.jpg)
សកម្មភាពថ្នាក់ដឹកនាំ SSCA ចុះទៅពិនិត្យការដ្ឋានសាងសង់ព្រលានយន្តហោះអន្តរជាតិថ្មីកាលពីថ្ងៃទី ១៥ ខែមិថុនា។ រូបថត សហការី
ភ្នំពេញៈ ការសាងសង់ព្រលានយន្តហោះអន្តរជាតិសៀមរាបថ្មីដែលមានតម្លៃ ៨៨០ លានដុល្លារ បានបញ្ចប់ជិត ៣០ ភាគរយហើយ ខណៈក្រុមហ៊ុនអភិវឌ្ឍន៍មួយនេះបានអះអាងថា ដំណាក់កាលទី ១ នេះនឹងរួចរាល់តាមការគ្រោងទុកនៅខែមីនា ឆ្នាំ ២០២៣។
លោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល (SSCA) បានប្រាប់ភ្នំពេញប៉ុស្ដិ៍កាលពីថ្ងៃអាទិត្យ បន្ទាប់ពីការពិនិត្យដល់ទីកន្លែងដោយលោក ម៉ៅ ហាវណ្ណាល់ រដ្ឋមន្ដ្រីទទួលបន្ទុក SSCA កាលពីថ្ងៃទី ១៥ មិថុនាថាគម្រោងនេះបានបញ្ចប់ការសាងសង់ ២៥ ភាគរយហើយនៃដំណាក់កាលទី ១ នៅក្នុងចំណោមនោះ ការសាងសង់គ្រឹះសម្រាប់ស្ថានីយអ្នកដំណើរបានបញ្ចប់ជិត ៩៨ ភាគរយហើយ ខណៈផ្លូវរត់ប្រវែង ៣ ៣០០ ម៉ែត្រក៏ជិតបញ្ចប់ផងដែរ។
លោកបានថ្លែងថា៖ «យើងមើលឃើញថា ទោះបីជាក្រុមហ៊ុនអភិវឌ្ឍន៍នេះបានជួបនឹងបញ្ហាប្រឈមមួយចំនួនក្នុងអំឡុងពេលនៃការរីករាលដាលជំងឺកូវីដ១៩ ក៏ពួកគេនៅតែប្ដេជ្ញាចិត្តចំពោះគម្រោងដែលបង្ហាញការរីកចម្រើនខ្លាំងបំផុតមួយនេះ»។
លោកបានបន្តថា ការរីករាលដាលជំងឺកូវីដ ១៩ បានបង្អាក់ការងារនេះកាលពីខែមេសា ដោយសារក្រុមអ្នកជំនាញមួយចំនួនមិនអាចធ្វើដំណើរត្រឡប់ពីប្រទេសចិនមកកម្ពុជាបាន។ ទោះយ៉ាងណា ពេលនេះក្រុមហ៊ុនបានបង្កើនការងារពេលយប់ដើម្បីសម្រេចបានតាមការគ្រោងទុក។
លោកលើកឡើងថា៖ «តាមផែនការ ពួកគេនឹងបញ្ចប់នៅខែមីនា ឆ្នាំ ២០២៣។ ខ្ញុំគិតថា គម្រោងនេះនឹងដំណើរការតាមការគ្រោងទុក ដោយសារពួកគេបង្កើនការងារដើម្បីប៉ះប៉ូវផលប៉ះពាល់ដោយសារការពន្យារពេលកាលពីខែមេសា ព្រោះជំងឺកូវីដ១៩ ប៉ះពាល់ដល់លំហូរការងាររបស់ពួកគេ»។
ព្រលានយន្តហោះថ្មីនេះត្រូវបានសាងសង់លើផ្ទៃដី ៧៥០ ហិកតា នៅស្រុកសូទ្រនិគម នាជាយក្រុងសៀមរាប។ គម្រោងនេះនឹងត្រូវសាងសង់ជា ៣ ដំណាក់កាល។ ក្រុមហ៊ុននឹងវិនិយោគ ៥០០ លានដុល្លារក្នុងដំណាក់កាលដំបូង និងដំណាក់កាលទី ២ ដែលនឹងអនុញ្ញាតឲ្យយន្តហោះដឹកអ្នកដំណើរធុនមធ្យមដូចជាយន្តហោះ Boeing 737 និងយន្តហោះ Airbus A320 ចុះចតបាន។ ទឹកប្រាក់ ៣០០ លានដុល្លារផ្សេងទៀតនឹងត្រូវលៃទុកសម្រាប់ដំណាក់កាលទី ៣។
កាលពីខែតុលា ឆ្នាំ ២០១៧ កិច្ចព្រមព្រៀងសាងសង់នេះត្រូវបានចុះហត្ថលេខារវាងរដ្ឋាភិបាលកម្ពុជាជាមួយក្រុមហ៊ុន Yunnan Investment Hol-dings, Ltd ដែលគ្រប់គ្រងដោយរដ្ឋរបស់ប្រទេសចិន។ កិច្ចព្រមព្រៀងនេះផ្ដល់ដល់ក្រុមហ៊ុនចិននូវសិទ្ធិផ្ដាច់មុខក្នុងការគ្រប់គ្រង និងដំណើរការព្រលានយន្តហោះនេះក្នុងរយៈពេលសម្បទាន ៥៥ ឆ្នាំស្ថិតក្រោមផែនការសាងសង់ ប្រតិបត្តិការ ផ្ទេរ (BOT)។
កាលពីថ្ងៃទី ១៩ ខែមិថុនា លោក ម៉ៅ ហាវណ្ណាល់ បានប្រគល់ផែនការមេរបស់ព្រលានយន្តហោះនេះដល់លោក Lu Wei ប្រធានក្រុមប្រឹក្សាភិបាលក្រុមហ៊ុន AIAI សម្រាប់ការទទួលយកលើលក្ខណៈបច្ចេកទេសនៅក្នុងផែនការមេនេះ។
លោក Lu បានឲ្យដឹងថ្មីៗនេះថា ដោយមានការគាំទ្រពីរដ្ឋាភិបាលកម្ពុជា ពិសេស SSCA គម្រោងសាងសង់នេះនឹងត្រូវបញ្ចប់ទាំងស្រុងនៅថ្ងៃទី ១៤ ខែ មីនា ឆ្នាំ ២០២៣។ បច្ចុប្បន្នក្រុមហ៊ុនកំពុងធ្វើការជិតស្និទ្ធជាមួយក្រុមបច្ចេកទេសរបស់ SSCA ដោយផ្ដោតការយកចិត្តទុកដាក់លើការដំឡើងឧបករណ៍បច្ចេកទេស និងការរចនាប្លង់ព្រលានយន្តហោះនេះ។
តាមលោក ចាន់សេរីវុត្ថា តាមរយៈការសិក្សាព្រលានថ្មីនេះអាចទទួលអ្នកដំណើរ ៧ លាននាក់នៅក្នុងដំណាក់កាលដំបូងនៃការអភិវឌ្ឍជាមួយនឹងផ្លូវរត់ប្រវែង ៣ ៣០០ ម៉ែត្រ និងអ្នកដំណើរ ១០ លាននាក់ នៅក្នុងដំណាក់កាលទី ២ មានផ្លូវរត់ ៣ ៦០០ ម៉ែត្រ ក្នុងឆ្នាំ ២០៣០ និង ២០ លាននាក់នៅត្រឹមឆ្នាំ ២០៥០ សម្រាប់ដំណាក់កាលទី ៣ ជាមួយនឹងផ្លូវរត់ប្រវែង ៤ ០០០ ម៉ែត្រ៕LA
