The Phnom Penh Post Search

Search form

Logo of Phnom Penh Post newspaper Phnom Penh Post - ការ​នាំ​ចេញ​ទៅ​អាមេរិក​កើន​០,២%




ការ​នាំ​ចេញ​ទៅ​អាមេរិក​កើន​០,២%

ការ​នាំ​ចេញ​ទៅ​អាមេរិក​កើន​០,២%

130506_11
សកម្មភាពធ្វើការនៅក្នុងរោងចក្រកាត់ដេរសម្លៀកបំពាក់មួយកន្លែងក្នុងប្រទេសកម្ពុជា សម្លៀកបំពាក់ជាទំនិញនាំចេញសំខាន់របស់កម្ពុជា ផា លីណា

ភ្នំពេញៈ ការ​នាំ​ចេញ​ទៅ​អាមេរិក​ជា​ទីផ្សារ​ធំ​ជាង​គេ​របស់​កម្ពុជា​នៅ​ត្រីមាស​ទី១ ឆ្នាំ​នេះ​គិត​ជា​ទឹក​ប្រាក់​សរុប​មាន​៦៩៥ លាន​ដុល្លារ កើន​ឡើង​០,២​ភាគរយ​បើ​ធៀប​រយៈ​ពេល​ដូច​គ្នា​កាល​ពី​ឆ្នាំ​មុន ដែល​មាន​ទឹក​ប្រាក់​សរុប ៦៩៣,៣​លាន​ដុល្លារ។ នេះ​បើ​តាម​ទិន្នន័យ​ពាណិជ្ជកម្ម​ពី​ស្ថានទូត​សហរដ្ឋ​អាមេរិក​នៅ កម្ពុជា​។

អ្នក​ជំនាញ​សេដ្ឋកិច្ច​បាន​លើក​ថា ការ​ងើប​ឡើង​វិញ​នៃ​សេដ្ឋកិច្ច​សហរដ្ឋ​អាមេរិក​ក្នុង​សន្ទុះ​យឺត​រួម​ផ្សំ​នឹង​ការ​បង្វែរ​ទិស​នៃ​ការ​នាំ​ចេញ​របស់​កម្ពុជា​ទៅ​ប្រទេស​ផ្សេងៗ​ជំនួស​ជា​មូល​ហេតុ​ធ្វើ​ឲ្យ​សន្ទុះ​នៃ​ការ​នាំ​ចេញ​ទៅ​អាមេរិក​មាន​តិច​តួច។

លោក ឌួង ពូលឡង់ អ្នក​សេដ្ឋកិច្ច​ជាន់​ខ្ពស់​ប្រចាំ​ធនាគារ អភិវឌ្ឍន៍​អាស៊ី ADB មាន​ប្រសាសន៍​ថា​៖ «​ថ្វី​ដ្បិត​តែ​សេដ្ឋកិច្ច​សហរដ្ឋ​អាមេរិក​កំពុង​ងើប​ឡើង​វិញ​តែ​វា​នៅ​មាន​ល្បឿន​យឺត​នៅ​ឡើយ។ កម្លាំង​ទិញ​របស់​អ្នក​ប្រើ​ប្រាស់​នៅ​សហរដ្ឋ​អាមេរិក​កើន​ឡើង​យឺត ធ្វើ​ឲ្យ​សន្ទុះ​នៃ​ការ​នាំ​ចេញ​របស់​កម្ពុជា​ទៅ​អាមេរិក កើន​ឡើង​ក្នុង​ល្បឿន​យឺត​ដែរ»។ លោក​បន្ត​ថា​និន្នាការណ៍​នៃ​ការ​នាំ​ចេញ​ផលិត​ផល​ទៅ​ប្រទេស​ផ្សេងៗ​ក្រៅ​ពី​អាមេរិក ដូចជា​អឺរ៉ុប ចិន និង ជប៉ុន​ជាដើម​កំពុង​មាន​ការ​កើន​ឡើង​ដែល​បាន​រួម​ចំណែក​កាត់​បន្ថយ​ការ​ពឹង​ផ្អែក​តែ​លើ​ទីផ្សារ​តែ​មួយ។

