.jpg)
លោក ជា ប្រាសិទ្ធ ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល
ទំនោរមាស បានបន្តកើនឡើងឥតឈប់ឈរចាប់ពីដើមខែធ្នូឆ្នាំ ២០២០ រហូតដល់បច្ចុប្បន្នពីតម្លៃ ១៨០០ ដុល្លារប្លាយរហូតដល់ ១៩៤០ ដុល្លារ ក្នុងមួយអោនស៍ដែលកំណើននេះ ដោយសារតែវិបត្តិកូវីដ-១៩ ភាពតានតឹងនៃការផ្ទេរអំណាចដល់ប្រធានាធិបតីជាប់ឆ្នោតថ្មី នៅសហរដ្ឋ អាមេរិក ការបោះឆ្នោតជ្រើសតាំងសមាជិកព្រឹទ្ធសភាក្នុងរដ្ឋ Georgia លទ្ធផលកិច្ចប្រជុំធនាគារកណ្ដាលកាលពីថ្ងៃ ព្រហស្បតិ៍ ទី ០៧ ខែ មករា ឆ្នាំ ២០២១ និងរបាយការណ៍ការងារនៅដើមឆ្នាំ ២០២១ នៅអាមេរិក។
ដោយឡែក តម្លៃមាស ក្នុងសប្ដាហ៍នេះទទួលរងឥទ្ធិពលខ្លាំងដោយសារកត្ដាព័ត៌មានសំខាន់ៗខាងលើនេះដែរ។ បើយោងតាមរបាយការណ៍ Worldometer ដែលបានចេញផ្សាយនាថ្ងៃទី ៨ ខែ មករា ឆ្នាំ ២០២១ អត្រាអ្នកឆ្លងជំងឺកូវីដ-១៩ នៅសហរដ្ឋអាមេរិក បានកើនឡើងដល់ ២២ លាននាក់ ហើយចំនួនអ្នកស្លាប់បានកើនឡើសពី ៣៧៤០០០ នាក់ដែលជាតួលេខខ្ពស់បំផុតនៅលើពិភពលោក។
ជោគជ័យនៃការបោះឆ្នោតជ្រើសតាំងសមាជិកព្រឹទ្ធសភាក្នុងរដ្ឋ Georgia និងលទ្ធផលនៃរបាយការណ៍នៃកិច្ចប្រជុំគោលនយោបាយរូបិយវត្ថុរបស់ធនាគារកណ្តាលអាមេរិកសម្រាប់ឆ្នាំ ២០២១ នឹងជះឥទ្ធិពល លើតម្លៃមាសលើទីផ្សារ។ ស្ថាប័នធំៗនិងវិនិយោគិនបាននឹងកំពុងផ្តោតការយកចិត្តទុកដាក់លើចំណុចធំៗមួយចំនួនដូចជា គោលនយោបាយបន្ធូរបន្ថយបរិមាណនិងលក្ខខណ្ឌនៃការកែតម្រូវគោលនយោបាយអត្រាការប្រាក់។
នៅថ្ងៃសុក្រទី ៨ សប្តាហ៍នេះ ស្ថាប័នស្ថិតិជាតិរបស់អាមេរិកនឹងប្រកាសពីរបាយការណ៍អត្រាការងាររបស់ប្រជាពលរដ្ឋអាមេរិកប្រចាំខែធ្នូ ឆ្នាំ ២០២០ ដែលត្រូវបានព្យាករណ៍ថា មានចំនួន ៦៩ ០០០ នាក់ធ្លាក់ចុះបើធៀបនឹងអត្រាការងារក្នុងខែវិចិ្ឆកា ដែលមានចំនួន ២៤៥ ០០០ នាក់។
ម្យ៉ាងទៀត ផ្អែកលើការវិភាគបែបបច្ចេកទេស តម្លៃមាស បានបំបែករបារតម្លៃទីមួយ ១៨៦០ ដុល្លារ និងទីពីរ ១៨៩០ ដុល្លារ ហើយកំពុងរត់ឆ្ពោះទៅតម្លៃ ២០០០ ដុល្លារ។ ក្នុងថេរវេលា ១ ម៉ោង តម្លៃមាស បានឡើងថ្លៃខ្ពស់បំផុត ១៩០០ ដុល្លារសម្រាប់សប្តាហ៍ចុងក្រោយនៃខែធ្នូ។
ដូច្នេះ អ្នកវិនិយោគគួរតែទិញនៅពេលថ្លៃឡើងរហូតដល់ ១៩៥៦ ដុល្លារ ដោយដាក់មុខងារកំណត់ប្រាក់ចំណេញទី ១ ក្នុងតម្លៃ ១៩៨០ ដុល្លារ និងទី ២ ក្នុងតម្លៃ ២០០០ ដុល្លារ និងដាក់មុខងារកំណត់ហានិភ័យនៅតម្លៃ ១៩៤៧ ដុល្លារ។ អ្នកវិនិយោគក៏អាចទិញនៅពេលថ្លៃធ្លាក់ដល់ ១៩១៧ ដុល្លារ ដោយកំណត់មុខងារកាត់ប្រាក់ចំណេញទីមួយនៅតម្លៃ ១៩២៩ ដុល្លារ និងទី២ នៅតម្លៃ ១៩៤៥ ដុល្លារ ដោយកំណត់មុខងារការពារហានិភ័យក្នុងតម្លៃ ១៩១១ ដុល្លារ។
វិភាគដោយ លោក ជា ប្រាសិទ្ធ ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល
