.jpg)
កម្មករដំឡើងដំបូលរថភ្លើងនៅរោងចក្រ Alstom នៅឥណ្ឌា។ AFP
ក្រុងហ្វ្រេងហ្វឺតៈ អង្គការឃ្លាំមើលទីផ្សាររបស់ប្រទេស អាល្លឺម៉ង់ បានឲ្យដឹងថា សម្បទានដែលផ្ដល់ដោយក្រុមហ៊ុន Siemens និងក្រុមហ៊ុន Alstom របស់ប្រទេស បារាំង ដើម្បីទទួលបានការច្របាច់បញ្ចូលគ្នានូវក្រុមហ៊ុនផ្លូវដែករបស់ពួកគេ មិនគ្រប់គ្រាន់ក្នុងការសម្រាលការបារម្ភអំពីការប្រកួតប្រជែងនោះទេ។ នេះបើតាមសេចក្តីប្រកាសព័ត៌មានកាលពីថ្ងៃចន្ទ។
លិខិត ១ ច្បាប់របស់និយតករ Bundeskartellamt ផ្ញើទៅគណៈកម្មការអឺរ៉ុបដែលត្រូវបានមើលឃើញដោយកាសែត Financial Times និងកាសែតនានារបស់អាល្លឺម៉ង់ ព្រមានថា សម្បទានដែលផ្ដល់ដោយក្រុមហ៊ុនទាំង ២ នេះគឺ «មិនសមរម្យ និងមិនគ្រប់គ្រាន់» ក្នុងការបំបាត់ក្តីបារម្ភបែបនោះឡើយ។
កាសែត Frankfurter Allgemeine Zeitung បានរាយការណ៍ថា អាជ្ញាធរមានមូលដ្ឋាននៅទីក្រុង Bonn ចែករំលែកការបារម្ភរបស់ទីក្រុងប៊្រុចសែលអំពីកិច្ចព្រមព្រៀងនេះ។
មន្ដ្រីគណៈកម្មការនេះ មានពេលវេលារហូតដល់ថ្ងៃទី ១៨ ខែកុម្ភៈ ដើម្បីសម្រេចលើការច្របាច់បញ្ចូលគ្នារវាងក្រុមហ៊ុន Alstom ជាក្រុមហ៊ុនផលិតរថភ្លើង TGV ដ៏ល្បីរបស់ប្រទេស បារាំង និងក្រុមហ៊ុន Siemens ដែលមានមូលដ្ឋាននៅទីក្រុង Munich ដែលត្រូវបានប្រកាសកាលពីខែកញ្ញា ឆ្នាំ ២០១៧។
ក្រុមអ្នកគាំទ្រកិច្ចព្រមព្រៀងស្តីពីការច្របាច់បញ្ចូលគ្នានូវប្រតិបត្តិការផ្លូវដែករបស់ក្រុមហ៊ុនទាំង ២ នេះ ដូចជាលោក Bruno Le Maire រដ្ឋមន្ដ្រីក្រសួងហិរញ្ញវត្ថុរបស់ប្រទេស បារាំង លើកឡើងថា ការប្រកួតប្រជែងនៅអឺរ៉ុបចាំបាច់ត្រូវធ្វើឡើងដើម្បីប្រកួតប្រជែងជាមួយក្រុមហ៊ុន CRRC ដែលជាក្រុមហ៊ុនដ៏ធំរបស់ប្រទេស ចិន នៅលើទីផ្សារពិភពលោក។
លោកក៏បានច្រានចោលការបង្ហាញការបារម្ភពីការប្រកួតប្រជែងទាំងនេះ។
ប្រសិនបើត្រូវបានអនុញ្ញាត ការច្របាច់បញ្ចូលគ្នានេះ នឹងបង្កើតបានជាក្រុមហ៊ុនផ្លូវដែកដ៏ធំមួយ ដោយមានប្រតិបត្តិការនៅក្នុងប្រទេសចំនួន ៦០ និងប្រាក់ចំណូលប្រចាំឆ្នាំ ១៥,៦១៧,៩ពាន់លានដុល្លារ។
ក្រុមហ៊ុនទាំង ២ នេះបានឲ្យដឹងកាលពីខែធ្នូ ឆ្នាំមុនថា ពួកគេបានផ្ដល់សម្បទានដល់គណៈកម្មការនេះ ដោយពួកគេជឿជាក់ថា នឹងបន្ធូរបន្ថយការបារម្ភពីការប្រកួតប្រជែង ដែលរួមទាំងការលក់ចេញ ឬការផ្ដល់អាជ្ញាប័ណ្ណរថភ្លើងល្បឿនលឿនមួយចំនួន និងបញ្ហាបច្ចេកវិទ្យាផងដែរ៕ AFP/LA
