The Phnom Penh Post Search

Search form




Logo of Phnom Penh Post newspaper Phnom Penh Post - ការ​ធានា​រ៉ាប់​រង​លើ​កសិកម្ម​នឹង​មាន​ការ​រីក​ចម្រើន​ខ្លាំង

ការ​ធានា​រ៉ាប់​រង​លើ​កសិកម្ម​នឹង​មាន​ការ​រីក​ចម្រើន​ខ្លាំង

ការ​ធានា​រ៉ាប់​រង​លើ​កសិកម្ម​នឹង​មាន​ការ​រីក​ចម្រើន​ខ្លាំង

20140218_12
ការប្រមូលជ័រកៅស៊ូនៅចម្ការកៅស៊ូជប់ក្នុងខេត្តកំពង់ចាមនាពេលកន្លងមក ភ្នំំពេញ ប៉ុស្តិ៍

ភ្នំពេញៈ សេវា​ធានា​រ៉ាប់​រង «ហានិភ័យ​លើ​ដំណាំ​កសិ ឧស្សាហកម្ម» នៅ កម្ពុជា ត្រូវ​គេ​រំពឹង​ថា នឹង​ទទួល​បាន​ការ​ចាប់​អារម្មណ៍​កាន់​តែ​ខ្លាំង​ក្នុង​រយៈ​ពេល ៣ឆ្នាំ ខាង​មុខ ខណៈ​វិស័យ​នេះ​កាន់​តែ​មាន​ការ​រីក​ចម្រើន។

ធានា​រ៉ាប់រង ហ្វ័រតេ (Forte) ជា​ក្រុមហ៊ុន​ធានា​រ៉ាប់​រង​ដំបូង និង​តែ​មួយ​គត់​ដែល​កំពុង​អនុវត្ត​សេវាកម្ម​នេះ។

លោក យុគ ចំរើនរិទ្ធ ប្រធាន និង​ជា​អ្នក​ចាត់​ការ​ទូទៅ​នៃ​ក្រុមហ៊ុន​ធានា​រ៉ាប់​រង Forte បាន​ឲ្យ​ដឹង​ថា ក្រុមហ៊ុន​រំពឹង​ថា សេវាកម្ម​នេះ​នឹង​ទទួល​បាន​ការ​ចាប់​អារម្មណ៍​ច្រើន​នៅ​រង្វង់ ៣ ទៅ ៥ ឆ្នាំ​ខាង​មុខ​នេះ។

លោក​បន្ត​ថា កសិករ​ដាំ​ដុះ​ជា​គ្រួសារ និង​សហគ្រាស​ធំៗ​ជា​អ្នក​ដែល​គួរ​តែ​ទិញ​សេវាកម្ម​ធានា​រ៉ាប់​រង «ហានិភ័យ​លើ​ដំណាំ​កសិ ឧស្សាហកម្ម» នេះ។ លោក​បាន​ថ្លែង​ថា ក្រុមហ៊ុន​សេវាកម្ម​ធានា​រ៉ាប់​រង​នេះ​នឹង​ផ្តល់​ស្ថិរភាព​ហិរញ្ញវត្ថុ​ដល់​អតិថិជន​ពី​ហានិភ័យ​ដែល​បង្ក​ឡើង​ដោយ​គ្រោះ​ធម្មជាតិ​និង​គ្រោះ​អគ្គិភ័យ។

លោក​បន្ត​ថា៖ «ធានា​រ៉ាប់​រង​នេះ​ផ្តល់​ប្រយោជន៍​ច្រើន។

ប្រសិន​បើ​ហេតុ​ការណ៍​កើត​ឡើង​ចំពោះ​ដើម​កៅស៊ូ​របស់​គាត់​ដូចជា​ឆេះ​អស់ ដូច​ជា ខ្យល់​ព្យុះ គាត់​ត្រូវ​ចំណាយ​លុយ​ក្នុង​ហោប៉ៅ​របស់​គាត់​ដើម្បី​ដាំ​កៅស៊ូ​ឡើង​វិញ។ អ៊ីចឹង​សេវា​ធានា​រ៉ាប់​រង​នេះ​គឺ​ធានា​ដល់​ស្ថានភាព​ហិរញ្ញវត្ថុ​របស់​គាត់​នៅ​ពេល​គ្រោះថ្នាក់​កើត​ឡើង»។

