.jpg)
លោក លឹម ហេង អនុប្រធានសភាពាណិជ្ជកម្មកម្ពុជា នាពេលកន្លងមក។ ហ្វេសប៊ុក
ភ្នំពេញៈ ចំនួនទឹកប្រាក់ដែលកម្ពុជាបាននាំយកទៅវិនិយោគផ្ទាល់នៅបរទេសក្នុងរយៈពេល ៩ ខែឆ្នាំ ២០១៩ បានធ្លាក់ចុះជាង ១៣ ភាគរយបើធៀបទៅនឹងរយៈពេលដូចគ្នាកាលពីឆ្នាំ ២០១៨ ។ នេះបើតាមធនាគារជាតិនៃកម្ពុជា (NBC)។
របាយការណ៍ព្រឹត្តិបត្រស្ថិតិ ជញ្ជីងទូទាត់របស់ធនាគារជាតិនៃកម្ពុជាដែលចុះហត្ថលេខាដោយលោក ជា ចាន់តូ ទេសាភិបាល NBC កាលពីថ្ងៃ ៦ ខែមករាបានឲ្យដឹងថា ការវិនិយោគផ្ទាល់របស់កម្ពុជានៅក្រៅប្រទេសក្នុងរយៈពេល ៩ ខែឆ្នាំ ២០១៩ មានតម្លៃសរុបជាង ៨១,៣៨ លានដុល្លារធ្លាក់ចុះ ១៣,៤៥ ភាគរយពី ៩៤,០៣ លានដុល្លារ បើធៀបនឹងរយៈពេលដូចគ្នាកាលពីឆ្នាំ ២០១៨។
របាយការណ៍បានបង្ហាញទៀតថា ការវិនិយោគផ្ទាល់របស់កម្ពុជានៅក្រៅប្រទេសក្នុងត្រីមាសទី ៣ បានកើនឡើងប្រមាណជិត ១២ ភាគរយមានតម្លៃជាង ២៩,៨៩ លានដុល្លារធៀបនឹងត្រីមាសទី ៣ ឆ្នាំ ២០១៨ ដែលមានជាង ២៦,៦៩ លានដុល្លារកាលពីត្រីមាសទី ៣ ឆ្នាំ ២០១៨។
ទោះយ៉ាងណារបាយការណ៍នេះមិនបានបង្ហាញពីប្រទេសដែលវិនិយោគិនកម្ពុជាចេញទៅបណ្តាក់ទុននោះទេ។
ទិន្នន័យឲ្យដឹងទៀតថាកាលពីឆ្នាំ ២០១៨ ការវិនិយោគផ្ទាល់របស់កម្ពុជានៅក្រៅប្រទេសមានតម្លៃសរុបជាង ១២២,៩ លានដុល្លារដោយមានកំណើន ៧,៧៣ ភាគរយពីចំនួន ១១៤,០៨ លានដុល្លារកាលពីឆ្នាំ ២០១៧។
អនុប្រធានសភាពាណិជ្ជកម្មកម្ពុជាលោក លឹម ហេង កាលពីម្សិលមិញបាននិយាយថា ទន្ទឹមនឹងកំណើនការវិនិយោគិនផ្ទាល់បរទេសចូលមកវិនិយោគនៅកម្ពុជាចំនួននៃការចេញទៅវិនិយោគផ្ទាល់របស់វិនិយោគិនកម្ពុជានៅក្រៅប្រទេសក៏បានកើនឡើងផងដែរ គ្រាន់តែការចេញទៅវិនិយោគផ្ទាល់នៅក្រៅប្រទេសរបស់កម្ពុជាមិនមានទ្រង់ទ្រាយធំតែប៉ុណ្ណោះ។
លោកបានបន្តថា ការវិនិយោគផ្ទាល់របស់កម្ពុជានៅក្រៅប្រទេសមានដូចជា វិស័យហិរញ្ញវត្ថុ អចលនទ្រព្យ និងសំណង់ និងការនាំចេញ នាំចូលទំនិញជាដើម។
លោកថ្លែងថា៖ «តាមខ្ញុំដឹង ក្រៅពីវិស័យហិរញ្ញវត្ថុដែលកម្ពុជាកំពុងបណ្តាក់ទុននៅក្នុងប្រទេសឡាវ និងមីយ៉ាន់ម៉ា ថ្មីៗនេះក៏មានវិនិយោគិនកម្ពុជាគ្រោងទៅបណ្តាក់ទុនលើវិស័យសំណង់នៅប្រទេសចិនផងដែរ»។
ខណៈកម្ពុជាជាប្រទេសដែលមានសេដ្ឋកិច្ចបើកចំហ និងមានកំណើនជាបន្តបន្ទាប់នោះលោក លឹម ហេង បានអះអាងថាការចេញទៅបណ្តាក់ទុនពីសំណាក់វិនិយោគិនកម្ពុជានៅបរទេសនឹងមានកំណើនបន្ថែមទៀតនៅពេលខាងមុខ ជាពិសេសនៅតាមប្រទេសដែលទើបមានសេដ្ឋកិច្ចរីកចម្រើន។ លោកបន្តថា៖ «កម្ពុជាក៏បានជំរុញឲ្យវិនិយោគិនរបស់ខ្លួនចេញទៅបណ្តាក់ទុននៅបរទេសផងដែរ»។
លោកប្រាប់ទៀតថា ក្រៅពីប្រទេសក្នុងតំបន់បច្ចុប្បន្នកម្ពុជាក៏កំពុងសម្លឹងឃើញពីឱកាសវិនិយោគនៅប្រទេសមួយចំនួន ដូចជា នេប៉ាល់ និងបង់ក្លាដែសជាដើម។
បើតាមលោក លឹម ហេង ប្រទេសដែលវិនិយោគិនកម្ពុជាកំពុងទៅបណ្តាក់ទុន មានដូចជា វៀតណាម ឡាវ ថៃ មីយ៉ាន់ម៉ា និងចិន។
កាលពីពេលថ្មីៗនេះរបាយការណ៍វឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ ២០១៩ និងទស្សនវិស័យឆ្នាំ ២០២០ របស់ធនាគារជាតិនៃកម្ពុជាបានឲ្យដឹងថា ក្នុងឆ្នាំ ២០១៩ ទាំងមូលលំហូរទុនវិនិយោគផ្ទាល់ពីបរទេសមកកម្ពុជា មានតម្លៃសរុប ៣ ៥៨៨ លានដុល្លារ ក្នុងនោះវិស័យហិរញ្ញវត្ថុមានតម្លៃ ២ ៣៨៥ លានដុល្លារ និងវិស័យមិនមែនហិរញ្ញវត្ថុមាន ១ ២០៣ លានដុល្លារ។ តម្លៃ ៣ ៥៨៨ លានដុល្លារនេះ គឺកើនឡើង ១១,៧ ភាគរយ ពីចំនួន ៣ ២១២ លានដុល្លារ កាលពីឆ្នាំ ២០១៨។
ទិន្នន័យបានឲ្យដឹងទៀតថា ក្នុងចំនួនទាំងអស់នោះគឺមានមកពីប្រទេសចិន ៤៣ ភាគរយ កូរ៉េខាងត្បូងមាន ១១ ភាគរយ វៀតណាម ៧ ភាគរយ សិង្ហបុរី ៦ ភាគរយ ជប៉ុន ៦ ភាគរយ និងប្រទេសផ្សេងៗទៀតចំនួន ២៧ ភាគរយ៕ LA
