ការសាងសង់ផ្លូវល្បឿនលឿនទី១ នៅកម្ពុជាដែលមានប្រវែងសរុបជាង ១៩០ គីឡូម៉ែត្រ សម្រេចបានជិត ២៧ ភាគរយ។ រូបថត ក្រសួងសាធារណការ និងដឹកជញ្ជូន
ភ្នំពេញៈ ទោះបីជំងឺផ្តាសាយសកលកូវីដ ១៩ នៅកំពុងបន្តរីករាលដាល ក៏ការសាងសង់ផ្លូវល្បឿនលឿនពីភ្នំពេញ-ខេត្តព្រះសីហនុ ដែលមានតម្លៃជាង ១,៩ ពាន់លានដុល្លារ មិនបានពន្យារពេលនោះទេ ដោយមកដល់ពេលនេះសម្រេចបានជាង ២៦ ភាគរយ ខណៈការសាងសង់គ្រោងនឹងត្រូវបញ្ចប់នៅប្រមាណ ២ ឆ្នាំខាងមុខ។ នេះបើតាមអ្នកនាំពាក្យក្រសួងសាធារណការ និងដឹកជញ្ជូន។
ផ្លូវល្បឿនលឿនទី ១ នៅកម្ពុជាដែលមានប្រវែងសរុបជាង ១៩០ គីឡូម៉ែត្រនេះតភ្ជាប់ពីសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញដល់សង្កាត់លេខ ៣ ក្រុងព្រះសីហនុដោយឆ្លងកាត់រាជធានីភ្នំពេញ ៨,៣០ គីឡូម៉ែត្រ ខេត្តកណ្តាល ៩,១០ គីឡូម៉ែត្រ ខេត្តកំពង់ស្ពឺ ៨០,៨០ គីឡូម៉ែត្រ ខេត្តកោះកុង ១,៩២ គីឡូម៉ែត្រ និងខេត្តព្រះសីហនុមានប្រវែង ៨៩,៨៩ គីឡូម៉ែត្រ។
ផ្លូវនេះចាប់ផ្តើមសាងសង់ពីថ្ងៃទី ២២ ខែមីនា ឆ្នាំ ២០១៩ ដោយក្រុមហ៊ុនសាជីវកម្មស្ពាន និងថ្នល់ ប្រទេសចិន (CRBC) តាមរយៈក្រុមហ៊ុន Cambodian PPSHV Expressway Co., Ltd។
លោក វ៉ាស៊ឹម សុរិយា អ្នកនាំពាក្យក្រសួងសាធារណការ និងដឹកជញ្ជូនបានប្រាប់ ភ្នំពេញ ប៉ុស្តិ៍ នាថ្ងៃចន្ទថា ការសាងសង់ផ្លូវល្បឿនលឿននៅពេលនេះសម្រេចបាន ២៦,៨៦ ភាគរយ ដោយការសាងសង់កំពុងមានដំណើរទៅមុខជាប្រចាំ។ លោកបន្តថា មន្ត្រីជំនាញរបស់ក្រសួងសាធារណការតែងតែសហការជាមួយនឹងក្រុមហ៊ុនសាងសង់ ដើម្បីធ្វើឱ្យការសាងសង់អាចបញ្ចប់បានទៅតាមផែនការ។
លោកថ្លែងថា៖ «បើមើលតាមក្រាហ្វិក គឺដំណើរការសាងសង់ផ្លូវនេះកំពុងដើរស្របគ្នាជាមួយនឹងផែនការដែលបានកំណត់ទុក ដែលអាចបញ្ចប់ក្នុងឆមាសទី ១ ឆ្នាំ ២០២២»។
លោកលើកឡើងទៀតថា ផ្លូវល្បឿនលឿននេះនឹងចូលរួមចំណែកយ៉ាងច្រើនក្នុងការជំរុញកំណើនសេដ្ឋកិច្ចជាតិកម្ពុជា តាមរយៈការកាត់បន្ថយចំណាយពីភ្នំពេញទៅកាន់តំបន់កំពង់ផែសមុទ្រអន្តរជាតិទឹកជ្រៅ ព្រមទាំងរយៈពេលធ្វើដំណើរផងដែរ។