ការ​ទិញ​ធានា​រ៉ាប់​រង​នេះ​តម្រូវ​ឲ្យ​ម្ចាស់​ចម្ការ​បំពេញ​ពាក្យ​សុំ​បញ្ជាក់​ពី​ទីតាំង​អាយុ​កាល និង​ទំហំ​ដាំដុះ ដើម្បី​គន់​គូរ​ពី​ទឹក​ប្រាក់​ដែល​គាត់​ត្រូវ​បង់​ក្នុង​ការ​ដាក់​ធានា ដែល​ត្រូវ​បង់​ប្រចាំ​ឆ្នាំ។

លោក​បន្ត​ថា៖ «ការ​បង់​ថ្លៃ​លើ​ធានា​រ៉ាប់​រង​នេះ​គឺ​មាន​តម្លៃ​សមរម្យ។ វា​អាស្រ័យ​លើ​ផ្ទៃ​ដី អាយុ​កាល​នៃ​ដំណាំ និង​ទំហំ​ដាំដុះ»។ លោក​អះអាង​ថា ការ​ចេញ​សំណង​នឹង​ធ្វើ​ឡើង​ដោយ​សមស្រប។

បច្ចុប្បន្ន​ក្រុមហ៊ុន​កំពុង​ផ្តល់​សេវាកម្ម​ធានា​រ៉ាប់រង​លើ​ផលិត​ផល​កសិ-ឧស្សាហកម្ម​បី​ប្រភេទ​រួម​មាន ដំណាំ​កៅស៊ូ ដំឡូង​មី និង​ពោត។

លោក ទី អាទិត្យ អគ្គ​នាយក​រង​សមាគម​ធានា​រ៉ាប់​រង​កម្ពុជា​បាន​ឲ្យ​ដឹង​ថា នៅ​មាន​ក្រុមហ៊ុន​ធានា​រ៉ាប់​រង​មួយ​ទៀត​ដែល​កំពុង​ស្នើ​សុំ​អាជ្ញាប័ណ្ណ ពី​ក្រសួង សេដ្ឋកិច្ច ដើម្បី​ដំណើរការ សេវាកម្ម​ធានា​រ៉ាប់​រង «ហានិភ័យ​លើ​ដំណាំ​ក្នុង​ចម្ការ» នេះ។

លោក​ថ្លែង​ថា៖ «វា​ជា​ការ​ល្អ​មួយ​សម្រាប់​ទីផ្សារ​ធានា​រ៉ាប់​រង ព្រោះ​យើង​មាន​ផលិត​ផល​ថ្មី យើង​មាន​ការ​វិវត្ត ពី​មុន​មក​យើង​មិន​មាន​ទេ ហើយ​វិស័យ​កសិកម្ម​យើង​មាន​ការ​រីក​ចម្រើន​ខ្លាំង វា​ជា​ផ្នែក​មួយ​សំខាន់​នៅ​ក្នុង​វិស័យ​សេដ្ឋកិច្ច ប្រសិន​ជា​យើង​មាន​ធានា​រ៉ាប់​រង​ទៅ​លើ​វិស័យ​ហ្នឹង គឺ​វា​គាំទ្រ ជំរុញ និង​កាត់​បន្ថយ​ហានិភ័យ​ទៅ​ដល់​អ្នក​ដែល​ប្រកប​របរ​រក​ស៊ី​ផ្នែក​ចម្ការ កៅស៊ូ​ហ្នឹង»។ លោក​បង្ហាញ​សុទ្ធិដ្ឋនិយម​ចំពោះ សេវាកម្ម​ធានា​រ៉ាប់​រង​ថ្មី​នេះ។

លោក​ថ្លែង​ថា៖ «យើង​មើល​ឃើញ​សក្តានុពល​ក្នុង​ដំណាំ​កៅស៊ូ​នេះ​ច្រើន​មែន​ទែន»។

របាយ​ការណ៍​ប្រចាំ​ឆ្នាំ​របស់​ក្រសួង កសិកម្ម រុក្ខា​ប្រមាញ់ និង​នេសាទ បាន​បង្ហាញ​ថា ផ្ទៃ​ដី​ដាំ​ដុះ​កៅស៊ូ​សរុប​នៅ​កម្ពុជា​ក្នុង​ឆ្នាំ ២០១៣ បាន​កើន​ដល់ ៣២៥ ៩០៥ ហិកតា។

