ភ្នំពេញ: ការវិនិយោគលើវិស័យអគ្គិសនីនៅកម្ពុជាក្នុងរយៈពេល ១៣ ឆ្នាំចុងក្រោយនេះមានតម្លៃសរុប ៦,១ ពាន់លានដុល្លារ។ នេះបើតាមរដ្ឋលេខាធិការក្រសួងរ៉ែ និងថាមពល។
របាយការណ៍បង្ហាញថាចាប់ពីឆ្នាំ ២០០៦ ដល់ដំណាច់ឆ្នាំ ២០១៩ ការវិនិយោគនេះមានតម្លៃសរុប ៦,១ ពាន់លានដុល្លារដែលឆ្លុះបញ្ចាំងអំពីភាពរីកចម្រើននៃវិស័យថាមពលរបស់កម្ពុជាក្នុងរយៈពេលប៉ុន្មានឆ្នាំកន្លងមកនេះដើម្បីឆ្លើយតបទៅនឹងតម្រូវការបច្ចុប្បន្ន និងអនាគត។
របាយការណ៍នេះត្រូវបានលើកឡើងក្នុងកិច្ចប្រជុំបូកសរុបលទ្ធផលការអនុវត្តកម្មវិធីការងារ ២០១៩ និងតម្រង់ទិសដៅកម្មវិធីការងារ ២០២០ និង ២០២១ របស់ក្រសួងរ៉ែ និងថាមពលកាលពីថ្ងៃអង្គារ។
លោក ទី នរិន្ទ រដ្ឋលេខាធិការក្រសួងរ៉ែ និងថាមពលបានថ្លែងថា បច្ចុប្បន្ននេះវិស័យឯកជនបានចូលរួមចំណែកយ៉ាងសំខាន់ក្នុងការវិនិយោគលើវិស័យអគ្គិសនីដែលជាគន្លឹះសំខាន់នៃការបង្កើនល្បឿន ដើម្បីសម្រេចគោលដៅអភិវឌ្ឍន៍វិស័យអគ្គិសនីរបស់រដ្ឋាភិបាល។
តាមលោក នរិន្ទ គិតត្រឹមដំណាច់ឆ្នាំ ២០១៩ ក្នុងចំណោមការវិនិយោគសរុបនេះ ការវិនិយោគពីវិស័យឯកជនទាំងក្នុង និងក្រៅស្រុកមានតម្លៃ ៤,៦ ពាន់លានដុល្លារ និងការវិនិយោគរបស់រដ្ឋតាមរយៈជំនួយឥណទាន និងថវិកាផ្ទាល់របស់រដ្ឋមានតម្លៃ ១,៥ ពាន់លានដុល្លារ។
លោកបន្តថា បច្ចុប្បន្នប្រភពអគ្គិសនីវិនិយោគដោយក្រុមហ៊ុនក្នុងស្រុកចំនួន ២ ៧៥៦ មេហ្គាវ៉ាត់ដែលមានតម្លៃ ៣,៣ ពាន់លានដុល្លារក្នុងនោះវិនិយោគលើអនុស្ថានីយចំនួន ៣៦ ដែលមានតម្លៃ ១,១ ពាន់ លានដុល្លារ ខណៈការវិនិយោគលើបណ្តាញ MV មានប្រវែង ៣៤ ០៥៦ គីឡូម៉ែត្រ ដែលមានត្រង់ស្វូចែកចាយ ១៨ ៤៦២ គ្រឿង និងវិនិយោគលើបណ្តាញ LV មានប្រវែង ៣៦ ៨៥៣ គីឡូម៉ែត្រ រួមទាំងការភ្ជាប់ចរន្តដាក់កុងទ័រជាង ២,៨ លានកន្លែង ដែលមានតម្លៃ ១ ៧០០ លានដុល្លារ។
លោកថ្លែងថា៖ «ប្រសិនបើគ្មានការវិនិយោគរបស់វិស័យឯកជន រដ្ឋត្រូវវិនិយោគដោយខ្លួនឯងចាប់ពីឆ្នាំ ២០០៦ មកយើងយ៉ាងតិចត្រូវការពេល ៥០ ឆ្នាំ ដើម្បីមានទំហំវិនិយោគប៉ុននេះមានន័យថា លុះត្រាតែដល់ឆ្នាំ ២០៥៦ ទើបយើងអាចអភិវឌ្ឍបានដូចស្ថានភាពបច្ចុប្បន្ន»។
លោកបន្តថា៖ «ការវិនិយោគរបស់វិស័យឯកជនកន្លងមកបានធ្វើឲ្យវិស័យអគ្គិសនីដើរលឿនជាងការវិនិយោគដោយរដ្ឋតែឯងចំនួន ៣៦ ឆ្នាំ»។
