អាមេរិក ក៏ប្រកាសលែងសហការជាមួយ Huawei ផងដែរនាពេលនេះ។
ទោះបីយ៉ាងណា អ្នកគ្រប់គ្រងនៅហាងលក់ទូរស័ព្ទ នីកា សាខាគិរីរម្យ បាននិយាយយ៉ាងខ្លីថា ការលក់ទូរស័ព្ទប្រភេទ Huawei គ្រប់ម៉ូដែលនៅហាងរបស់លោកមិនមានការប្រែប្រួលនោះទេ ចាប់តាំងពីអាមេរិកសម្រេចឈប់ផ្តល់បច្ចេកវិទ្យាដល់ក្រុមហ៊ុន Huawei មក។
លោកបានថ្លែងថា៖ «នៅសាខារបស់ខ្ញុំការលក់ទូរស័ព្ទ Huawei នៅតែមានដំណើរល្អជាធម្មតា» ៕