The Phnom Penh Post Search

Search form




Logo of Phnom Penh Post newspaper Phnom Penh Post - ការ​នាំ​ចេញ​ទៅ​អាមេរិក​៩​ខែ កើនឡើង​តិចតួច

ការ​នាំ​ចេញ​ទៅ​អាមេរិក​៩​ខែ កើនឡើង​តិចតួច

ការ​នាំ​ចេញ​ទៅ​អាមេរិក​៩​ខែ កើនឡើង​តិចតួច

131118_11
កម្មករកំពុងធ្វើការនៅក្នុងរោងចក្រកាត់ដេរសម្លៀកបំពាក់មួយនៅភ្នំពេញ សម្លៀកបំពាក់ជាទំនិញនាំចេញសំខាន់របស់កម្ពុជាទៅអាមេរិក ភ្នំពេញ ប៉ុស្តិ៍

ភ្នំពេញៈ ​ការ​នាំ​ចេញ​របស់​កម្ពុជា​ទៅ​អាមេរិក​ក្នុង​រយៈពេល​៩​ខែ​កើនឡើង​៣,៧​ ភាគរយ​ បើ​ធៀប​រយៈពេល​ដូចគ្នា​កាលពី​ឆ្នាំ​មុន​។ ​នេះ​បើ​តាម​តួលេខ​របស់​នាយកដ្ឋាន​ពាណិជ្ជកម្ម​អាមេរិក​។

មន្ត្រី ​និង​អ្នក​តំណាង​រោងចក្រ​ មើល​ឃើញ​ថា ​កំណើន​តិចតួច​នេះ​បណ្តាល​មកពី​កូដកម្ម​របស់​កម្មករ​ ខណៈ​សហជីព​កម្មករ​បាន​និយាយ​ថា ការ​បង្កើន​សិទ្ធិ​សេរីភាព​កម្មករ​ជា​គន្លឹះ​នាំ​ទៅ​រក​ផលិតកម្ម​កាន់​តែ​ ប្រសើរ​។

ទិន្នន័យ​បាន​បង្ហាញ​ថា ​ក្នុង​រយៈពេល​៩​ខែ​ ឆ្នាំ​នេះ ​ការ​នាំ​ចេញ​សរុប​របស់​កម្ពុជា​ទៅ​សហរដ្ឋអាមេរិក​មាន​ទំហំ​ទឹកប្រាក់ ​សរុប​ ២ ០៩២​ លាន​ដុល្លារ​ បើ​ធៀប​នឹង ២ ០១៧ ​លាន​ដុល្លារ​កាលពី​ឆ្នាំ​ទៅ​។ ការ​នាំ​ចូល​ពី​អាមេរិក​មាន​ទំហំ​ទឹកប្រាក់​១៧៣​ លាន​ដុល្លារ​ ថយ​ចុះ​ប្រមាណ​៣,៨​ភាគរយ​ធៀប​នឹង​រយៈពេល​ដូច​គ្នា​កាលពី​ឆ្នាំ​ទៅ​ដែល​ មាន​១៨០​លានដុល្លារ​។

លោក​គង់​ ពុទ្ធារ៉ា​ អ្នក​នាំពាក្យ​ក្រសួង​ពាណិជ្ជកម្ម​ មាន​ប្រសាសន៍​ថា​ ​បញ្ហា​នយោបាយ ​និង​កូដកម្ម​របស់​កម្មករ​អាច​នាំឲ្យ​អ្នក​វិនិយោគ​បង្វែរ​ទិសដៅ​ចេញ​ ពី​ប្រទេស​កម្ពុជា​ទៅ​រក​មីយ៉ាន់ម៉ា​ ​ជា​គូ​ប្រជែង​ថ្មី​របស់​កម្ពុជា​នៅក្នុង​តំបន់​។ លោក​បាន​បន្ថែម​ថា​៖ «​ខាង​រោងចក្រ​គេ​មិន​អាច​បន្ត​ខាតបង់​លើ​ថ្លៃ​ពលកម្ម​បាន​ទេ ​នៅពេល​ដែល​កម្មករ​ចំណាយ​ពេល​ធ្វើ​កូដកម្ម​។ គេ​នឹង​ចាកចេញ​ពី​ប្រទេស​កម្ពុជា ​ទៅ​ប្រទេស​មីយ៉ាន់ម៉ា»។

យ៉ាង​ហោច​ណាស់​មាន​មនុស្ស​ម្នាក់​ស្លាប់​នៅក្នុង​អំពើ​ហិង្សា​រវាង​កម្មករ​រោងចក្រ​SL និង​ប៉ូលិស ​កាលពី​សប្តាហ៍​មុន​។