លោក ម៉ែន សុភ័ក្រ អគ្គ​នាយក​រង​ចម្ការ​កៅស៊ូ ជប់ យល់​ថា ការ​ទិញ​សេវាកម្ម​ធានា​រ៉ាប់​រង​ថ្មី​នេះ មិន​ទាន់​ជា​ការ​ចាំ​បាច់​នៅ​ឡើយ​ទេ ដោយ​សារ​ហានិភ័យ​ដែល​បង្ក​ឡើង​ដោយ​គ្រោះ​ធម្មជាតិ និង​អគ្គិភ័យ ចំពោះ​ដំណាំ​កៅស៊ូ​មាន​កម្រិត​តូច។

លោក​បន្ត​ថា៖ «ពាក់​ព័ន្ធ​នឹង​កត្តា​ធម្មជាតិ ស្រុក​យើង​មិន​ដែល​មាន​ខ្យល់​ព្យុះ​នោះ​ទេ ហើយ​ទឹក​ជំនន់​មាន​រាល់​ឆ្នាំ​មែន តែ​វា​មិន​ដែល​ប៉ះពាល់​ដល់​ចម្ការ​កៅស៊ូ​នោះ​ទេ ព្រោះ​យើង​នៅ​តំបន់​ខ្ពង់​រាប។ កត្តា​ទីពីរ ពាក់​ព័ន្ធ​នឹង​អគ្គិភ័យ ចម្ការ​កៅស៊ូ​ដែល​បាន​ផល​ហើយ​គឺ​មិន​អាច​ឆេះ​ទៅ​កើត​នោះ​ទេ សម្រាប់​ចម្ការ​កៅស៊ូ​ដែល​គេ​មាន​ការ​គ្រប់​គ្រង​បាន​ល្អ»។

លោក ស្រី ចន្ធី អ្នក​វិភាគ សេដ្ឋកិច្ច​ឯករាជ្យ ស្វាគមន៍​ចំពោះ​ដំណឹង​នេះ។ លោក​ថា៖ «បើ​ធ្វើ​បាន​គឺ​ល្អ។ សេវាកម្ម​ធានា​រ៉ាប់​រង​នេះ​ជួយ​ឲ្យ​ប្រជា​កសិករ​មាន​លទ្ធភាព ខ្ចី​ទុន​ពី​គ្រឹះស្ថាន​ហរិញ្ញវត្ថុ​បាន ក៏​អាច​ជួយ​បាន​ខាង​ផ្នែក​ផលិតកម្ម​ព្រោះ​កសិករ​និង​តម្រូវ​ឲ្យ​គោរព តាម​ការ​ណែនាំ និង​ការ​ប្រុង​ប្រយ័ត្ន​ចំពោះ​ហានិភ័យ​ដែល​មាន​ក្នុង​វិស័យ​កសិកម្ម ហើយ​មួយ​ទៀត ជួយ​កំណើន​សេដ្ឋកិច្ច​ក្នុង​ផ្នែក​វិស័យ​កសិកម្ម​ទាំង​មូល»។

លោក​បញ្ជាក់​ថា សេវាកម្ម​ធានា​រ៉ាប់​រង​អាច​មាន​ការ​លំបាក​ក្នុង​ការ​ទាក់​ទាញ​អតិថិជន។ លោក​បន្ត​ថា៖ «អ្នក​ធ្វើ​កម្មវិធី​នេះ​បាន​ទាល់​តែ​មាន​ព័ត៌មាន​ពី​ការ​ដាំ​ដុះ​និង​ការ​ថែរក្សា​ដំណាំ​របស់​កសិករ ដើម្បី​គ្រប់​គ្រង ហានិភ័យ​ក្នុង​អាជីវកម្ម»។

ទិន្នន័យ​ផ្លូវ​ការ បាន​ពី​សមាគម​ធានា​រ៉ាប់​រង​កម្ពុជា បង្ហាញ​ថា ប្រាក់​ចំណូល​របស់​ឧស្សាហកម្ម​នេះ​បាន​កើន​ឡើង ១៥,៧៥ ភាគរយ​គិត​មក​ត្រឹម​ខែ ធ្នូ ឆ្នាំ​មុន​ដល់​ប្រហែល ៤២ លាន​ដុល្លារ ធៀប​នឹង ៣៦ លាន​ដុល្លារ​ពី​ឆ្នាំ ២០១២៕

អត្ថបទគួរចាប់អារម្មណ៍