ភ្នំពេញៈ របាយការណ៍ស្តីពីការអភិវឌ្ឍ ខុនដូ នៅរាជធានី-ភ្នំពេញ បានបង្ហាញពីការផ្គត់ផ្គង់លើសតម្រូវការ ខណៈនៅតែមានគម្រោងសាងសង់ជាច្រើននៅតែបន្តកើនឡើង។
ក្នុងរបាយការណ៍ព្យាករមួយរបស់ក្រុមហ៊ុនអចលនទ្រព្យ CBRE Cambodia បានឲ្យដឹងថា ចំនួនបន្ទប់ខុនដូក្នុងរាជធានីភ្នំពេញឆ្នាំ ២០១៩ នឹងកើនឡើង ១២០ ភាគរយ រហូតដល់ ៣១ ១១២ យូនីត ពីចំនួន ១៤ ១៧៣ យូនីតកាលពី ឆ្នាំ ២០១៨ ខណៈបច្ចុប្បន្នអត្រាប្រើប្រាស់ខុនដូក្នុងរាជធានីភ្នំពេញមានត្រឹមតែជាង ៤០ ភាគរយ។
អ្នកយកព័ត៌មាន កាសែត ភ្នំពេញប៉ុស្តិ៍ បានជួបជាមួយ អ្នកស្រី អាន សុធីតា នាយិកាក្រុមហ៊ុនអចលនទ្រព្យ CBRE Cambodia កាលពីចុងសប្តាហ៍មុន ដើម្បីពិភាក្សាអំពីដំណើរវិវឌ្ឍន៍នៃវិស័យខុនដូក្នុងរាជ-ធានីភ្នំពេញ។
តើអ្នកស្រីមើលឃើញការវិវឌ្ឍយ៉ាងដូចម្តេចដែរ ចំពោះទីផ្សារខុនដូនៅក្នុងប្រទេស កម្ពុជា មកដល់ពេលនេះ?
នៅអំឡុងដើមឆ្នាំ ២០០៨ ការអភិវឌ្ឍគម្រោងខុនដូចាប់ផ្តើមលេចរូបរាងឡើងគួរឲ្យកត់សម្គាល់នៅក្នុងទីក្រុងភ្នំពេញ ហើយពេលនោះគេឃើញការចូលមកដល់របស់វិនិយោគិនជនជាតិកូរ៉េ ដោយអភិវឌ្ឍគម្រោង De Castle ជាច្រើនរបស់ខ្លួន។ ទោះបីយ៉ាងនេះក្តីទីផ្សារខុនដូពេលនោះមានរយៈពេលខ្លីប៉ុណ្ណោះ ព្រោះវិបត្តិហិរញ្ញវត្ថុសកលនាអំឡុងពាក់កណ្តាលឆ្នាំ ២០០៨ បានធ្វើឲ្យទីផ្សារមួយនេះស្ទើរតែដួលរាបដល់ដី។ ត្រង់ចំណុចនេះខ្ញុំចង់ប្រាប់ថា ក្នុងឆ្នាំ ២០០៩ និង ២០១០ វិស័យខុនដូនៅកម្ពុជា មិនមានការវិនិយោគថ្មីទេ ហើយសកម្មភាពសាងសង់ក៏ស្ងប់ស្ងាត់ដែរ។
ពេលនោះគេត្រូវរង់ចាំរហូតដល់ចុងឆ្នាំ ២០១១ ទើបមានគម្រោងខុនដូថ្មីៗចំនួន ២ ទៅ ៣ បានចាប់ផ្តើមលេចឡើងវិញ ខណៈគម្រោងមួយចំនួនដែលបានផ្អាកការសាងសង់ក៏ចាប់ផ្តើមសាងសង់ និងបញ្ចប់ការដ្ឋានរបស់ខ្លួនដែរ។
តើវិស័យខុនដូចាប់ផ្តើមផ្ទុះឡើងវិញ នៅពេលណា? ហើយមានការចាប់អារម្មណ៍ដូច្នេះដែរ?
ឆ្នាំ ២០១៣ គឺជាពេលដែលទីផ្សារខុនដូចាប់ផ្តើមងើបឡើងវិញពិសេសការបង្ហាញវត្តមានរបស់គម្រោង The Bridge ដែលជាការសហការរវាងអ្នកវិនិយោគក្នុងស្រុក ជាមួយក្រុមហ៊ុនមកពីប្រទេស សិង្ហបុរី។
គម្រោងដែលមានបន្ទប់ស្នាក់នៅចំនួន ៧៦៣ យូនីតនេះបានទទួលជោគជ័យយ៉ាងលឿនហួសពីការរំពឹង។ តាមរយៈភាពជោគជ័យរបស់គម្រោងនេះ វាបានទាក់ទាញអ្នកវិនិយោគថ្មីជាច្រើនឲ្យចូលមកបណ្តាក់ទុនវិនិយោគលើខុនដូ ក្នុងរាជធានីភ្នំពេញជាបន្តបន្ទាប់។ នៅពេលនោះគេឃើញមានគម្រោងអភិវឌ្ឍន៍ខុនដូជាច្រើនបានលេចឡើងពិសេសក្នុងសង្កាត់បឹងកេងកង និងទន្លេបាសាក់។
បន្តិចម្តងៗវិនិយោគិនជនជាតិចិន និងវិនិយោគិនក្នុងស្រុក បានក្លាយជាអ្នកនាំមុខគេក្នុងការវិនិយោគលើវិស័យនេះ ពិសេសចាប់ពីឆ្នាំ ២០១៥ ដែលធ្វើឲ្យចំនួនខុនដូ ក្នុងរាជធានីភ្នំពេញកើនឡើងដល់ចំនួនរាប់រយទីតាំងនាពេលបច្ចុប្បន្ន។
កត្តាអ្វីដែលជំរុញឲ្យឆ្នាំ ២០១៩ ជាឆ្នាំដែលនឹងមានខុនដូដាក់ចូលទីផ្សារច្រើនជាងពេលកន្លងមក?