មន្ត្រី ​ជាន់ខ្ពស់​នៃ​សមាគម​រោងចក្រ​កាត់ដេរ​នៅ​កម្ពុជា​(GMAC) លោក​ជាតិ​ ខេមរា​ បាន​អះអាង​ថា ​ការ​នាំ​ចេញ​ទៅ​អាមេរិក​មាន​កំណើន​តិច​បណ្តាល​មកពី ​អស្ថិរភាព​ទំនាក់ទំនង​ វិជ្ជាជីវៈ​រវាង​កម្មករ​ និង​និយោជក​ ខណៈ​អស្ថិរភាព​នយោបាយ​ក្រោយ​ការ​បោះឆ្នោត​ក៏​បាន​ជះឥទ្ធិពល​ផង​ដែរ​។ លោក​បាន​ថ្លែង​ថា៖ «ផលិតកម្ម​មាន​ការ​រំខាន​ពី​ការ​ទាមទារ​របស់​សហជីព​ បង្ក​ឲ្យ​មាន​វិវាទ​។ កម្មករ​ចំណាយ​ពេល​ធ្វើ​កូដកម្ម​ទាមទារ​ប្រាក់​ខែ​ដែល​ហួស​ពី​អ្វី​ដែល​ មាន​ចែង​ក្នុង​ច្បាប់​នាំឲ្យ​ការ​ផលិត​ធ្លាក់​ចុះ​។

ការ​នាំចេញ​ទំនិញ ​មិន​ទាន់​ពេលវេលា​ធ្វើឲ្យ ​ខាង​រោងចក្រ​ និង​អ្នក​បញ្ជា​ទិញ ​បារម្ភ​ពី​ការ​ខាតបង់​។ ឥឡូវ​អ្នក​បញ្ជា​ទិញ​ គេ​កំណត់​ការ​បញ្ជា​ ពី​យើង​។​ អស្ថិរភាព​នយោបាយ​ក៏​នាំ​ឲ្យ​អារម្មណ៍​កម្មករ​ វិនិយោ​គិន​ និង​អ្នក​បញ្ជា​ទិញ​ បារម្ភ​ និង​មាន​អារម្មណ៍​មិន​នឹង​នរ​ដែរ​។ គេ​ដក​សេចក្តី​ទុក​ចិត្ត​មួយ​ចំនួន​ពី​កម្ពុជា​ទៅ​ប្រទេស​ផ្សេងៗ​វិញ​»។

លោក​ គង់ ​អាទិត្យ អនុប្រធាន ​សម្ព័ន្ធ​សហជីព​ប្រជាធិបតេយ្យ​កម្មករ​កាត់ដេរ​កម្ពុជា បាន​ចេញ​មក​បក​ស្រាយ​ថា ​ការ​កើនឡើង​នៃ​ការ​នាំ​ចេញ​ មិន​អាស្រ័យ​ទៅលើ​កម្មករ​តែ​ម៉្យាង​នោះ​ទេ​។ លោក​បន្ត​ថា ​ការ​ផ្តល់​លក្ខខណ្ឌ​ការងារ​ សិទ្ធិ​សេរីភាព​ដល់​កម្មករ​ ប្រសើរ​ជាង​មុន​ និង​ការ​ចរចា​ពិភាក្សា​រក​ដំណោះស្រាយ​ ឈ្នះឈ្នះ​រវាង​កម្មករ​ និង​និយោជក​ជា​កត្តា​ធានា​ដល់​ផលិតកម្ម​ដែល​មាន​ប្រសិទ្ធភាព​។

អ្នក ​វិភាគ​សេដ្ឋកិច្ច​ឯករាជ្យ​មកពី​សមាគម​សេដ្ឋកិច្ច​កម្ពុជា​លោកស្រី ​ចន្ធី​ បាន​និយាយ​ថា​ ការ​កើនឡើង​ទំហំ​នាំ​ចេញ​កម្ពុជា​ទៅ​អាមេរិក​តិចតួច​ មិន​មាន​ផលប៉ះពាល់​ដល់​សេដ្ឋកិច្ច​របស់​កម្ពុជា​ធ្ងន់ធ្ងរ​នោះ​ទេ។ លោក​បន្ត​ថា​៖ «​ស្ថានភាព​មិន​សូវ​ល្អ​របស់​សេដ្ឋកិច្ច​អាមេរិក ​នា​ពេល​ថ្មីៗ​នេះ​បណ្ដាល​ឲ្យ​តម្រូវការ​សម្លៀកបំពាក់​ថយ​ចុះ​ និង​ការ​ចំណាយ​ជា​លក្ខណៈ​គ្រួសារ​ក៏​ថយ​ចុះ​ដែរ​ ដែល​កត្តា​នេះ​បាន​ជះឥទ្ធិពល​ដល់​កំណើន​តិចតួច​នៃ​ការ​នាំ​ចេញ​ទំនិញ​ ពី​កម្ពុជា​ ពីព្រោះ​អាមេរិក​គឺជា​ទីផ្សារ​នាំ​ចេញ​ធំ​មួយ​របស់​កម្ពុជា​សម្រាប់​ផលិតផល​កាត់ដេរ​ និង​ស្បែកជើង​»។

