.jpg)
ទំនប់វារីអគ្គិសនីឫស្សីជ្រំក្រោមមានសមត្ថភាពផលិតថាមពល ៣៣៨ មេហ្គាវ៉ាត់។ រូបថត CHINA HUADIAN CORP LTD
ភ្នំពេញ: ប្រទេសកម្ពុជា នឹងទទួលបានគម្រោងវិនិយោគទំនប់វារីអគ្គិសនីថ្មីមួយទៀតមានទំហំ ១៥០ មេហ្គាវ៉ាត់ ដែលជាកិច្ចខិតខំប្រឹងប្រែងរបស់រដ្ឋាភិបាលក្នុងការជំរុញការវិនិយោគលើវិស័យថាមពលអគ្គិសនី។
លោក សុខ សុទ្ធី អភិបាលរងខេត្តកោះកុងប្រាប់ភ្នំពេញប៉ុស្តិ៍ថា ការសិក្សាផលប៉ះពាល់បរិស្ថាន និងសង្គមលើគម្រោងទំនប់វារីអគ្គិសនីថ្មីនេះជិតរួចរាល់ហើយដោយរំពឹងថានឹងអាចបញ្ចប់ការសិក្សានៅពេលឆាប់ៗនេះ ដើម្បីឈានដល់ការចរចាលើការវិនិយោគ។
លោកនិយាយថា៖ «យើងបានសិក្សាផលប៉ះពាល់បរិស្ថាន និងសង្គមបានប្រហែល ៨០ ភាគរយហើយ ដោយមិនមានផលប៉ះពាល់សង្គមច្រើនទេ។ យើងបានធ្វើការសិក្សាផលប៉ះពាល់សម្រាប់គម្រោងនេះលើឃុំចំនួន ២ គឺឃុំឫស្សីជ្រំ និងឃុំតាតៃលើ ស្ថិតក្នុងខេត្តកោះកុង»។
លោកបន្តទៀតថា ទំនប់វារីអគ្គិសនីថ្មីនេះនឹងត្រូវកសាងឡើងដោយក្រុមហ៊ុន China National Heavy Machinery Corporation (CHMC) របស់ប្រទេសចិន ក្នុងតម្លៃវិនិយោគ ៣៨០ លានដុល្លារ។ វារីអគ្គិសនីថ្មីនេះត្រូវរំពឹងថា នឹងជួយបង្កើនការផ្គត់ផ្គង់ថាមពលអគ្គិសនីដល់ខេត្តកោះកុង និងបណ្តាខេត្តនៅជាប់ខេត្តនេះផងដែរ។
លោកបញ្ជាក់ថា៖ «គម្រោងនេះមិនត្រឹមតែជួយអភិវឌ្ឍខេត្តកោះកុងប៉ុណ្ណោះទេ ប៉ុន្តែវាថែមទាំងជាធុងអាគុយមួយដែលនឹងជួយចែកចាយថាមពលអគ្គិសនីនៅទូទាំងប្រទេសកម្ពុជានៅពេលអនាគត»។
បើយោងតាមលោក សុទ្ធី បច្ចុប្បន្ននៅខេត្តកោះកុងមានទំនប់វារីអគ្គិសនីចំនួន ៣ កំពុងប្រតិបត្តិការដែលមានសមត្ថភាពផលិតថាមពលសរុប ៦០២ មេហ្គាវ៉ាត់ក្នុងនោះទំនប់វារីអគ្គិសនីគិរីរម្យ ៣ មានអានុភាព ១៨ មេហ្គាវ៉ាត់ វារីអគ្គិសនីឫស្សីជ្រំក្រោមមានអានុភាព ៣៣៨ មេហ្គាវ៉ាត់ និងវារីអគ្គិសនីតាតៃ ២៤៦ មេហ្គាវ៉ាត់។
លោក វិចទ័រ ហ្សូនា អគ្គនាយកនៃអគ្គនាយកដ្ឋានថាមពលនៃក្រសួងរ៉ែ និងថាមពលបានឲ្យដឹងថា ពេលនេះក្រុមហ៊ុនកំពុងសិក្សាក្នុងដំណាក់កាលដំបូងនៃគម្រោងទំនប់វារីអគ្គិសនីស្ទឹងតាតៃលើ ដោយមិនទាន់ឈានដល់ការវិនិយោគនៅឡើយ។
លោកបានបន្តថា ទោះយ៉ាងណាតាមការសិក្សាក្រុមហ៊ុនបានវាយតម្លៃថា គម្រោងនេះមានលក្ខណៈបច្ចេកទេសល្អដែលអាចផ្តល់ថាមពលលើសពី ៥០ ភាគរយនៅរដូវប្រាំង។
លោកថ្លែងថា៖ «ជាយោបល់ខ្ញុំផ្ទាល់ គម្រោងនេះមានលក្ខណៈបច្ចេកទេស និងសេដ្ឋកិច្ចល្អ ដូច្នេះបើយើងសម្រេចបានលើការចរចាពីតម្លៃ តាមផែនការគម្រោងនេះនឹងដាក់ឲ្យដំណើរការនៅឆ្នាំ ២០២៦ ប៉ុន្តែជាក់ស្តែងនៅពេលនេះយើងមិនទាន់ឈានដល់ការជជែកពិភាក្សាពីរឿងតម្លៃនៅឡើយជាមួយគ្នានៅឡើយទេ»។
បច្ចុប្បន្ននេះកម្ពុជាអាចមានសមត្ថភាពផលិតថាមពលអគ្គិសនីបានចន្លោះ ៧០ ទៅ ៨០ ភាគរយ នៃតម្រូវការប្រើប្រាស់សរុបក្នុងស្រុក។ ក្រៅពីនេះជាការនាំចូលមកពីប្រទេសឡាវ ថៃ និងវៀតណាម។ នេះបើយោងតាមលោក ហ្សូនា។
លោក កែវ រតនៈ អគ្គនាយកអគ្គិសនីកម្ពុជា (EDC) កាលពីពេលកន្លងមកបាននិយាយថា អគ្គិសនីកម្ពុជាកំពុងធ្វើកិច្ចការជាច្រើនដើម្បីស្វែងរកថាមពលថ្មីបន្ថែមឲ្យបាន ១ ០០០ មេហ្គាវ៉ាត់ នៅមុនដំណាច់ឆ្នាំ ២០២០ ដែលទាញប្រភពថាមពលពីសាងសង់រោងចក្រអគ្គិសនីដើរដោយថាមពលធ្យូងថ្ម ពន្លឺព្រះអាទិត្យ និងការទិញពីប្រភពដែលមានតម្លៃទាប។
របាយការណ៍របស់អាជ្ញាធរអគ្គិសនីកម្ពុជា (EAC) ប្រចាំឆ្នាំ ២០១៨ បានបង្ហាញឲ្យឃើញថា កម្ពុជាបានបង្កើនការផ្គត់ផ្គង់ថាមពលអគ្គិសនីដល់ចំនួន ២ ៨៧០, ៦៥ មេហ្គាវ៉ាត់ នៅក្នុងឆ្នាំ ២០១៩ កើនឡើងពី ២ ៦៥០,២៦ មេហ្គាវ៉ាត់ក្នុងឆ្នាំ ២០១៨៕ LA