លោកបន្ថែមថា បើតាមការពិនិត្យ ការគោរពដោយខ្ជាប់ខ្ជួននូវខ្លឹមសារកិច្ចសន្យាវិនិយោគ ការផ្តល់ឲ្យនូវអត្រារំលស់ទុនវិនិយោគសមស្រប និងការទូទាត់យ៉ាងទៀងទាត់របស់អគ្គិសនីកម្ពុជាដល់អ្នកផលិតអគ្គិសនីឯកជន បន្ថែមពីលើការធានារបស់រដ្ឋាភិបាលបានធ្វើឲ្យអ្នកវិនិយោគឯកជនទុកចិត្ត ចូលរួមវិនិយោគក្នុងវិស័យអគ្គិសនីយ៉ាងច្រើនដែលស្មើនឹង ៣ ដងនៃការវិនិយោគរបស់រដ្ឋ និងអគ្គិសនីកម្ពុជា។
លោកបញ្ជាក់ថា៖ «ដើម្បីទាក់ទាញអ្នកវិនិយោគឯកជនឲ្យចូលរួមវិនិយោគក្នុងវិស័យអគ្គិសនី រាជរដ្ឋាភិបាលបានបើកចំហឲ្យវិនិយោគឯកជនទាំងក្នុងស្រុក និងក្រៅស្រុក ធ្វើការវិនិយោគលើគ្រប់មុខព្រួញនៃវិស័យអគ្គិសនី»។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពលថ្លែងក្នុងកិច្ចប្រជុំបូកសរុបលទ្ធផលការអនុវត្តកម្មវិធីការងារ ២០១៩ និងតម្រង់ទិសដៅកម្មវិធីការងារ ២០២០ និង ២០២១ របស់ក្រសួងរ៉ែ និងថាមពលថាការអភិវឌ្ឍប្រភពអគ្គិសនី ដើម្បីបង្កើនសមត្ថភាពផលិត បញ្ជូន ចែកចាយ និងការតភ្ជាប់បណ្តាញឲ្យអ្នកប្រើប្រាស់គឺជាការងារចម្បងរបស់ក្រសួងដែលកំពុងនឹងបន្តអនុវត្តជាបន្តបន្ទាប់ ដើម្បីធ្វើឱ្យកម្ពុជាមានប្រភពអគ្គិសនីផ្គត់ផ្គង់គ្រប់គ្រងស្ថិរភាពសម្រាប់បំពេញតម្រូវការកំណើនប្រើប្រាស់។ លោកថ្លែងថា៖ «ជាមួយគ្នានេះ ការកែលម្អការផ្តល់សេវាអគ្គិសនីដល់អ្នកប្រើប្រាស់ និងការបញ្ចុះតម្លៃអគ្គិសនីក៏បាន និងកំពុងផ្តល់គុណប្រយោជន៍ដល់ប្រជាពលរដ្ឋទូទាំងប្រទេស»។
បើយោងតាមរបាយការណ៍របស់ក្រសួងរ៉ែ និងថាមពលកម្ពុជាផលិតថាមពលសរុប ១១ ២៦១ GWh ក្នុង ឆ្នាំ ២០១៩ កើនឡើង ២១ ភាគរយបើធៀបនឹងឆ្នាំ ២០១៨ ដែលមាន ៩ ៤២៧ GWh។
របាយការណ៍នេះបង្ហាញថាកម្ពុជាបានលក់ថាមពលអគ្គិសនីចំនួន ១០ ៨៨៥ GWh ទៅឲ្យអតិថិជនជាង ១,១ លាននាក់កាលពីឆ្នាំមុន។
គណៈរដ្ឋមន្ត្រីកម្ពុជាកាលពីសប្តាហ៍មុនបានអនុម័តគម្រោងអភិវឌ្ឍន៍សាងសង់រោងចក្រអគ្គិសនីដុតធ្យូងថ្ម ២ កន្លែង និងគម្រោងអភិវឌ្ឍន៍ខ្សែបណ្តាញបញ្ជូនចំនួន ១ ដែលមានតម្លៃវិនិយោគសរុបជាង ១,៧ ពាន់លានដុល្លារ។
គម្រោងវិនិយោគទាំង ៣ នេះពិតជាមានភាពចាំបាច់ក្នុងការបំពេញឲ្យបានគ្រប់គ្រាន់នូវប្រភពអគ្គិសនី ធានាសុវត្ថិភាព និងសន្តិសុខនៃការផ្គត់ផ្គង់អគ្គិសនីនៅកម្ពុជាចាប់ពីឆ្នាំ ២០២១ ដល់ឆ្នាំ ២០២៤ ជាពិសេសនៅរដូវប្រាំងដែលវារីអគ្គិសនីមួយភាគធំពុំមានលទ្ធភាពផលិតបានច្រើន៕