មានកត្តាធំៗចំនួន ២ ដែលនឹងធ្វើឲ្យចំនួនបន្ទប់ខុនដូក្នុងឆ្នាំ ២០១៩ នេះកើនឡើងច្រើន គឺទី១ ដោយសារមានគម្រោងធំៗមួយចំនួនដូចជា Star City Time Center Sky Tree និង The Star Polaris 23 ត្រូវបញ្ចប់ការសាងសង់ក្នុងឆ្នាំនេះ និងទី២ ដោយសារគម្រោងចំនួន ១៧ ដែលត្រូវពន្យារពេលនៅឆ្នាំ ២០១៨ នឹងត្រូវបញ្ចប់នៅក្នុងឆ្នាំ ២០១៩ នេះ។
តាមការស្រាវជ្រាវក្នុងឆ្នាំ ២០១៩ នេះនឹងមានខុនដូចំនួន ៤៣ គម្រោងត្រូវបញ្ចប់ការសាងសង់ ដែលស្មើនឹងប្រមាណ ១៦ ៩៣៩ យូនីត ខណៈកាលពីឆ្នាំ ២០១៨ មានគម្រោងចំនួន ២០ បានបញ្ចប់ការសាងសង់ ស្មើនឹងជាង ៥ ០០០ យូនីត។ តាមការព្យាករ នៅដំណាច់ឆ្នាំ ២០១៩ នេះខុនដូប្រភេទប្រណីត នឹងមានចំណែកទីផ្សារ ២៣ ភាគរយ ប្រភេទតម្លៃមធ្យម មាន ៤៣ភាគរយ និងប្រភេទតម្លៃទាប មាន ៣៤ ភាគរយ។
តើអ្នកស្រីគិតថា ការអភិវឌ្ឍខុនដូនៅកម្ពុជានឹងមានការប្រែប្រួលយ៉ាងណាដែរក្នុងរយៈពេល ៥ ឆ្នាំខាងមុខ?
ដោយសារពេលនេះខុនដូតម្លៃទាប នៅមានចំនួនតិច ស្របពេលរបៀបនៃការរស់នៅរបស់ប្រជាជនខ្មែរទាក់ទងនឹងការរស់នៅខុនដូចាប់ផ្តើមផ្លាស់ប្តូរនោះ ខ្ញុំគិតថា ទីផ្សារខុនដូដែលមានតម្លៃទាប នឹងមានភាពល្អប្រសើរ។ ការវិនិយោគលើខុនដូតម្លៃទាប នឹងអាចងាយស្រួលលក់ ជាងខុនដូប្រភេទមធ្យម និងប្រណីត។
ប្រជាជនខ្មែរកាន់តែច្រើន នឹងចាប់អារម្មណ៍ចំពោះការទិញខុនដូក្នុងក្រុង ព្រោះការរស់នៅខុនដូមានភាពងាយស្រួល មានសុវត្ថិភាព ពិសេសមិនសូវរងផលប៉ះពាល់ពីការស្ទះចរាចណ៍។
បច្ចុប្បន្នខុនដូតម្លៃទាបក្នុងរាជធានីភ្នំពេញ មានតម្លៃចន្លោះពី ៨០០ ទៅ ២ ០០០ ដុល្លារក្នុង ១ ម៉ែត្រការ៉េ ប្រភេទតម្លៃសមរម្យ មានតម្លៃចាប់ពី ២ ០០០ ដល់ ២ ៨០០ ដុល្លារ និងប្រភេទប្រណីត មានតម្លៃចាប់ពី ២ ៨០០ ដុល្លារឡើងទៅ។
ដូច្នេះតើអ្នកដែលចង់វិនិយោគលើការសាងសង់ខុនដូ ត្រូវធ្វើដូចម្តេចដើម្បីឆ្លើយតបតាមតម្រូវការទីផ្សារ?
អ្នកអភិវឌ្ឍន៍ខុនដូគួរតែផ្តោតលើអតិថិជនខ្មែរ។ ដោយសារអតិថិជនខ្មែរផ្តោតលើកត្តាចំណតឡាន ទីតាំង និងតម្លៃជាចម្បង ដូច្នេះគម្រោងដែលមានចំណតគ្រប់គ្រាន់ តម្លៃសមរម្យនឹងងាយទទួលជោគជ័យ។
បច្ចុប្បន្ននេះចំណតរថយន្ត កំពុងក្លាយជាបញ្ហានោះ ដូច្នេះជាទស្សនៈរបស់ខ្ញុំ គឺគម្រោងនីមួយៗគួរមានចំណតយ៉ាងតិចចន្លោះពី ៧០ ទៅ ៨០ ភាគរយ។ ម៉្យាងទៀត ពេលនេះក៏ជាឱកាសសម្រាប់អ្នកដែលចង់វិនិយោគលើចំណតផងដែរ៕LA