The Phnom Penh Post Search

Search form




Logo of Phnom Penh Post newspaper Phnom Penh Post - ការវិនិយោគ​លើ​ថាមពល​ស្អាត​ ត្រូវបាន​ជំរុញ​ឲ្យ​បង្កើន​ទ្វេដង

ការវិនិយោគ​លើ​ថាមពល​ស្អាត​ ត្រូវបាន​ជំរុញ​ឲ្យ​បង្កើន​ទ្វេដង

Content image - Phnom Penh Post
កង្ហារ​បង្កើត​ថាមពល​ពី​ខ្យល់​នៅ​ទីក្រុង Sievern ភាគ​ខាងជើង​ប្រទេស​អាល្លឺម៉ង់​។ រូបថត AFP

ការវិនិយោគ​លើ​ថាមពល​ស្អាត​ ត្រូវបាន​ជំរុញ​ឲ្យ​បង្កើន​ទ្វេដង

ក្រុងអាប៊ូដាប៊ីៈ ទីភ្នាក់ងារ​លើកកម្ពស់​ថាមពល​ស្អាត​អន្តរជាតិ​មួយ​បាន​អំពាវនាវ​ឲ្យ​បង្កើន​ការវិនិយោគ​ទ្វេដង​ក្នុង​គម្រោង​ថាមពល​កកើត​ឡើងវិញ ដោយ​បង្វែរ​មូលនិធិ​ពី​ឥន្ធនៈផូស៊ីល​មក​ថាមពល​កកើត​ឡើងវិញ​។

ទីភ្នាក់ងារ​ថាមពល​កកើត​ឡើងវិញ​អន្តរជាតិ (IRENA) ដែល​មាន​មូលដ្ឋាន​នៅ​ទីក្រុង​អាប៊ូដាប៊ី​ក៏​បាន​ឲ្យ​ដឹងផង​ដែរ​ថា ទិន្នផល​អគ្គិសនី​ដែល​ទទួលបាន​ពី​ថាមពល​ស្អាត​នឹង​កើនឡើង​ទ្វេដង​នៅ​ ១ ​ទសវត្សរ៍​ក្រោយ​។

ទីភ្នាក់ងារ​នេះ​បាន​ឲ្យ​ដឹង​ក្នុង​របាយការណ៍​មួយ​ថា​៖ «​ការវិនិយោគ​លើ​ថាមពល​កកើត​ឡើងវិញ​ប្រចាំឆ្នាំ​ចាំបាច់​ត្រូវ​បង្កើន​ទ្វេដង​ពី​ប្រហែល ៣៣០ ​ពាន់​លាន​ដុល្លារ​នៅថ្ងៃនេះ​ដល់​ជិត ៧៥០ ​ពាន់​លាន​ដុល្លារ ដើម្បី​ដាក់ពង្រាយ​ថាមពល​កកើត​ឡើងវិញ​ក្នុង​ល្បឿន​ដែល​តម្រូវ​ឲ្យ​មាន​»​។

ទីភ្នាក់ងារ IRENA បន្តថា​៖ «​ភាគច្រើន​នៃ​ការវិនិយោគ​ដែល​ត្រូវការ អាចឆ្លើយតប​បាន​តាមរយៈ​ការ​បង្វែរ​ការវិនិយោគ​លើ​ឥន្ធនៈផូស៊ីល​ដែល​គ្រោងទុក [​ឆ្ពោះ​មក​ថាមពល​កកើតឡើង​វិញ​]»​។

ទីភ្នាក់ងារ​នេះ​បាន​ប៉ាន់ប្រមាណ​ថា ទឹកប្រាក់​វិនិយោគ​រហូតដល់ ១០ ពាន់​ពាន់​លាន​ដុល្លារ​គ្រោង​នឹង​ចំណាយ​សម្រាប់​គម្រោង​ថាមពល​ដែល​មិន​ពាក់ព័ន្ធ​នឹង​ថាមពល​កកើត​ឡើងវិញ​នៅត្រឹម​ឆ្នាំ​ ២០៣០ ដែល​បង្កើត​ឲ្យ​មាន​ហានិភ័យ​ដល់​ការបរាជ័យ​ក្នុង​ការឆ្លើយតប​ទៅនឹង​គោលដៅ​ប្រយុទ្ធ​ប្រឆាំងនឹង​ការឡើង​កម្តៅ​ពិភពលោក​។

ទឹកប្រាក់​ប្រហែល ២,៦ ​ពាន់​ពាន់​លាន​ដុល្លារ​ ​ត្រូវបាន​វិនិយោគ​លើ​គម្រោង​ថាមពល​កកើតឡើង​វិញ​នៅត្រឹម​ដំណាច់​ឆ្នាំ​ ២០១៩​។ នេះ​បើ​យោងតាម​កម្មវិធី​បរិស្ថាន​អង្គការសហប្រជាជាតិ​។

លោក Francesco La Camera អគ្គនាយក​ទីភ្នាក់ងារ IRENA បាន​ប្រាប់​ក្រុម​អ្នកយកព័ត៌មាន​នៅក្រៅ​ជំនួប​នៃ​សន្និបាត​ប្រចាំឆ្នាំ​ក្នុង​ទីក្រុង​អាប៊ូដាប៊ី ប្រទេស​អេមីរ៉េតអារ៉ាប់រួម​ថា កម្មវិធី​ថាមពល​កកើត​ឡើងវិញ ត្រូវ​តែ​ពន្លឿន​។

លោក​ថ្លែងថា​៖ «​ប្រសិនបើ​យើង​ចង់​ដោះស្រាយ​បញ្ហាលំបាក​នៃ​ការប្រែប្រួល​អាកាសធាតុ យើង​ត្រូវតែ​ពន្លឿន​ផ្លូវ​របស់​យើង​។ វា​មានន័យថា យើង​ត្រូវតែទៅ​ហើយ​បង្កើន​ទ្វេដង​នូវ​ការវិនិយោគ​លើ​ថាមពល​កកើត​ឡើងវិញ​»៕ KC

អត្ថបទគួរចាប់អារម្មណ៍