ទំនិញ​សំខាន់ៗ​ដែល​កម្ពុជា​នាំ​ចេញ​ទៅ​អាមេរិក​មាន​សម្លៀក​បំពាក់​ផលិតផល​វាយនភ័ណ្ឌ​ស្បែក​ជើង និង​អង្ករ​ជាដើម។

ទិន្នន័យ​នាំ​ចេញ​របស់​សមាគម​រោងចក្រ កាត់​ដេរ​កម្ពុជា GMAC​ឲ្យ​ដឹង​ថា ផលិត​ផល​សម្លៀក​បំពាក់​កម្ពុជា​ដែល​បាន​នាំ​ចេញ​ទៅ​ទី​ផ្សារ​អាមេរិក​នៅ​ត្រីមាស​ទី១​ឆ្នាំ​នេះ​ធ្លាក់​ចុះ​ប្រមាណ​២៧,៥​ភាគរយ គឺ​ធ្លាក់​ចុះ​ពី ៥០១ លាន​ដុល្លារ​កាល​ពី​ឆ្នាំ​២០១២ មក​ត្រឹម​៣៦៣​លាន​ដុល្លារ។

លោក ខេន លូ​អគ្គ​លេខាធិការ GMAC បាន​ប្រាប់​ភ្នំពេញ ប៉ុស្ដិ៍​កាល​ពី​ម្សិល​មិញ​ថា​៖ «ការ​បញ្ជា​ទិញ​ផលិត​ផល​កាត់​ដេរ​របស់​កម្ពុជា​ពី​សហរដ្ឋ​អាមេរិក​កំពុង​មាន​ការ​ថយ​ចុះ​ដែល​ធ្វើ​ឲ្យ​ការ​នាំ​ចេញ​ថយ​ចុះ»។

ទិន្នន័យ​ពាណិជ្ជកម្ម​ពី​ស្ថានទូត​សហរដ្ឋ​អាមេរិក​បង្ហាញ​ថា ទំហំ​ពាណិជ្ជកម្ម​ទ្វេ​ភាគី​រវាង​កម្ពុជា​និង​អាមេរិក​កើន​ឡើង​ដល់​៧៥៨,៣ លាន​ដុល្លារ​ក្នុង​ត្រី​មាស​ទីមួយ​នៅ​ឆ្នាំ​នេះ​គឺ​កើន​០,៨​ភាគរយ ធៀប​នឹង​៧៥២,៤​លាន​ដុល្លារ​ក្នុង​រយៈ​ពេល​ដូច​គ្នា​ពី​ឆ្នាំ​មុន។

ទិន្នន័យ​នាំ​ចេញ​របស់​ក្រសួង​សេដ្ឋកិច្ច និង​ហិរញ្ញវត្ថុ​កម្ពុជា​បង្ហាញ​ថា កាល​ពី​ឆ្នាំ​២០១២ កម្ពុជា​បាន​នាំ​ចេញ​ផលិត​ផល​គិត​ជា​ទឹក​ប្រាក់​សរុប​ប្រមាណ ២ ពាន់​លាន​ដុល្លារ​ទៅ​កាន់​ទី​ផ្សារ​សហរដ្ឋ​អាមេរិក ដែល​ចំនួន​នេះ មាន​ប្រហែល​៣៦ ភាគរយ​នៃ​ចំណែក​ទីផ្សារ​សរុប​របស់​ប្រទេស​។ ទំហំ​ទឹក​ប្រាក់​សរុប​ដែល​កម្ពុជា​នាំ​ទៅ​ទីផ្សារ​អន្តរជាតិ មាន​ចំនួន​៥,៥ ពាន់​លាន​ដុល្លារ។

ការ​នាំ​ចេញ​សរុប​របស់​កម្ពុជា​នៅ​ត្រីមាស​ទីមួយ​ឆ្នាំ​នេះ​បាន​សម្រេច​បាន​១,៦៥ ពាន់​លាន​ដុល្លារ​កើន​ពី​តម្លៃ​១,៣៦​ពាន់​លាន​ដុល្លារ​ពី​ត្រី​មាស​ទី​មួយ​ឆ្នាំ​មុន។ នេះ​បើ​តាម​ទិន្នន័យ​ក្រសួង​ពាណិជ្ជកម្ម​នៅ​កម្ពុជា៕

អត្ថបទគួរចាប់អារម្មណ៍