លោក​បន្ថែម​ថា​៖ «​ប៉ុន្តែ​ ជា​រួម​ការ​នាំ​ចេញ​របស់​កម្ពុជា​ទៅ​ប្រទេស​ផ្សេង​ទៀត​ដូចជា​ អឺរ៉ុប បាន​កើនឡើង​»។

យ៉ាង​ណា​ក៏​ដោយ​ លោក​លើក​ឡើង​ថា ​ចង្វាក់​ផ្គត់ផ្គង់​ពី​កម្ពុជា​អាច​បន្ថយ​ល្បឿន​ប្រសិន​បើ​បញ្ហា​ វិបត្តិ​នយោបាយ​ និង​ការ​ធ្វើ​កូដកម្ម​តវ៉ា​របស់​កម្មករ​នៅ​តែ​មិន​មាន​ដំណោះស្រាយ​។ លោក​បន្ត​ថា៖ «​ក្រុមហ៊ុន​បញ្ជា​ទិញ​ជាច្រើន​នឹង​មាន​ការ​ស្ទាក់ស្ទើរ​ក្នុង​ការ​នាំ​ចូល​ផលិតផល​ពី​កម្ពុជា​ដោយ​បារម្ភ​ថា ​ផលិតផល​នឹង​មិន​ត្រូវ​បាន​ផលិត​ឡើង​ទាន់​ពេល​ខណៈ​ការ​ធ្វើ​កូដកម្ម​ញឹកញាប់​។​ការ​ធ្វើ​កូដកម្ម​ក៏​នឹង​អាច​ធ្វើឲ្យ​ប៉ះពាល់​ដល់​កេរ្តិ៍ឈ្មោះ​ ម៉ាក​សម្លៀកបំពាក់​របស់​គេ​ផង​ដែរ​»។

អាមេរិក​ជា​ទិសដៅ​នាំ​ចេញ​ ឈាន​មុខ​គេ​របស់​កម្ពុជា​បន្ទាប់ពី​អឺរ៉ុប​។ ​ផលិតផល​សំខាន់​របស់​កម្ពុជា​ដែល​បាន​នាំ​ទៅ​លក់​នៅ​អាមរិក​គឺ​ សម្លៀកបំពាក់​និង​ស្បែកជើង​។ ​ប្រទេស​កម្ពុជា នាំ​ចូល​ពី​អាមេរិក​នូវ​រថយន្ត ​ម៉ាស៊ីន ​គ្រឿង​បរិក្ខារ​និង​ការ​ផ្គត់ផ្គង់​ថ្នាំពេទ្យ​។ ​ទំហំ​ពាណិជ្ជកម្ម​ប្រទេស​ទាំង​ពីរ​កាលពី​ឆ្នាំ​មុន​មាន​ចំនួន​សរុប​ ២,៩២​ពាន់​លាន​ដុល្លារ​ កើនឡើង​០,៧​ភាគរយ​ធៀប​នឹង​រយៈពេល​ដូច​គ្នា​កាលពី​ឆ្នាំ​មុន​។

ទិន្នន័យ​ពី​ក្រសួង​ពាណិជ្ជកម្ម​បង្ហាញ​ថា ​ការ​នាំ​ចេញ​ផលិតផល​សរុប​របស់​កម្ពុជា​មាន​តម្លៃ​៥,២​ពាន់​លាន​ដុល្លារ​ក្នុង​រយៈ​៩​ខែ​ដំបូង​នៅ​ឆ្នាំ​នេះ ​កើនឡើង​២៦​ភាគរយ ​បើ​ធៀប​៤,១​ពាន់​លាន​ដុល្លារ​ក្នុង​រយៈពេល​ដូច​គ្នា​កាលពី​ឆ្នាំ​មុន៕ PB

អត្ថបទគួរចាប់អារម្មណ៍