The Phnom Penh Post Search

Search form




Logo of Phnom Penh Post newspaper Phnom Penh Post - ការ​នាំ​ចេញ​តាម​ផែ​ព្រះ​សីហនុ​កើន​ ៤០%

ការ​នាំ​ចេញ​តាម​ផែ​ព្រះ​សីហនុ​កើន​ ៤០%

សម្លៀក​បំពាក់​​កីឡា​​របស់​ក្រុម​ហ៊ុន Adidas ត្រូវ​បាន​ផលិត​ដោយ​រោង​ចក្រ​កាត់ដេរ​សម្លៀក​បំពាក់ Grand Twin នៅកម្ពុជា​។
សម្លៀក​បំពាក់​​កីឡា​​របស់​ក្រុម​ហ៊ុន Adidas ត្រូវ​បាន​ផលិត​ដោយ​រោង​ចក្រ​កាត់ដេរ​សម្លៀក​បំពាក់ Grand Twin នៅកម្ពុជា​។ ម៉ៃ វីរៈ

ការ​នាំ​ចេញ​តាម​ផែ​ព្រះ​សីហនុ​កើន​ ៤០%

ភ្នំពេញៈ ​ទិន្នន័យ​ចុង​ក្រោយ​ពី​​កំពង់​ផែ​​បាន​បង្ហាញ​ថា​ សម្លៀក​បំពាក់​ ​វាយនភ័ណ្ឌ និង​ដំឡូងមី ជា​ផលិត​ផល​ដ៏​សំខាន់​របស់​កម្ពុជា​ដែល​ត្រូវ​បាន​នាំ​ចេញ​តាម​កំពង់​ផែ​ស្វយ័ត​​ក្រុង​​ព្រះ​សីហនុ នៃ​​ខេត្​ត​ព្រះ​សីហនុ។

តាម​តួ​លេខ​​ដែល​ភ្នំពេញ​ប៉ុស្ដិ៍​​ទទួល​​បាន​​កាល​ពី​ថ្ងៃ​ព្រហស្បតិ៍បាន​​បង្ហាញ​ថា ​ការ​នាំចេញ​សរុប​តាម​កំពង់​ផែនេះ​បាន​កើន​ឡើង​ប្រមាណ ៤០ ​ភាគ​រយ​នៅ​ឆមាស​ទី​១ បើ​ធៀប​រយៈ​ពេល​ដូច​គ្នា​កាល​ពី​ឆ្នាំ​ទៅ​។

ទិន្ន​ន័យ​​នេះ​បាន​បង្ហាញ​ថា​​ទំហំ​នៃ​ការ​នាំ​ចេញ​សម្លៀក​បំពាក់​​គិត​ជា​កុង​តឺន័រ​បាន​កើន​ឡើង​ជាង​​២៦​ភាគរយ​ ដំឡូង​មី​កើន​ឡើង​​យ៉ាង​ខ្លាំង​ជាង​​ ២០០ ​ភាគរយ ​ខណៈ​​ការ​នាំចេញ​អង្ករ​កើន​ឡើង​តែ​ ២ ​ភាគរយ​ប៉ុណ្ណោះ​។​

លោក​ ជា​ សម្បតិ្ត​ ប្រធាន​ផ្នែក​ផែន​​​ការ​ និង​ទី​ផ្សារ​របស់​កំពង់​ផែ​នេះ​​ថ្លែង​ថា ​​កំពង់​ផែ​ទទួល​​បាន​កំណើន​ខ្លាំង​ខាង​​សម្លៀក​បំពាក់​ និង​​ផលិត​​ផល​កសិកម្ម​សំខាន់ៗ​​ក្នុង​រយៈពេល​នេះ​ដោយ​សារ​​សកម្ម​ភាព​​សេដ្ឋ​កិច្ច​មាន​លក្ខណៈ​ល្អ​ប្រសើរ ហើយ​ស្ថិរ​​ភាព​នយោបាយ​ជា​កត្តា​នៅ​ពី​ក្រោយ​។​​

លោកបន្ត​ថា៖ «ពិត​ហើយ​យើង​​ពិតជា​បាន​កត់​សម្គាល់​ឃើញ​​ថា ​យើង​ទទួល​បាន​ការ​កើន​ឡើង​ច្រើន​ណាស់​នៅ​ក្នុង​ការ​នាំ​ចេញ​ដំឡូង​​មី​នៅ​ក្នុង​អំឡុង​​ពេល​នេះ​ដោយ​សារ​យើង​​មិន​បាន​នាំ​ចេញ​ច្រើន​​កាល​ពី​ពេល​មុន​ ​ហើយ​ទំហំ​​កុង​តឺន័រ​សម្លៀក​បំពាក់​ក៏​បាន​កើន​ឡើង​​ច្រើន​ផង​ដែរ​។ នេះ​មាន​ន័យ​ថា​ ទោះ​បី​យើង​មាន​ការ​ធ្វើ​បាតុ​កម្ម​មួយ​ចំនួន​នៅ​ក្នុង​វិស័យ​នេះ​ ក៏​ការ​ផលិត​របស់​ពួក​គេ​នៅ​តែ​កំពុង​ដំណើរ​ការ​»។

