ភ្នំពេញៈ គម្រោងវិនិយោគលើថាមពលអគ្គិសនីពីកម្លាំងខ្យល់ដែលមានអានុភាព ៨០ មេហ្គាវ៉ាត់ របស់ក្រុមហ៊ុន The Blue Circle ស្ថិតក្នុងខេត្តកំពត អាចនឹងលេចរូបរាងឡើងនៅពេលឆាប់ៗ ខណៈក្រុមហ៊ុនកំពុងចរចាតម្លៃលក់ថាមពលដែលផលិតបានទៅឲ្យអគ្គិសនីកម្ពុជា។ នេះបើតាមអ្នកនាំពាក្យក្រសួងរ៉ែ និងថាមពល។
The Blue Circle ជាក្រុមហ៊ុនជំនាញក្នុងការសាងសង់រោងចក្រផលិតអគ្គិសនីពីខ្យល់មានមូលដ្ឋាននៅប្រទេសបារាំង។ បច្ចុប្បន្នក្រុមហ៊ុនមានប្រតិបត្តិការជាច្រើនក្នុងបណ្តាប្រទេសតំបន់អាស៊ាន ពិសេសប្រទេសវៀតណាម។
លោក វិចទ័រ ហ្សូនា អ្នកនាំពាក្យក្រសួងរ៉ែ និងថាមពលបានប្រាប់ភ្នំពេញប៉ុស្តិ៍ កាលពីថ្ងៃអាទិត្យថា បច្ចុប្បន្នក្រុមហ៊ុន The Blue Circle កំពុងចរចាជាមួយក្រុមការងារអគ្គិសនីកម្ពុជា តាមរយៈការដាក់តម្លៃលក់ ទិញអគ្គិសនីរវាងគ្នា មុននឹងឈានដល់កិច្ចព្រមព្រៀងផ្លូវការ ដើម្បីសាងសង់ស្ថានីយទាញយកថាមពលអគ្គិសនីពីកម្លាំងខ្យល់ស្ថិតនៅតំបន់ភ្នំបូកគោ ខេត្តកំពត។ គម្រោងជំហានដំបូងនេះនឹងអាចផលិតថាមពលបាន ៨០ មេហ្គាវ៉ាត់។ លោកបន្តថា គម្រោងនេះត្រូវបានក្រុមហ៊ុន និងអាជ្ញាធរកម្ពុជាធ្វើការពិភាក្សាគ្នារយៈពេលជាងកន្លះឆ្នាំរួចមកហើយ។
លោកនិយាយថា៖ «ខ្ញុំគិតថា យើងនឹងអាចឈានដល់កិច្ចព្រមព្រៀងជាមួយគ្នាឆាប់ៗនេះ ដោយសង្ឃឹមថា ភាគីទាំង ២ នឹងចរចាតម្លៃត្រូវគ្នា»។ លោកបន្តថា៖ «ដោយសារវាជាថាមពលដែលទទួលបានពីខ្យល់ ឬហៅថា ថាមពលបៃតង ខ្ញុំពិតជាគាំទ្រឲ្យមានគម្រោងបែបនេះច្រើននៅកម្ពុជា»។
បើយោងតាមលោក ហ្សូនា តម្លៃនៃការចរចារវាងក្រុមហ៊ុន និងអាជ្ញាធរកម្ពុជា កំពុងស្ថិតក្នុងរង្វង់ក្រោម ០,០៧ ដុល្លារ ក្នុង ១ គីឡូវ៉ាត់ម៉ោង។
ខណៈបច្ចុប្បន្នអគ្គិសនីកម្ពុជាកំពុងទិញថាមពលពីក្រុមហ៊ុនវិនិយោគជាច្រើនទាំងក្នុងស្រុក និងក្រៅស្រុកមកបំពេញតម្រូវការប្រើប្រាស់ក្នុងស្រុកនោះ លោក ហ្សូនា បានបដិសេធប្រាប់តម្លៃដែលអាជ្ញាធរបានទិញពីប្រភពទាំងអស់នោះដោយលោកលើកឡើងថា តម្លៃអគ្គិសនីរដ្ឋទិញពីក្រុមហ៊ុន គឺមានភាពប្រែប្រួលទៅតាមស្ថានភាពប្រភព ទីតាំង និងបរិមាណ ជាដើម។
តាមលោក ហ្សូនា ប្រសិនបើអ្វីៗដំណើរការទៅមុខល្អ The Blue Circle នឹងសាងសង់ទួរប៊ីនខ្យល់ចំនួន ១០ ដែលមានសមត្ថភាពផលិតសរុប ៨០ មេហ្គាវ៉ាត់ ក្នុង ១ ឆ្នាំ។
លោកបន្ថែមថា The Blue Circle គឺជាក្រុមហ៊ុនធំ និងមានបទពិសោធច្រើនលើការងារនេះ។ លោកនិយាយថា៖ «បើតាមខ្ញុំដឹង ក្រុមហ៊ុននេះកំពុងវិនិយោគនៅលើការផលិតអគ្គិសនីពីកម្លាំងខ្យល់ជាច្រើនរយមេហ្គាវ៉ាត់នៅប្រទេសវៀតណាមពេលនេះ»។
កន្លងមកក្រុមហ៊ុនបានធ្វើការសិក្សានៅទីតាំងចំនួន ៣ ដែលរួមមាន ខេត្តកំពត ព្រះសីហនុ និងមណ្ឌលគិរី។ នេះបើតាមលោក វិចទ័រ ហ្សូនា។
លោក នាម កូពី អគ្គនាយកក្រុមហ៊ុនផ្នែកបរិស្ថាន CES Co.,Ltd បានប្រាប់ភ្នំពេញប៉ុស្តិ៍ថា ការទាញយកថាមពលអគ្គិសនីពីកម្លាំងខ្យល់ជាក្តីប្រាថ្នាដែលអ្នកបរិស្ថានចង់ឃើញ ព្រោះវាមិនបង្កជាផលប៉ះពាល់ដល់បរិស្ថានច្រើនដូចរោងចក្រអគ្គិសនីដើរដោយប្រេងខ្មៅ និងធ្យូងថ្មជាដើម។ លោកបន្តថា ការទាញយកថាមពលអគ្គិសនីពីខ្យល់កំពុងមាននិន្នាការកើនឡើងច្រើននៅតំបន់អឺរ៉ុប និងប្រទេសរីកចម្រើន។
លោកថ្លែងថា៖ «ប្រសិនបើមានការវិនិយោគលើថាមពលបែបនេះក្នុងនាមជាអ្នកបរិស្ថានខ្ញុំពិតជារីករាយ និងសូមចូលរួមគាំទ្រយ៉ាងខ្លាំង»។
ការពង្រីកការវិនិយោគលើថាមពល គឺជារឿងចាំបាច់ តែការគិតពីបរិស្ថានក៏ចាំបាច់ផងដែរ។ នេះបើតាមលោក កូពី។
បើយោងតាមរបាយការណ៍របស់ក្រសួងរ៉ែ និងថាមពល កម្ពុជាផលិតថាមពលសរុប ១១ ២៦១ លានគីឡូវ៉ាត់ម៉ោង (GWh) ក្នុងឆ្នាំ ២០១៩ កើនឡើង ២១ ភាគរយ បើធៀបទៅនឹងឆ្នាំ ២០១៨ ដែលមានចំនួន ៩ ៤២៧ លានគីឡូវ៉ាត់ម៉ោង (GWh)៕ LA