ភ្នំពេញ៖ លោកស្រី ជា សិរី ជំនួយការលោកទេសាភិបាលនៅធនាគារជាតិនៃកម្ពុជា (NBC) បានឱ្យដឹងថា កម្ពុជានៅតែប្រឈមនឹងបញ្ហាមួយចំនួនទាក់ទងនឹងការអភិវឌ្ឍការទូទាត់ និងសេវាឌីជីថលដែលតម្រូវឱ្យមានការសហការពីដៃគូអភិវឌ្ឍន៍នានា ក្រុមហ៊ុនឧស្សាហកម្ម និងភាគីពាក់ព័ន្ធ ដើម្បីចូលរួមប្រកៀកស្មាគ្នា ដើម្បីឆ្ពោះទៅពិភពឌីជីថល។
លោកស្រី ជា សិរី បន្តថា ក្នុងអំឡុងពេលក្រៅជំនួបនៃកិច្ចប្រជុំតាមវីដេអូស្ដីពី «ការគ្រប់គ្រងបច្ចេកវិទ្យាសម្រាប់ការស្ទុះងើបឡើងវិញ ក្រោយការរីករាលដាលជំងឺកូវីដ ១៩ និងភាពធន់» នៅក្នុងសន្និសីទស្តីអំពីការអភិវឌ្ឍតំបន់អាស៊ីអាគ្នេយ៍នៃធនាគារអភិវឌ្ឍន៍អាស៊ី (ADB) កាលពីរសៀលថ្ងៃទី ១៧ ខែមីនា ថា សេវា និងការទូទាត់ឌីជីថលរបស់ប្រទេសកម្ពុជា នៅមានបញ្ហាប្រឈមមួយចំនួន ដូចជាការដាក់បញ្ចូលអតិថិជនថ្មីៗទៅក្នុងពិភពការទូទាត់បែបឌីជីថលនៅលើកម្មវិធីឌីជីថល «KYC» ដែលនិយតករកំពុងរៀបចំផែនការក្នុងការធ្វើឱ្យមានភាពងាយស្រួល។
លោកស្រីថ្លែងថា៖ «កាលពីឆ្នាំមុន ធនាគារជាតិនៃកម្ពុជាបានជួបជាមួយបណ្តាប្រតិបត្តិករក្នុងឧស្សាហកម្ម នេះហើយ យើងបានយល់ព្រមថា យើងចាំបាច់ត្រូវធ្វើឱ្យមានភាពងាយស្រួលទៅលើកម្មវិធី KYC របស់យើង ដូច្នេះប្រជាជនយើងនឹងមិនមានបញ្ហាក្នុងការចូលប្រើប្រាស់ឡើយ។ ប៉ុន្តែជាមួយគ្នានេះ ធនាគារជាតិក៏កំពុងធ្វើការងារជាមួយអាជ្ញាធរពាក់ព័ន្ធ ដើម្បីបង្កើនល្បឿនកម្មវិធី KYC ឌីជីថលនេះ»។
លោកស្រីបានបន្តថា ចំពោះឧបសគ្គទី២ គឺការដាក់បញ្ចូលអ្នកផ្គត់ផ្គង់ថ្មីនៃកម្មវិធីពាណិជ្ជកម្មអេឡិចត្រូនិក ដែលភាគច្រើនដោយសារតែកង្វះអក្ខរកម្មឌីជីថល និងផ្លេតហ្វមរបស់វា។
លោកស្រីបញ្ជាក់៖ «ក្រសួងពាណិជ្ជកម្មបានចេញប្រភេទនៃការតាមដានរហ័ស និងច្បាប់ពាណិជ្ជកម្មអេឡិចត្រូនិក ដោយសង្ឃឹមថា វានឹងផ្ដល់ការបញ្ជាក់បន្ថែមទៀតលើតួនាទី និងទំនួលខុសត្រូវរបស់អ្នកអនុវត្តនីមួយៗ ក្នុងគោលបំណង ដើម្បីលើកកម្ពស់ទំនុកចិត្តជាមួយប្រព័ន្ធអេកូស៊ីស្ដែម។ អ្វីដែលយើងបានអង្កេតនោះគឺថា នៅពេលប្រជាជនដាក់បញ្ចូលទៅក្នុងកម្មវិធីពាណិជ្ជកម្មអេឡិចត្រូនិក ការទូទាត់គឺនៅតែផ្ដល់ជូនដោយផ្ទាល់ វាក៏អាចរារាំងដល់ឌីជីថលទាំងមូល»។
ទន្ទឹមនឹងនេះ សម្រាប់ឧបសគ្គទី៣ ដែល NBC អង្កេតឃើញ គឺទាក់ទិនទៅនឹងតម្លៃសមរម្យ និងហេដ្ឋារចនាសម្ព័ន្ធ ICT និងការផ្គត់ផ្គង់អគ្គិសនីប្រកបដោយនិរន្តរភាពដែលប្រទេសកម្ពុជា បានធ្វើឱ្យមានការរីកចម្រើនយ៉ាងខ្លាំងដោយមានប្រជាជនជាង ៩០ ភាគរយ មានអគ្គិសនីប្រើប្រាស់។
