The Phnom Penh Post Search

Search form




Logo of Phnom Penh Post newspaper Phnom Penh Post - ការ​នាំ​ចេញ​របស់​កម្ពុជា​កើន​ឡើង​១០​ភាគរយ

ការ​នាំ​ចេញ​របស់​កម្ពុជា​កើន​ឡើង​១០​ភាគរយ

ការ​នាំ​ចេញ​របស់​កម្ពុជា​កើន​ឡើង​១០​ភាគរយ

130118_12
កម្មការិនីកំពុងធ្វើការនៅក្នុងរោងចក្រកាត់ដេរសម្លៀកបំពាក់មួយនៅភ្នំពេញនាពេលកន្លងមក ផា លីណា

ភ្នំពេញៈ ការ​នាំ​ចេញ​សរុប​របស់​កម្ពុជា​កើន​ឡើង​ជាង​១០​ភាគ​រយ នៅ​២០១២ បើ​ធៀប​ឆ្នាំ​២០១១ ទោះ​បី​សេដ្ឋកិច្ច​ពិភពលោក​ធ្លាក់​ចុះ​ក៏​ដោយ ពិសេស​ការ​ធ្លាក់​ចុះ​សេដ្ឋកិច្ច​របស់​ទី​ផ្សារ​នាំ​ចេញ​ដ៏​សំខាន់​របស់​កម្ពុជា គឺ​អាមេរិក និង​សហភាព​អឺរ៉ុប។

របាយ​ការណ៍​របស់​មូលនិធិ រូបិយវត្ថុ​អន្តរជាតិ​(IMF)ដែល​បាន​ចេញ​ផ្សាយ​កាល​ពី​ថ្ងៃ​ទី​៩ ខែ​មករា ក៏​គូស​បញ្ជាក់​ផង​ដែរ​ថា ផល​ប៉ះ​ពាល់​ពី​វិបត្តិ​នៅ​តំបន់​ចាយ​ប្រាក់​អឺរ៉ូ និង​ភាព​ចលាចល​ហិរញ្ញវត្ថុ​អាច​ប៉ះ​ពាល់​ធ្ងន់​ធ្ងរ​ដល់​កំណើន​ការ​នាំ​ចេញ​នៅ​កម្ពុជា។

ទិន្នន័យ​បង្ហាញ​ថា ការ​នាំ​ចេញ​សរុប​កើន​ឡើង​១០,២​ភាគ​រយ​ដល់​ជាង​៥,៤៨​ពាន់​លាន​ដុល្លារ​បើ​ធៀប​នឹង​ឆ្នាំ​២០១១ ដែល​មាន​ជាង​៤,៩៧​ពាន់​លាន​ដុល្លារ​។

នៅ​ឆ្នាំ​២០១១ ការ​នាំ​ចេញ​បាន​កើន​ឡើង​៤០​ភាគរយ បើ​ធៀប​នឹង​ឆ្នាំ​២០១០។

លោក គង់ ពុទ្ធារ៉ា អ្នក​នាំ​ពាក្យ​ក្រសួង​ពាណិជ្ជកម្ម បាន​ទទួល​ស្គាល់​ផល​ប៉ះ​ពាល់​ពី​អត្រា​កំណើន​កាល​ពី​ឆ្នាំ​មុន។ លោក​បន្ត​ថា៖ «ខ្ញុំ​យល់​ស្រប​ចំពោះ​ផល​ប៉ះពាល់​ពី​ការ​នាំ​ចេញ​ទៅ​កាន់​អឺរ៉ុប និង​សហរដ្ឋ​អាមរិក កាលពី​ឆ្នាំ​មុន ដោយ​សារ​ពួក​គេ​មិន​ដោះ​ស្រាយ​ផល​វិបាក​សេដ្ឋកិច្ច​របស់​ខ្លួន តែ​ការ​នាំ​ចេញ​របស់​យើង ពិសេស​សម្លៀក​បំពាក់ នៅ​តែ​មាន​តម្រូវ​ការ​ដដែល​។ នេះ​មាន​ន័យ​ថា ការ​ធ្លាក់​ចុះ​នៃ​សេដ្ឋកិច្ច​មិន​បាន​បញ្ឈប់​ប្រជាជន​ពី​ការ​ទិញ​ផលិត​ផល​របស់​យើង​ឡើយ​»។

លោក ចាន់ សុផល ប្រធាន​សមាគម​សេដ្ឋកិច្ច​កម្ពុជា ក៏​យល់​ឃើញ​ដូច្នេះ​ដែរ។ លោក​ថ្លែង​ថា៖ «​ផល​ប៉ះ​ពាល់​នេះ​គ្រាន់​តែ​ធ្វើ​ឲ្យ​កំណើន​ថយ​ចុះ​ប៉ុណ្ណោះ​ប៉ុន្តែ​យើង​នៅ​តែ​អាច​នាំ​ចេញ​ទៅ​កាន់​ប្រទេស​ទាំង​នោះ»។

