ភ្នំពេញៈ យោងតាមសេចក្ដីប្រកាសព័ត៌មានពីស្ថានទូតម៉ាឡេស៊ីប្រចាំនៅកម្ពុជាការនាំចេញផលិតផលកសិកម្មសរុបរបស់កម្ពុជាទៅកាន់ប្រទេសម៉ាឡេស៊ីបានកើនឡើងយ៉ាងខ្លាំងកាលពីឆ្នាំមុនបើប្រៀបធៀបនឹងឆ្នាំ២០១១។ ការនាំចេញអង្ករបានបង្ហាញនូវកំណើនដ៏ខ្ពស់។
សេចក្ដីប្រកាសព័ត៌មានដដែលនេះបានឲ្យដឹងថា៖«ក្នុងឆ្នាំ២០១២ការផ្លាស់ប្តូរដ៏សំខាន់បំផុតចំពោះពាណិជ្ជកម្មទ្វេភាគីគឺកំណើនការនាំចូលដ៏ខ្លាំងពីប្រទេសកម្ពុជាទៅកាន់ម៉ាឡេស៊ី។ការនាំចូលសរុបមានចំនួនជាង១០០លានដុល្លារដោយវិស័យកសិកម្មមានចំណែកដ៏ធំនៅក្នុងកំណើនដ៏ខ្ពស់នេះ»។
ការនាំចូលទំនិញកសិកម្មពីប្រទេសកម្ពុជាមានចំនួន៧៩ភាគរយនៃការនាំចូលសរុប ដែលគិតជាទឹកប្រាក់មានចំនួន១០១លានដុល្លារ បើធៀបនឹងឆ្នាំ២០១១ដែលមានចំនួនតែ ៥៥,៥លានដុល្លារ។ ជ័រកៅស៊ូមិនទាន់កែច្នៃមានបរិមាណច្រើនជាងគេគិតជាទឹកប្រាក់មានចំនួន៦៩,១លានដុល្លារ។
សេចក្ដីប្រកាសព័ត៌មានបានបញ្ជាក់ថាចាប់តាំងពីរដ្ឋាភិបាលកម្ពុជាចាប់ដំណើរការគោលនយោបាយនាំចេញអង្ករកាលពីឆ្នាំ២០១០ប្រទេសម៉ាឡេស៊ីបានចាប់អារម្មណ៍ធ្វើពិពិធកម្មប្រភពនាំចូលអង្កររបស់ខ្លួន។ ចាប់ពីឆ្នាំ២០១០មក ការនាំចូលអង្ករពីកម្ពុជាបានកើនឡើងជាប្រចាំពោលគឺពីចំនួន ០,៤លានដុល្លារ ក្នុងឆ្នាំ២០១០ដល់៩,៥លានដុល្លារនៅក្នុងឆ្នាំ២០១១ និង២៤,៣ លានដុល្លារក្នុងឆ្នាំ២០១២។
សេចក្ដីប្រកាសព័ត៌មានបានបន្តថា៖ «ការនាំចូលអង្ករពីប្រទេសកម្ពុជាមានចំនួន១៩ភាគរយនៃការនាំចូលសរុបពីកម្ពុជាក្នុងឆ្នាំ២០១២ និងជាទំនិញដែលនាំចូលច្រើនទីពីរបន្ទាប់ពីជ័រកៅស៊ូ។ ស្ថានទូតបានមើលឃើញនូវកំណើនប្រកបដោយភាពវិជ្ជមានក្នុងការនាំចូលអង្ករពីកម្ពុជាស្របដោយសារតែការអភិវឌ្ឍគុណភាពជាបណ្តើរៗ និងតម្លៃប្រកបដោយភាពប្រកួតប្រជែង»។
យោងតាមទិន្នន័យរបស់ការិយាល័យច្រកចេញចូលតែមួយ ម៉ាឡេស៊ីស្ថិតក្នុងលំដាប់ថ្នាក់ល្អមួយដោយបាននាំចូលអង្ករជាង៧ពាន់តោនក្នុងចំណោមអង្ករនាំចេញសរុបចំនួន២៥៧២៦តោនកាលពីខែមករា។
លោក ហ៊ាន វណ្ណហនអគ្គនាយករងនៃក្រសួងកសិកម្មនិងជានាយកលេខាធិការដ្ឋានច្រកចេញចូលតែមួយបានប្រាប់ភ្នំពេញ ប៉ុស្ដិ៍កាលពីសប្តាហ៍មុនថា លោកកត់សម្គាល់ឃើញថាមានកំណើននាំចេញដ៏ខ្ពស់ទៅកាន់ប្រទេសម៉ាឡេស៊ី។ លោកបានថ្លែងថា នៅខែដំបូងក្នុងឆ្នាំនេះ ម៉ាឡេស៊ីស្ថិតក្នុងចំណាត់ថ្នាក់ល្អមួយទាក់ទងនឹងការនាំចូលអង្ករកម្ពុជាប៉ុន្តែទីផ្សារម៉ាឡេស៊ីត្រូវការអង្ករក្រអូបភាគច្រើន។
ពាណិជ្ជកម្មទ្វេភាគីរវាងកម្ពុជានិងម៉ាឡេស៊ីបានកើនឡើងជាង ១៧ភាគរយកាលពីឆ្នាំមុនដល់ ៣៧៦,១លានដុល្លារបើធៀបនឹងឆ្នាំ២០១១ ដែលមានចំនួនតែ៣២០,៥លានដុល្លារ។ យោងតាមសេចក្ដីប្រកាសព័ត៌មានដដែលក្នុងចំណោមទឹកប្រាក់សរុប ការនាំចេញពីប្រទេសម៉ាឡេស៊ីមកកម្ពុជាមានចំនួន ២៤៨,១ លានដុល្លារខណៈដែលការនាំចូលពីកម្ពុជាមានតម្លៃ១២៨លានដុល្លារ។
កម្ពុជាបាននាំចូលទំនិញផលិតកម្មពីប្រទេសម៉ាឡេស៊ីក្នុងតម្លៃសរុប២៣៣លានដុល្លារ។ទោះបីជាយ៉ាងណាក៏ដោយតួលេខនេះបានថយចុះ ៥,១ភាគរយបើធៀបនឹងឆ្នាំ២០១១ដែលមានចំនួន២៤៥,៥ លានដុល្លារ។
កម្ពុជាបន្តក្លាយជាទិសដៅនាំចេញដ៏សំខាន់មួយសម្រាប់ម៉ាឡេស៊ីជាពិសេសការនាំចេញទំនិញផលិតកម្ម។ជាមួយនឹងកំណើនសេដ្ឋកិច្ចនិងប្រាក់ចំណូលប្រកបដោយវិជ្ជមានក្នុងប្រទេសកម្ពុជាទស្សនវិស័យនៃកំណើននាំចេញទំនិញផលិតផលដែលមានតម្លៃថ្លៃនៅតែមានភាពវិជ្ជមាននិងបន្តស្ទុះងើប។
សេចក្ដីប្រកាសព័ត៌មានដដែលបានបន្តថា៖ «ទាក់ទងនឹងការនាំចេញកំណើននាំចូលអង្ករបង្ហាញយ៉ាងច្បាស់ពីទំនុកចិត្តរបស់ម៉ាឡេស៊ីចំពោះវិស័យអង្ករកម្ពុជា។ ទោះបីជាការធ្វើទំនើបកម្មវិស័យនេះនៅតែស្ថិតក្នុងដំណើរការទៅមុខក្តីក៏លទ្ធផលគុណភាពបានកើតមានរួចទៅហើយ»៕ PB