លោកស្រី សិរី បញ្ជាក់៖ «ទាក់ទងនឹងចំណែកទីផ្សារអ៊ីនធឺណិត យើងមានប្រហែល ៥៨ ភាគរយ នៃប្រជាជនមានលទ្ធភាពប្រើប្រាស់អ៊ីនធឺណិត ប៉ុន្តែបញ្ហាមួយដែលខ្ញុំកត់សម្គាល់ឃើញផងដែរ គឺសេវាអ៊ីនធឺណិតរបស់យើងគឺ ប្រហែលជាស្ថិតក្នុងចំណោមប្រទេសដែលមានតម្លៃទាបបំផុតនៅលើពិភពលោក»។
លោកស្រីបន្ត៖ «ហើយអ្វីដែលគួរឱ្យចាប់អារម្មណ៍នោះ បើយោងតាមការស្រាវជ្រាវរបស់យើងលើការទូទាត់ឌីជីថល ប្រជាជនជាច្រើនមិនមានលទ្ធភាពក្នុងការប្រើប្រាស់ទូរស័ព្ទស្មាតហ្វូននោះទេ។ វាពិតជារឿងគួរឱ្យចង់អស់សំណើចក្នុងន័យនេះ ដែលយើងជំរុញអ្វីៗគ្រប់យ៉ាងទៅរក «ឌីជីថល» ប៉ុន្តែយើងភ្លេចអំពីអត្ថន័យជាមូលដ្ឋាន ចំពោះលទ្ធភាពទទួលបានការប្រើប្រាស់ពិភពឌីជីថល ដែលទូរស័ព្ទស្មាតហ្វូនជាឧបករណ៍ចាំបាច់។ យើងសង្ឃឹមថា ថ្ងៃអនាគតនឹងមានទូរស័ព្ទស្មាតហ្វូនមានតម្លៃទាបកាន់តែច្រើនលើទីផ្សារ ដូច្នេះប្រជាជនអាចមានលទ្ធភាពប្រើប្រាស់វា»។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដាបានប្រាប់ ភ្នំពេញ ប៉ុស្ដិ៍ថា គ្រឹះស្ថានរបស់យើងបាននាំមុខការផ្លាស់ប្តូរទៅជាឌីជីថលជាមួយការចាប់ផ្ដើមដំបូងនៃ ACLEDA Unity កាលពីខែកក្កដា ឆ្នាំ ២០១០ ហើយនៅតែនាំមុខក្នុងការបន្តអភិវឌ្ឍកម្មវិធីអេស៊ីលីដាទាន់ចិត្ត ដែលបានដាក់ឱ្យដំណើរការកាលពីឆ្នាំ ២០១៧។
លោក ចាន់នី ថ្លែងថា៖ «ខ្ញុំគិតថា ពាក្យឌីជីថល មានន័យថា នឹងគាំទ្របរិយាប័ន្នហិរញ្ញវត្ថុកាន់តែខ្លាំងឡើង ហើយគ្រប់គ្នាសុទ្ធតែទទួលបានសេវាហិរញ្ញវត្ថុ»។
លោក សាយ សូនី អនុប្រធានមីក្រូហិរញ្ញវត្ថុប្រាសាក់ បានអះអាងថា លោកបានជូនដំណឹងដល់អតិថិជនឱ្យប្រើប្រាស់សេវាឌីជីថលក្នុងពេលវិបត្តិសុខភាពដោយគិតត្រឹមថ្ងៃទី ១០ ខែមីនា កន្លងទៅនេះ ប្រាសាក់មានប្រតិបត្តិការតាមអ៊ីនធឺណិត និងធនាគារចល័តជាង ១ លានដង ជាមួយប្រាក់ជាង ៣៨ លានដុល្លារ។
លោកបន្តថា៖ «យើងកំពុងព្យាយាមជូនដំណឹងដល់អតិថិជនឱ្យប្រើប្រាស់ធនាគារចល័ត ឬធនាគារអ៊ីនធឺណិត ដើម្បីកាត់បន្ថយហានិភ័យនៃប្រតិបត្តិការសាច់ប្រាក់សុទ្ធ»។
គិតត្រឹមថ្ងៃទី ៣១ ខែធ្នូ ឆ្នាំមុន កម្ពុជាមានធនាគារពាណិជ្ជចំនួន ៤៧ ដោយក្នុងនោះ រួមមានធនាគារក្នុងស្រុក ១៧ ធនាគារបុត្រសម្ព័ន្ធ ១៧ និងធនាគារសាខាបរទេស ១៣។ នេះបើយោងតាម NBC៕LA