The Phnom Penh Post Search

Search form




Logo of Phnom Penh Post newspaper Phnom Penh Post - ការ​ទារ​សំណង​កើន​ឡើង ១៦៧ ភាគរយ

ការ​ទារ​សំណង​កើន​ឡើង ១៦៧ ភាគរយ

ការ​ទារ​សំណង​កើន​ឡើង ១៦៧ ភាគរយ

131114_11
ទិដ្ឋភាពនៃគ្រោះថ្នាក់ចរាចរណ៍នៅតាមដងផ្លូវ ក្រុមហ៊ុនធានារ៉ាប់រងប្រឈមនឹងការបង់សំណងដោយគ្រោះថ្នាក់ចរាចរណ៍កើនឡើងខ្ពស់ ហេង ជីវ័ន

ភ្នំពេញៈ ដោយ​សារ​គ្រោះ​ទឹក​ជំនន់ និង​កំណើន​នៃ​គ្រោះថ្នាក់​ចរាចរណ៍ ការ​ទាមទារ​សំណង​ពី​ក្រុមហ៊ុន​ធានា​រ៉ាប់រង​ទាំង ៦ នៅ កម្ពុជា បាន​កើន​ឡើង​ដល់ ១៦៧ ភាគរយ​ក្នុង​រយៈ​ពេល ៩ ខែ​ឆ្នាំ​នេះ​បើ​ប្រៀប​ធៀប​រយៈ​ពេល​ដូច​គ្នា​កាល​ពី​ឆ្នាំ​ទៅ។ នេះ​បើ​តាម​តួ​លេខ​ចេញ​ដោយ សមាគម​ធានា​រ៉ាប់រង​ទូទៅ​កម្ពុជា (GIAC) ចេញ​ផ្សាយ​កាល​ពី​ម្សិលមិញ។

ការ​ទាមទារ​សំណង​នេះ​មាន​ចំនួន​ទឹក​ប្រាក់​សរុប ៨,៥ លាន​ដុល្លារ។ វិស័យ​ដែល​ទទួល​បាន​ការ​ទាមទារ​សំណង​ច្រើន​ជាង​គេ​នោះ គឺ​វិស័យ​សាង​សង់ ដែល​រួម​មាន អចលន​ទ្រព្យ ប្រព័ន្ធ​ធារាសាស្រ្ត និង​ការ​កសាង​ផ្លូវ​ជាដើម។ ទិន្នន័យ​បង្ហាញ​ថា ការ​ធានា​រ៉ាបរង ផ្នែក​ម៉ូតូ ដែល​បញ្ជូល​យានយន្ត គ្រប់​ប្រភេទ ទទួល​ការ​ទាម​ទារ​សំណង​រហូត​ដល់ ១,៩៥ លាន​ដុល្លារ​បាន​កើន​ឡើង ១៨៧,៧ ភាគរយ​បើ​ប្រៀប​ធៀប​ក្នុង​ឆ្នាំ​មុន។ ការ​ធានា​រ៉ាប់​រង​សុខភាព​បាន​កើន​ដល់ ១៣,៧ ភាគរយ​ស្មើ​នឹង ១,៨៧ លាន​ដុល្លារ។

ក្នុង​ចំនួន​នេះ ការ​ចំណាយ​របស់​ក្រុមហ៊ុន​ធានា​រ៉ាប់រង Forte បាន​កើន​ដល់​ជាង ២ លាន​ដុល្លារ​គិត​ត្រឹម​ខែ តុលា។

លោក យក់ ចំរើនរិទ្ធិ អគ្គ​នាយក​ក្រុមហ៊ុន​ធានា​រ៉ាបរង Forte បាន​ឲ្យ​ដឹង​កាល​ពី​ម្សិលមិញ​ថា៖ «ការ​ទាមទារ​សំណង​បាន​កើត​មាន​ច្រើន​អំឡុង​ពេល​ទឹក​ជំនន់​ទន្លេ​មេគង្គ និង​ទឹក​ជំនន់​ដោយ​ទឹក​ភ្លៀង»។

