ភ្នំពេញៈ សហគ្រាសផលិតឱសថ PPM គឺជាក្រុមហ៊ុនផលិតឱសថនៅក្នុងស្រុករបស់កម្ពុជាតែមួយគត់ដែលបានដំណើរការជាផ្លូវការតាំងពីឆ្នាំ ១៩៩៦។ ក្នុងរយៈពេលជិត ២៣ ឆ្នាំមកនេះ ក្រុមហ៊ុនបានចូលរួមចំណែកយ៉ាងធំក្នុងឧស្សាហកម្មឱសថកម្ពុជាទាំងការអភិវឌ្ឍសង្គម និងសេដ្ឋកិច្ច។
អ្នកយកព័ត៌មានកាសែតភ្នំពេញប៉ុស្តិ៍ លោកស្រី ចេង សុខហ័ង បានជួបសម្ភាស លោក ហៃ លីអ៊ាង ជាអគ្គនាយករបស់សហគ្រាស PPM ដើម្បីចង់ដឹងពីបទពិសោធនៃការផលិតឱសថ និងទីផ្សារលក់ឱសថនៅប្រទេស កម្ពុជា ថា តើឧស្សាហកម្មនេះអាចជាសក្តានុពលចូលរួមចំណែកអភិវឌ្ឍសេដ្ឋកិច្ចជាតិ និងសង្គមកម្ពុជាកម្រិតណា?
តើសហគ្រាសផលិតឱសថ PPM ចាប់ដំណើរការឡើងយ៉ាងដូចម្តេចនៅប្រទេស កម្ពុជា?
បន្ទាប់ពីត្រូវបានបង្កើតឡើងកាលពីសម័យសង្គមរាស្ត្រនិយម សហគ្រាសផលិតឱសថ PPM បានចាប់ផ្តើមចុះបញ្ជីជាថ្មីម្ដងទៀតជាផ្លូវការនៅក្នុងឆ្នាំ ១៩៩៦ សម្រាប់ទីផ្សារលក់ឱសថ ដោយមានការគាំទ្រពីអតីតព្រះមហាក្សត្រ និងនាយករដ្ឋមន្ត្រី ហ៊ុន សែន។ សហគ្រាសផលិតឱសថ PPM ជាក្រុមហ៊ុនផលិតឱសថកម្ពុជាដំបូងគេ បង្កើតឡើងដោយឱសថបណ្ឌិត កុក សុខគីម។ លោកបានរកឃើញឱសថបំបាត់ការឈឺចុកចាប់ ដែលមានឈ្មោះថា ឱសថ «គីណាល់» ដែលជាឱសថដំបូងគេផលិតនៅកម្ពុជា បន្ទាប់ពីប្រទេសទទួលបានឯករាជ្យពេញលេញ។
ឱសថ គីណាល់ ត្រូវបានបងើ្កតឡើង ៤ ឆ្នាំមុនឱសថដ៏ល្បីរបស់ប្រទេស បារាំង Doliprane។ សហគ្រាសផលិតឱសថ PPM បានដំណើរការតាំងពីសម័យសង្គមមកម្ល៉េះ ដែលកាលនោះប្រទេសយើងមានសហគ្រាសផលិតឱសថប្រហែល ២៧ តែត្រូវបានបំផ្លិចបំផ្លាញនៅសម័យប៉ុល ពត។ ក្រោយមកនៅឆ្នាំ ១៩៨៣-៨៤ យើងក៏ចាប់ផ្តើមឡើងវិញដោយប្រទេសយើងមានការខ្វះខាតឱសថ។ ដំបូងការផ្គត់ផ្គង់ឱសថរបស់យើងបានត្រឹមតែនាំចូល ហើយការផ្គត់ផ្គង់នៅមានកម្រិត ហើយពុំមានទីផ្សារឱសថសេរីនោះទេ យើងអាចចូលរួមត្រឹមតែជាលក្ខណៈមនុស្សធម៌តែប៉ុណ្ណោះ។
តើសហគ្រាសផលិតឱសថ PPM មានការវិវឌ្ឍយ៉ាងណានៅទីផ្សារឱសថនៅកម្ពុជាបច្ចុប្បន្ន?
តម្រូវការឱសថនៅកម្ពុជាមានច្រើន ហើយយើងអាចផលិតឱសថរបស់យើងបានរហូតដល់ ១០០ ប្រភេទសម្រាប់ផ្គត់ផ្គង់លើទីផ្សារ។ ដោយសារមានតម្រូវការកើនឡើងពីមួយឆ្នាំទៅមួយឆ្នាំ ផលិតកម្មឱសថរបស់យើងក៏មានការកើនឡើងដែរ។ យើងមានបុគ្គលិក ៣០ នាក់តាំងពីដំណើរការដំបូងរហូតដល់បច្ចុប្បន្ន នេះមានរហូតដល់ ៤០០ នាក់ដើម្បីបំពេញតម្រូវការ និងការផ្គត់ផ្គង់ទីផ្សារ។
តើលោកយល់យ៉ាងណាចំពោះការគាំទ្រផលិតផលឱសថខ្មែរ?