លោក​បន្ថែម​ថា ​ដំឡូង​ភាគ​ច្រើន​ត្រូវ​បាន​​នាំ​ចេញ​ទៅ​កាន់​ប្រទេស​ចិន។​ ​លោក​សម្បត្តិ​ ​ថ្លែង​​ផង​ដែរ​ថា​ ការ​កើន​ឡើង​នៅ​ក្នុង​ការ​ដឹកជញ្ជូន​ខាង​ផ្លូវ​ដែក​ទៅ​កាន់​កំពង់​ផែ​ ​នៅ​ពេល​នេះ​​កំពុង​ដើរ​តួនាទី​ដ៏​សំខាន់​ចំពោះ​កំណើន​នៃ​ការ​នាំ​ចេញ​ទំនិញ​តាម​រយៈ​កំពង់​ផែ​នេះ​។​

យោង​តាម​ទិន្ន​ន័យ​ចេញ​ផ្សាយ​ដោយ​ក្រសួង​ឧស្សាហកម្ម​ និង​សិប្ប​កម្ម​ ចំនួន​រោង​ចក្រ​កាត់​ដេរ​​ដែល​បាន​ចុះ​បញ្ជី​​ក្នុង​ប្រទេស​កម្ពុជា​​ បាន​កើន​ដល់​ ១ ២០០​ នៅ​ចុង​ខែ​​មិថុនា ​កើន​ឡើង​​​៨​ភាគ​រយ​ក្នុង​រយៈ​ពេល​៦​ខែ​​​កន្លង​មក។

របាយ​ការ​ណ៍​នេះ​​បាន​​បង្ហាញ​ថា ​​វិស័យ​កាត់​ដេរ​​បាន​​ផ្ដល់​ការងារ​ដល់​កម្ម​ករ​ចំនួន​ ៧៣៣ ៣០០ នាក់​​គិត​ត្រឹម​​ចុង​ខែ​​មុន កើន​ឡើង​​ពី​៦៧៧ ​៦០០​នាក់ គិត​ត្រឹម​ចុង​ឆ្នាំ​​២០១៣។

ប៉ុន្តែ​លោក​ ខេន​ លូ​​ អគ្គ​លេខា​​ធិការ​​សមា​គម​រោង​ចក្រ​កាត់​ដេរ​​នៅ​​កម្ពុជា​​បាន​ថ្លែង​​កាល​ពីថ្ងៃ​​ព្រហស្បត៍​ថា​ខណៈ​​​នៅ​តែ​មាន​ការ​ចាប់​អារម្មណ៍​​នៅ​ក្នុង​វិស័យ​នេះ​ តួ​លេខ​នេះ​មាន​តែ​​ការ​ចុះ​បញ្ជី​ប៉ុណ្ណោះ ​ហើយ​ម្ចាស់​រោង​ចក្រ​ជា​ច្រើន​​នៅតែ​​មាន​ការ​ប្រុង​ប្រ​យ័ត្ន​ក្នុង​ការ​វិនិ​យោគ​បន្ទាប់​ពី​ការ​តវ៉ា​ប្រឆាំង​កាល​ពី​ខែ​មករា​។

លោក​ថ្លែង​​ថា​៖ «​សម្រាប់​សមា​ជិក​ភាព​របស់​យើង​ ​វា​បាន​កើន​ឡើង​ពិត​ប្រាកដ​ ពី​មួយ​ឆ្នាំ​ទៅ​មួយ​ឆ្នាំ​ ប៉ុន្តែ​​អត្រា​នៃ​ការ​កើន​ឡើង​គឺ​មាន​កម្រិត​កាន់​តែ​ទាប​បើ​អ្នក​​ប្រៀប​ធៀប​នៅ​ឆ្នាំ​នេះ​ជាមួយ​ឆ្នាំ​មុន»។

លោក ​ឈឹម​ វិជ្ជរ៉ា ​ប្រធាន​មន្ទីរ​កសិកម្ម​ខេត្ត​បាត់​ដំបង​ដែល​ជា​តំបន់​ដាំ​ដុះ​ដំឡូង​មី​សំខាន់​ជាង​គេ​បា​នឲ្យ​ដឹង​ថា​​ឆ្នាំ​នេះ​កសិករ​នៅ​ទី​នេះ​ផលិត​បាន​ដំឡូង​មី​សរុប​ជិត ២ លាន​តោន​ប្រចាំ​ឆ្នាំ​លើ​ផ្ទៃ​ដី​ ៦០​ ០០០​ហិកតា​ ប៉ុន្តែ​លោក​ថ្លែង​ថា​​ កាល​ពីឆ្នាំ​​មុន វា​​បាន​រង​ផល​ប៉ះ​ពាល់​ដោយ​សារ​ទឹក​ជំនន់​ ប្រ​ហែល ​៣០ ០០០​តោន»។

លោក​​បន្តថា​ ដំឡូង​ចន្លោះ​ពី​ ៦០​ទៅ​​៧០​ភាគរយ​លក់​ឲ្យ​ប្រទេស​ជិត​ខាង​ ខណៈ​ពី ៣០​ទៅ ៤០ ​ភាគរយ​​លក់​ឲ្យ​ទីផ្សារ​ក្នុង​ស្រុក។

បើ​យោង​តាម​ទិន្ន​ន័យ​របស់​កំពង់ផែ​នេះ ​បាន​បង្ហាញ​ថា ការ​នាំ​ចូល​ទំនិញ​តាម​រយៈ​កំពង់​ផែ​នេះ​​កំពុង​កើន​ឡើង​ជាង​ ១០ ​ភាគរយ​ផងដែរ​ ក្នុង​រយៈ​ពេល​ឆមាស​ទី១ ​ធៀប​នឹង​រយៈពេល​ដូចគ្នា​កាល​ពីឆ្នាំ​មុន៕ PB

អត្ថបទគួរចាប់អារម្មណ៍