.jpg)
ស្លាកដាក់លក់ចុះភាគរយនៅថ្ងៃលក់ទំនិញ Black Friday។ រូបថត AFP
ក្រុងញូវយ៉កៈ ការលក់រាយតាមអនឡាញនៅថ្ងៃលក់រាយដ៏ធំរបស់អាមេរិក គឺថ្ងៃ Black Friday បានកើនឡើងដល់ដល់កម្រិតខ្ពស់មិនធ្លាប់មាន ៧,៤ ពាន់លានដុល្លារនៅឆ្នាំនេះ ដោយប្រតិបត្តិការទិញលក់ដែលបញ្ជាចេញពីទូរស័ព្ទដៃទំនើបមានការកើនឡើង។ នេះបើយោងតាមទិន្នន័យដែលបានចេញផ្សាយកាលពីថ្ងៃសៅរ៍ដោយក្រុមហ៊ុន Adobe Analytics។
ក្រុមហ៊ុន Adobe Analytics បានឲ្យដឹងថា តួលេខនេះកើនឡើង ១៩,៦ ភាគរយ ធៀបនឹងការលក់នៅថ្ងៃ Black Friday កាលពីឆ្នាំមុន និងជាទឹកប្រាក់លក់ច្រើនបំផុតទី ២ នៃការលក់អនឡាញបន្ទាប់ពីចំណូលពីការលក់ចំនួន ៧,៩ ពាន់លានដុល្លារ ដែលបានពីការលក់អនឡាញនៅថ្ងៃ Cyber Monday កាលពីឆ្នាំមុន។ ថ្ងៃលក់ Cyber Monday ប្រព្រឹត្តទៅបន្ទាប់ពីថ្ងៃ Black Friday។
ក្រុមហ៊ុននេះវាស់វែងប្រតិបត្តិការរបស់ក្រុមហ៊ុនលក់រាយអនឡាញធំបំផុតរបស់អាមេរិកចំនួន ៨០ ក្រុមហ៊ុនក្នុងចំណោមក្រុមហ៊ុន ១០០។
នៅឆ្នាំ ២០១៩ នេះ ៣៩ ភាគរយ នៃការទិញអនឡាញគឺធ្វើឡើងចេញពីទូរស័ព្ទដៃទំនើបដែលកើនឡើង ២១ ភាគរយ ធៀបនឹងរយៈពេលដូចគ្នាកាលពីឆ្នាំមុន។
លោក Taylor Schreiner អ្នកវិភាគ និងជាប្រធានក្រុមហ៊ុន Adobe Digital Insights បានថ្លែងថា៖ «ដោយសារថ្ងៃបុណ្យណូអែលឥឡូវកាន់តែខិតជិតមកដល់នោះ អ្នកប្រើប្រាស់បានប្រើប្រាស់ទូរស័ព្ទដៃដើម្បីទិញជាជាងមកឈរតម្រង់ជួរ»។
របស់ក្មេងលេងដែលលក់ដាច់បំផុតរួមមានតុក្កតា L.O.L. Surprise និងទំនិញផ្សេងៗទៀតដែលជាតួអង្គក្នុងរឿង Frozen 2 របស់ក្រុមហ៊ុន Disney។ សម្រាប់ប្រភេទវីដេអូហ្គេមវិញ ហ្គេមដែលលក់ដាច់បំផុតគឺហ្គេមបាល់ទាត់ FIFA 20 ហ្គេម Madden 20 និងហ្គេម Nintendo Switch។
គ្រឿងអេឡិចត្រូនិកដែលមានប្រជាប្រិយបំផុតគឺកុំព្យូទ័រយួរដៃ Apple, AirPods និងទូរស័ព្ទ Samsung។
ក្រុមហ៊ុន Adobe Analytics ប៉ាន់ប្រមាណថា ការលក់អនឡាញនៅថ្ងៃ Cyber Monday នឹងមើលឃើញការលក់កើនឡើងដល់កម្រិតខ្ពស់បំផុត ៩,៤ ពាន់លានដុល្លារ ដែលកើនឡើងជិត ១៩ ភាគរយ ធៀបនឹងឆ្នាំមុន។
ក្រុមហ៊ុន Adobe Analytics បានឲ្យដឹងថា អ្នកដើរទិញទំនិញបានចំណាយទឹកប្រាក់ចំនួន ៤,២ ពាន់លានដុល្លារ ក្នុងអំឡុងថ្ងៃបុណ្យ Thanksgiving កាលពីថ្ងៃព្រហស្បតិ៍សប្តាហ៍មុន។
ប្រទេស ចិន ក៏មានព្រឹត្តិការណ៍លក់អនឡាញដ៏ធំមួយដែរគឺនៅថ្ងៃទី ១១ ខែវិច្ឆិកា ដែលគេហៅថា Single''s Day។ នៅឆ្នាំនេះការលក់នៅថ្ងៃ Single''s Day កើន ២៦ ភាគរយ ដល់ ៣៨,៤ ពាន់លានដុល្លារ ធៀបនឹងឆ្នាំមុន ដែលមានការលក់ទំនិញចំនួន ២ សែនម៉ាកយីហោ និងអ្នកទិញមកពី ៧៨ ប្រទេស៕ KC