ក្រុមហ៊ុន​ធានា​រ៉ាប់រង Infinity ដោយ​មាន​អតិថិជន ផ្តោត​នៅ​តែ​ខេត្ត សៀមរាប និង ភ្នំពេញ ទទួល​បាន​ករណី​ទាមទារ​សំណង​ច្រើន​លើ​ផ្នែក​ម៉ូតូ និង​សុខភាព។

លោក David Carter នាយក​ប្រតិបត្តិ​ក្រុមហ៊ុន​ធានា​រ៉ាប់រង Infinity បាន​ប្រាប់​ឲ្យ​ដឹង​ថា៖ «ដោយ​សារ​តែ​តម្លៃ​នៃ​ការ​ព្យាបាល​កើន​ឡើង​ហើយ​ចំនួន​យានយន្ត​ដែល​មាន​ធានា​រ៉ាប់រង​កើន​ឡើង យើង​មើល​ឃើញ​គ្រោះថ្នាក់​ចរាចរណ៍​កើន​ច្រើន»។ លោក​ថ្លែង​ថា កំណើន​ករណី​ទាមទារ​សំណង​ពី​ក្រុមហ៊ុន​ធានា​រ៉ាប់រង របស់​លោក​គឺ​មាន​តិច​ជាង​ថវិកា​ដែល​បាន​គ្រោង​ទុក​របស់​ក្រុមហ៊ុន។

លោក​អៀ ចរិយា នាយក​កម្មវិធី​សុវត្ថិភាព​ផ្លូវ​ថ្នល់​របស់ Handicap International បាន​និយាយ កាល​ពី​ម្សិលមិញ​ថា មាន​តែ​ប្រជាជន​មួយ​ចំនួន​តូច​ប៉ុណ្ណោះ​មាន​ការ​ធានា​រ៉ាប់រង​នៅ​កម្ពុជា ហើយ​ថា ក្រុមហ៊ុន​ធានា​រ៉ាប់​រង​បង្កើន​ការ​យល់​ដឹង​កាន់​តែ​ច្រើន​អំពី​ការ​ទទួល​ខុស​ត្រូវ​ក្នុង​ការ​បើកបរ។

យោង​តាម​ស្ថិតិ​របស់​នគរបាល​ចរាចរណ៍​ក្នុង​ពេល​ថ្មីៗ នៅ​ចន្លោះ​ខែ វិច្ឆិកា ឆ្នាំ ២០១២ និង​ខែ សីហា ឆ្នាំ ២០១៣ កម្ពុជា​មាន​គ្រោះថ្នាក់​រថយន្ត និង​ម៉ូតូ​ចំនួន ៣៣០៦ ករណី​មាន​មនុស្ស ១៥១៩ នាក់​ស្លាប់ ហើយ​រថយន្ត​ខូចខាត​ចំនួន ៣៣៥៨ គ្រឿង។

បច្ចុប្បន្ន​មាន​តែ​រថយន្ត​ពាណិជ្ជកម្ម​ដូចជា​រថយន្ត​ក្រុង​ប៉ុណ្ណោះ​ដែល​តម្រូវ​ឲ្យ​ទិញ​ការ​ធានា​រ៉ាប់​រង​រថយន្ត ប៉ុន្តែ​ម្ចាស់​រថយន្ត​ឯកជន​អាច​នឹង​តម្រូវ​ឲ្យ​ទិញ​ក្នុង​ពេល​ឆាប់ៗ​នៅ​ពេល​ច្បាប់​ថ្មី​ត្រូវ​បាន​អនុម័ត។

ទិន្នន័យ​របស់​សមាគម​ធានា​រ៉ាប់​រង​បង្ហាញ​ថា ប្រាក់​ចំណូល​នៅ​ក្នុង​វិស័យ​ធានា​រ៉ាប់រង​របស់​កម្ពុជា​នៅ​ក្នុង​រយៈ​ពេល ៩ខែ ដំបូង​បាន​កើន​ឡើង​ដល់ ៣១,៣៨ លាន​ដុល្លារ ដែល​កើន​ឡើង ២០ ភាគរយ​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន៕ PB

អត្ថបទគួរចាប់អារម្មណ៍