.jpg)
ផលិតផលម៉ាស់ ទឹកជែលលាងដៃ និងអាល់កុលដែលមានដាក់លក់នៅផ្ទះ ១ កន្លែងក្បែរផ្សារអូឡាំពិក។ រូបថត ហេង ជីវ័ន
ភ្នំពេញៈ អាជីវកម្មលក់ទំនិញតាមអនឡាញ និងតាមដងផ្លូវមួយចំនួនក្នុងរាជធានីភ្នំពេញបានអះអាងថា ការលក់ទឹកអាល់កុល ជែលលាងដៃ និងម៉ាស់បានធ្លាក់ចុះក្នុងរយៈពេល ២ សប្តាហ៍ចុងក្រោយនេះ ខណៈក្រសួងសុខាភិបាលកម្ពុជាបានប្រកាសថារហូតមកទល់ពេលនេះមិនទាន់មានករណីថ្មីឆ្លងវីរុសកូរ៉ូណាឡើយ។
ទោះបីជាយ៉ាងណា ក្រសួងសុខាភិបាលនៅតែអំពាវនាវឲ្យប្រជាជនរក្សាការធ្វើអនាម័យ និងរក្សាគម្លាតដើម្បីការពារកុំឲ្យមានការឆ្លងវីរុសនេះ។
ចាប់តាំងពីមានការរីករាលដាលជំងឺកូវីដ ១៩ ជាសកលកាលពីចុងឆ្នាំមុនមក វាបានផ្តល់ឱកាសឲ្យអ្នកលក់ផលិតផលការពារសុខភាពមួយចំនួនដូចជា អាល់កុល ទឹកជែលលាងដៃ និងម៉ាស់ក្នុងទីក្រុងភ្នំពេញទទួលបានភាពកាក់កបពីអាជីវកម្មនេះយ៉ាងខ្លាំង ប៉ុន្តែក្នុងរយៈពេលចុងក្រោយនេះសកម្មភាពលក់ដូរពួកគេហាក់មានការថយចុះជាបន្តបន្ទាប់។
អ្នកស្រី ស្រី លក្ខណ៍ ជាអាជីវករលក់ទំនិញតាមអនឡាញបានឲ្យដឹងថា អ្នកស្រីមាននៅសល់ទឹកជែលលាងដៃប្រមាណ ១ ០០០ ដបនៅក្នុងស្តុក ដោយសារលក់មិនចេញចាប់តាំងពីពាក់កណ្តាលខែមេសាមក។ អ្នកស្រីបន្តថាកាលពីខែមុន អ្នកស្រីលក់ទឹកជែលសម្លាប់មេរោគចំណុះ ២៥០ មិល្លីលីត្រ អស់ប្រហែល ២០០ ដប ក្នុង ១ សប្តាហ៍ ក្នុងតម្លៃ ៨ ដុល្លារក្នុង ១ ដប ប៉ុន្តែបច្ចុប្បន្នទឹកជែលលាងដៃចំណុះ ១០០ មិលី្លលីត្រ ក្នុង ១ ដបតម្លៃ ៣ ដុល្លារលក់មិនចេញទាល់តែសោះ។
អ្នកស្រីថ្លែងថា៖ «ខ្ញុំគិតថា ទឹកជែលលាងដៃខ្ញុំលក់មិនចេញនៅពេលនេះអាចមកពីអ្នកទិញមិនទាន់ប្រើអស់ ហើយក៏អាចដោយសារការឆ្លងកូវីដ ១៩ នៅស្រុកយើងធូរស្រាលដែរ»។
អ្នកលក់ទំនិញ ១ រូបទៀត សុំមិនបញ្ចេញឈ្មោះបានឲ្យដឹងថាកាលពីដើមខែមេសា ម៉ាស់ ២០០ ប្រអប់លក់អស់ក្នុងរយៈពេល ២ ថ្ងៃប៉ុណ្ណោះ ប៉ុន្តែនៅពេលនេះ ម៉ាស់ និងទឹកជែលលាងដៃលក់មិនចេញទេ
លោកថ្លែងថា៖ «ទឹកជែលជាង ២០០ ដបលក់អត់ចេញ ហើយសព្វថ្ងៃនេះខ្ញុំក៏ផ្អាកនាំចូលម៉ាស់មួយរយៈសិនដែរ ព្រោះលក់អត់ដាច់។ ខ្ញុំយល់ថា ប្រជាជនភាគច្រើននិយមលាងដៃជាមួយសាប៊ូ ជាជាងការចំណាយលុយទិញអាល់កុល និងជែលលាងដៃ ហើយម្យ៉ាងគាត់កាត់បន្ថយការដើរចេញក្រៅផ្ទះផងដែរ»។
ទន្ទឹមនឹងនេះបុគ្គលិកផ្នែកលក់នៅផ្សារទំនើប កែវនិមល សាខាក្បែរផ្សារកាប់គោក្នុងខណ្ឌចំការមន រាជធានីភ្នំពេញបានឲ្យដឹងថា មួយរយៈនេះទឹកជែលលាងដៃ និងទឹកអាល់កុលហាក់មិនសូវលក់ដាច់ទេ ដោយ ១ ថ្ងៃលក់មិនដល់ ៥០ ដបផង។ អ្នកស្រីថ្លែងថា៖ «ខ្ញុំសង្កេតឃើញថា ១ ខែចុងក្រោយនេះ លក់អត់សូវដាច់សោះ ប្រហែលជាដោយសារស្ថានភាពជំងឺកូវីដ ១៩ ធូរស្រាលក៏មិនដឹង»។
ក្រសួងសុខាភិបាលបានឲ្យដឹងថា គិតត្រឹមថ្ងៃទី ៣០ ខែមេសា ក្រសួងពុំបានរកឃើញមានករណីឆ្លងថ្មីនៃជំងឺកូវីដ១៩ ទេ ខណៈអ្នកជាសះស្បើយកើនដល់ ១១៩ នាក់ ក្នុងចំណោមអ្នកផ្ទុកជំងឺកូវីដ ១៩ សរុប ១២២ នាក់។
ទន្ទឹមនឹងនេះក្រសួងពាណិជ្ជកម្មក៏កំពុងធ្វើការបង្ក្រាបការចរាចរផលិតផលសម្លាប់មេរោគរួមមានអាល់កុល ទឹកជែលលាងដៃ និងម៉ាស់ក្លែងក្លាយដែលគ្មានលិខិតបញ្ជាក់គុណភាព និងលិខិតអនុញ្ញាតឲ្យនាំចូលពីក្រសួងសុខាភិបាលផងដែរ៕ LA
