.jpg)
ផ្លូវរថភ្លើងដែលកំពុងសាងសង់ដោយក្រុមហ៊ុនចិន China Railway Construction Corporation (CRCC) នៅប្រទេសនីហ្សារីយ៉ា។ រូបថត AFP
ក្រុងណៃរ៉ូប៊ីៈ មន្ត្រីសាជីវកម្មហិរញ្ញវត្ថុអន្តរជាតិ (IFC) ដែលជាផ្នែកមួយរបស់ធនាគារពិភពលោក (WB) បានឲ្យដឹងកាលពីថ្ងៃអង្គារថា ការវិនិយោគរបស់ប្រទេសចិនកំពុងបង្កើនឱកាសការងារក្នុងទ្វីបអាហ្វ្រិក។
លោក Manuel Moses ប្រធានប្រចាំប្រទេសកេនយ៉ារបស់សាជីវកម្ម IFC ដែលជាស្ថាប័នផ្តោតលើវិស័យឯកជនរបស់ធនគារពិភពលោកក្នុងប្រទេសកំពុងអភិវឌ្ឍន៍ បានប្រាប់ទីភ្នាក់ងារព័ត៌មាន Xinhua ក្នុងទីក្រុងណៃរ៉ូប៊ីថា វិនិយោគិនចិនកំពុងដើរតួនាទីប្រកបដោយវិជ្ជមានក្នុងវិស័យផលិតកម្ម សំណង់ និងថាមពល។
លោក Moses បានថ្លែងអំឡុងពេលបើកដំណើរការវេទិកាអគ្គនាយកនៅទ្វីបអាហ្វ្រិក (Africa CEO Forum) លើកទី ៧ ថា៖ «វិស័យឯកជនចិន មានកម្លាំងថាមពលដ៏ខ្លាំង ពីព្រោះពួកគេមិនមើលឃើញហានិភ័យដែលមនុស្សផ្សេងទៀតមើលឃើញកើតមានក្នុងទ្វីបអាហ្វ្រិកនោះទេ ដោយសារពួកគេមើលឃើញទ្វីបអាហ្វ្រិកបានវែងឆ្ងាយ»។
ព្រឹត្តិការណ៍នេះត្រូវបានរៀបចំរួមគ្នាដោយសម្ព័ន្ធវិស័យឯកជនរបស់ប្រទេស កេយ៉ាន សាជីវកម្ម FIC និងក្រុមប្រឹក្សាអភិវឌ្ឍន៍ប្រទេសរវ៉ាន់ដា។
លោក Moses បានថ្លែងថា IFC ក៏មានចំណាប់អារម្មណ៍ជួយសម្របសម្រួលដល់ក្រុមវិនិយោគិនបរទេសណាមួយដែលមើលឃើញឱកាសនៅទ្វីបអាហ្វ្រិកផងដែរ៕ People’s Daily/KC