លោក វ៉ី សំណាង អភិបាលខេត្តកំពង់ស្ពឺបាននិយាយថា សម្រាប់ចម្ងាយផ្លូវប្រមាណ ៨០ គីឡូម៉ែត្រ ឆ្លងកាត់ខេត្តកំពង់ស្ពឺ បច្ចុប្បន្នការចាក់ដី និងដាក់លូ សម្រេចបាន ១០០ ភាគរយហើយ ខណៈស្ពានឆ្លងកាត់លើផ្លូវជាតិលេខ ៤ ចំនួន ២ កន្លែងនៅមិនទាន់រួចរាល់ទេ។ ផ្លូវនេះនឹងក្លាយជាផ្លូវយុទ្ធសាស្ត្រមួយដ៏សំខាន់សម្រាប់ជំរុញកំណើនសេដ្ឋកិច្ចកម្ពុជា និងខេត្តកំពង់ស្ពឺ។
ទោះបីជាយ៉ាងណាលោក សំណាង ប្រាប់ថា ការសាងសង់ផ្លូវថ្មីនេះក៏បានប៉ះពាល់ដល់ដីឯកជនមួយចំនួនដែរ ប៉ុន្តែការដោះស្រាយផលប៉ះពាល់ទាំងនោះត្រូវបានដោះស្រាយបញ្ចប់ជាបន្តបន្ទាប់។ លោកបញ្ជាក់ថា៖ «ការដោះស្រាយផលប៉ះពាល់ពេលនេះគឺមាននៅសល់តែ ៥-៦ គ្រួសារតែប៉ុណ្ណោះ»។
លោកនិយាយថា៖ «សម្រាប់ការសាងសង់ផ្លូវឆ្លងកាត់ខេត្តដែលមានប្រវែង ៨០ គីឡូម៉ែត្រ ខ្ញុំសង្កេតឃើញថា មានដំណើរការទៅមុនយ៉ាងរលូន»។
ប្រធានសមាគមភ័ស្តុភារកម្មកម្ពុជា (CLA) លោក ស៊ិន ចន្ធី ធ្លាប់បានប្រាប់ ភ្នំពេញ ប៉ុស្តិ៍ ថា នៅពេលផ្លូវល្បឿនលឿនបើកដំណើរការវានឹងចូលរួមចំណែកយ៉ាងច្រើននៅក្នុងវិស័យដឹកជញ្ជូន។ លោកថ្លែងថា៖ «ទោះជាការបើកបរតាមផ្លូវល្បឿនលឿនត្រូវបង់ប្រាក់ក៏ដោយ តែបើយើងធៀបជាមួយការប្រើប្រាស់ផ្លូវបច្ចុប្បន្នដែលមានភាពតូចចង្អៀត និងចម្ងាយឆ្ងាយជាងប្រហែល ៤០ គីឡូម៉ែត្រនោះឃើញថា ការចំណាយលើប្រេងឥន្ធនៈគឺអស់តិចជាង និងប្រើពេលខ្លីទៀតផង»។
លោកបន្តថា ផ្លូវនេះនឹងដើរតួនាទីសំខាន់ក្នុងការដឹកជញ្ជូនទំនិញពីភ្នំពេញ ទៅកំពង់ផែទឹកជ្រៅរបស់កម្ពុជា។
បើតាមលោក ចន្ធី បច្ចុប្បន្នការដឹកជញ្ជូនទំនិញតាមរថយន្តកុងតឺន័ររវាងភ្នំពេញ និងក្រុងព្រះសីហនុដែលមានចម្ងាយ ២៣២ គីឡូម៉ែត្រត្រូវចំណាយពេលពី ៦ ទៅ ៨ ម៉ោង។
លោកលើកឡើងថា វិស័យឯកជនពិតជាចង់បានហេដ្ឋារចនាសម្ព័ន្ធផ្លូវថ្នល់មួយដែលល្អប្រសើរ ព្រោះនៅពេលមានផ្លូវថ្នល់ល្អវានឹងជួយកាត់បន្ថយថ្លៃដើមផលិត៕ LA