ទិន្នន័យ​បាន​បង្ហាញ​ថា ការ​នាំ​ចេញ​សម្លៀក​បំពាក់​សរុប​បាន​កើន​ឡើង​ប្រហែល​៩​ភាគ​រយ​នៅ​ឆ្នាំ​២០១២​គឺ​កើន​ពី​៤,២៤៦​ពាន់​លាន​ដុល្លារ​នៅ​ឆ្នាំ​២០១១​ដល់ ៤,៦១១​ពាន់​លាន​ដុល្លារ​ខណៈ​តម្លៃ​សរុប​នៃ​ការ​នាំ​ចេញ​ផលិត​ផល​កសិកម្ម​ធ្លាក់​ចុះ​៤,៤​ភាគរយ ពី​៤២២​លាន​ដុល្លារ​មក​នៅ​ត្រឹម​៤០៣​លាន​ដុល្លារ​។

លោក វ៉ាន់ ស៊ូអៀង ប្រធាន​សមាគម​រោង​ចក្រ​កាត់​ដេរ​នៅ​កម្ពុជា​បាន​ឲ្យ​ដឹង​ថា ការ​ធ្លាក់​ចុះ​នេះ បណ្តាល​មក​ពី​បាតុកម្ម​ជា​ច្រើន។ លោក​បន្ត​ថា ខណៈ​វិបត្តិ​សេដ្ឋកិច្ច​នៅ​សហរដ្ឋ​អាមេរិក និង​អឺរ៉ុប ដែល​ជា​ទី​ផ្សារ​នាំ​ចេញ​សំខាន់​របស់​កម្ពុជា រួម​ចំណែក​ដល់​ការ​ធ្លាក់​ចុះ​នេះ​កូដ​កម្ម​ជា​កត្តា​មួយ​ធ្វើ​មាន​ការ​ធ្លាក់​ចុះ។

លោក​បាន​បន្ថែម​ថា បញ្ហា​នេះ​បាន​បង្ក​ឲ្យ​ផលិតភាព​របស់​ឧស្សាកម្ម​នេះ​ថយ​ចុះ ហើយ​ថ្លៃ​ចំណាយ​មិន​អាច​ប្រកួត​ប្រជែង​បាន បើ​ធៀប​នឹង​ប្រទេស​ផ្សេង​ទៀត ដូច​ជា​នៅ​បង់ក្លាដែស និង​ឥណ្ឌា។

លោក​ថ្លែង​ថា៖ «យើង​បាន​អំពាវនាវ​ដល់​រដ្ឋាភិបាល​ឲ្យ​រក្សា​តុល្យ​ភាព​រវាង​ការ​បោះ​ឆ្នោត​ប្រកប​ដោយ​លទ្ធិ​ប្រជា​ធិបតេយ្យ និង​កំណើន​សេដ្ឋកិច្ច​ប្រកប​ដោយ​និរន្តរភាព ដោយ​មិន​បារម្ភ​ខ្លាច​បាត់​បង់​សំឡេង​ឆ្នោត​ពី​សហជីព​ឡើយ​បើ​ពួក​គេ​ធ្វើ​ខុស»​។

ការ​ធ្វើ​កូដ​កម្ម​របស់​កម្មករ​គឺ​ដើម្បី សុំ​ដំឡើង​ប្រាក់​ខែ និង​លក្ខខណ្ឌ​ការ​ងារ​ផ្សេង​ៗ​ទៀត។

លោក អាត់ ធន់ ប្រធាន​សហភាព​ការងារ​កម្ពុជា​បាន​ឲ្យ​ដឹង​ថា​យ៉ាង​ហោច​ណាស់​ក៏​មាន​កម្មករ​ប្រមាណ​១​ម៉ឺន​នាក់​មក​ពី​រោងចក្រ​ចំនួន​៨​បាន​ផ្ទុះ​ការ​តវ៉ា​នៅ​ដើម​ឆ្នាំ​នេះ។​លោក​ទទួល​ស្គាល់​ថា​ការ​ធ្វើ​បាតុកម្ម​នាំ​ឲ្យ​ខាត​បង់​មិន​ត្រឹម​តែ​ភាគី​រោងចក្រ​ទេ​តែ​កម្មករ​ក៏​ខាត​បង់​ដែរ តែ​ជម្រើស​បាតុកម្ម​ជា​ជម្រើស​ចុង​ក្រោយ​បង្អស់​ពេល​ដែល​សំណើ​របស់​គេ​ត្រូវ​បដិសេធ​និង​គ្មាន​ដំណោះ​ស្រាយ​នោះ​។​លោក​បញ្ជាក់​ថា៖​«​បាតុកម្ម​ជា​ជម្រើស​ចុង​ក្រោយ​ពេល​ដែល​ពួក​គេ​បរាជ័យ​ក្នុង​ការ​សម្រប​សម្រួល»​។

ធនាគារ​ពិភពលោក​ព្យាករ​ថា កំណើន​សេដ្ឋកិច្ច​កម្ពុជា​នឹង​កើន​៦,៧​ភាគ​រយ ដោយ​សារ​កំណើន​ផលិតកម្ម​ស្រូវ​ឧស្សាហកម្ម​កាត់ដេរ និង​ទេសចរណ៍៕CS

រាយ​ការណ៍​បន្ថែមៈ រ៉ាន់ រើយ

អត្ថបទគួរចាប់អារម្មណ៍