ផលិតផលឱសថរបស់យើងមានការទទួលស្គាល់គុណភាព និងប្រសិទ្ធភាព រហូតឈានទៅដល់ការនាំចេញ ៥០ ប្រភេទទៅកាន់ប្រទេស ឡាវ មីយ៉ាន់ម៉ា វៀតណាម និងតំបន់អាហ្រ្វិក ដែលជាប្រទេសប្រើភាសាបារាំង។ រាល់ផលិតផលរបស់យើងមានការត្រួតពិនិត្យតាំងពីចំណុចចាប់ផ្តើមផលិតរហូតទៅដល់ដៃអ្នកប្រើប្រាស់ គឺយើងតែងតាមដាន និងត្រួតពិនិត្យពីគុណភាព និងប្រសិទ្ធភាពនៅកន្លែងផលិតកម្ម និងទីផ្សារ។ រាល់ផលិតផលឱសថនីមួយៗ ត្រូវមានការសុំអាជ្ញាប័ណ្ណ ការត្រួតពិនិត្យយ៉ាងហ្មត់ចត់ពីក្រសួងសុខាភិបាល មុននឹងចេញលក់ទៅទីផ្សារ។ ដោយសារគុណភាព និងប្រសិទ្ធភាព ទើបធ្វើឲ្យផលិតផលឱសថរបស់យើងឈានទៅដល់ទីផ្សារអន្តរជាតិនាពេលបច្ចុប្បន្ន។
តើលោកយល់យ៉ាងណាដែរចំពោះចរាចរណ៍ឱសថក្លែងក្លាយនៅក្នុងប្រទេស កម្ពុជា បច្ចុប្បន្ន?
ចំពោះចរាចរណ៍ឱសថក្លែងក្លាយ និងការហូរចូលឱសថដោយសេរី ជាកត្តាប្រឈម និងហានិភ័យចំពោះអ្នកប្រើប្រាស់។ មានឱសថរាប់ពាន់ប្រភេទ ដែលមានលក់លើទីផ្សារ និងតាម Online ដែលយើងពុំដឹងពីប្រវត្តិ និង ប្រភពនៃការផលិត ការត្រួតពិនិត្យពីគុណភាព ប្រសិទ្ធភាព និងសុវត្ថិភាពរបស់ឱសថនោះទេ។
យើងពុំដឹងថា តើមានការសុំច្បាប់អនុញ្ញាតដែរឬទេ? ទាំងនេះគឺជាការព្រួយបារម្ភ និងហានិភ័យចំពោះអ្នក ប្រើប្រាស់។ មិនតែប៉ុណ្ណោះ យើងឃើញរហូតដល់មានការផ្សព្វផ្សាយតាមរយៈ Facebook និងវិទ្យុអំពីការព្យាបាលជំងឺគ្រប់ប្រភេទ និងជំងឺមហារីកទៀតផង។ នេះគឺហួសពីក្រមសីលធម៌ហើយជាឃាតករដែលធ្វើឲ្យប៉ះពាល់ដល់អាយុជីវិតរបស់អ្នកជំងឺ។ ក្នុងនាមយើងជាអ្នកផលិតឱសថ ការហូរចូលក្នុងទីផ្សារឱសថដោយសេរី និងចរាចរណ៍ឱសថក្លែងក្លាយ ពិតជាប៉ះពាល់ដល់ទីផ្សារ ផលិតកម្ម និងកេរ្តិ៍ឈ្មោះរបស់យើង អ្នកប្រើប្រាស់អាចយល់ច្រឡំ និងបាត់ជំនឿដល់ប្រសិទ្ធភាពថ្នាំរបស់យើង។
តើរដ្ឋាភិបាល ពិសេសក្រសួងសុខាភិបាលគួរធ្វើយ៉ាងណាដើម្បីទប់ស្កាត់ឱសថក្លែងក្លាយឲ្យមានប្រសិទ្ធភាព?
ខ្ញុំយល់ថា ក្រសួងសុខាភិបាលគួរតែចាត់វិធានការឲ្យបានហ្មត់ចត់ តាមដាន និងត្រួតពិនិត្យការលក់ឱសថនៅលើទីផ្សារ និងការត្រួតពិនិត្យចំពោះការនាំចូល និងអនុវត្តទៅតាមនីតិវិធីដើម្បីធានាឲ្យបានគុណភាព ប្រសិទ្ធភាព និងសុវត្ថិភាពនៃឱសថ។ ការចាត់វិធានការទៅតាមច្បាប់ ដូចជា ការបង់ពន្ធ និងការសុំអនុញ្ញាតផ្សេងៗ និងធានាឲ្យមានការប្រកួតប្រជែង ស្មើភាពនៅលើទីផ្សារ ចំពោះផលិតករនៅក្នុងស្រុក។
តើវិស័យឱសថនៅកម្ពុជានៅមានសុក្តានុពលសម្រាប់អ្នកវិនិយោគទុន ឬទេ? ហើយតើសហគ្រាសផលិតឱសថ PPM មានការវិនិយោគប៉ុន្មានហើយចំពោះវិស័យឱសថនេះ?
រហូតមកដល់បច្ចុប្បន្ន ការវិនិយោគរបស់យើងឈានដល់ប្រមាណ ២០ លានដុល្លារហើយ។ វិស័យឱសថនៅតែមានសក្តានុពលច្រើនចំពោះវិនិយោគទុនបរទេស។ បច្ចុប្បន្ននេះយើងមានក្រុមហ៊ុនផលិតឱសថប្រហែល ៦ ទៅ ៧ ក្រុមហ៊ុន។
ដើម្បីទទួលបានការវិនិយោគ ក្រសួងសុខាភិបាលត្រូវបង្ហាញពីភាពទទួលខុសត្រូវ និងការគ្រប់គ្រងឲ្យបានត្រឹមត្រូវចំពោះទីផ្សារឱសថ។ ប្រសិនបើមានការវិនិយោគលើវិស័យឱសថ យើងនឹងទទួលបានចំណេញបន្ថែមលើផលិតផល ចំណេញផ្នែកបច្ចេកទេស និងផ្តល់ការងារដល់ប្រជាជនរបស់យើងទៀតផង។ នេះជាផលចំណេញដ៏ធំសម្រាប់សេដ្ឋកិច្ចជាតិ៕ LA