ភ្នំពេញៈ កម្ពុជាបាននាំចេញផលិតផលគិតជាទឹកប្រាក់សរុប ២៤០ លានដុល្លារទៅជប៉ុនក្នុងឆមាសទីមួយឆ្នាំនេះ កើនឡើង ៣១ ភាគរយបើធៀបរយៈពេលដូចគ្នាកាលពីឆ្នាំមុន។
ការនាំចេញនេះជាអត្រាខ្ពស់ជាងគេបង្អស់បើប្រៀបធៀបនឹងកំណើននាំចេញរបស់ប្រទេសសមាជិកក្នុងតំបន់អាស៊ាន ទៅទីផ្សារប្រទេស ជប៉ុន។
ទិន្នន័យពីអង្គការពាណិជ្ជកម្មក្រៅប្រទេស ជប៉ុន (JETRO) បានបង្ហាញថា ការនាំចេញទៅទីផ្សារជប៉ុនរបស់ប្រទេសក្នុងតំបន់អាស៊ានក្នុងឆមាសទីមួយឆ្នាំនេះរួមមាន ថៃ វៀតណាម សិង្ហបុរី និង ម៉ាឡេស៊ីជាដើមបានធ្លាក់ចុះយ៉ាងខ្លាំងក្នុងអត្រាមធ្យម ១៥ ភាគរយធៀបនឹងឆ្នាំមុន។ ប៉ុន្តែទំហំទឹកប្រាក់សរុបនៃការនាំចេញរបស់កម្ពុជានៅមានចំណែកតូចជាងឆ្ងាយ បើធៀបនឹងទំហំនាំចេញរបស់ប្រទេសនានាក្នុងតំបន់។
អ្នកស្រី តាកាយ៉ូស៊ិ គុរ៉ូមីយ៉ា ទីប្រឹក្សាប្រចាំស្ថានទូតជប៉ុននៅកម្ពុជា បានបង្ហាញការសារទរចំពោះការសម្រេចបាននូវកំណើនទំហំពាណិជ្ជកម្មរវាងកម្ពុជា និងជប៉ុន ហើយរំពឹងថា និន្នាការនេះនឹងនៅបន្តដំណើរការល្អថែមទៀត។ អ្នកស្រីបានអះអាងថា៖ «យើងរំពឹងថា កិច្ចសហប្រតិបត្តិការផ្នែកសេដ្ឋកិច្ចរវាងជប៉ុនកម្ពុជានឹងនៅបន្តកំណើនថែមទៀត»។
ទិន្នន័យ JETRO បង្ហាញថា ផលិតផលសំខាន់ៗដែលកម្ពុជាបាននំាចេញទៅជប៉ុនមានដូចជាស្បែកជើង សម្លៀកបំពាក់ និង គ្រឿងម៉ាស៊ីនអគ្គិសនី ហើយកម្ពុជាក៏បាននាំចូលពីជប៉ុនវិញដូចជា គ្រឿងម៉ាស៊ីនសម្រាប់ដំណើរការរោងចក្រ រថយន្ត កប៉ាល់ និងទូកជាដើម។
ប្រទេសដែលបាននាំចេញច្រើនជាងគេទៅជប៉ុនក្នុងរយៈពេលប្រាំមួយខែដំបូងនេះគឺ ម៉ាឡេស៊ី មានទឹកប្រាក់សរុប ១៥ ពាន់លានដុល្លារ ឥណ្ឌូនេស៊ី មានទឹកប្រាក់ ១៤,៨ ពាន់លានដុល្លារ និង ថៃ ១១ ពាន់លានដុល្លារ។
កម្ពុជាជាប្រទេសទី៩ ក្នុងតំបន់ដែលបាននាំចេញទៅជប៉ុនច្រើនជាងប្រទេស ឡាវ ដែលមាន ៦១ លានដុល្លារ និងបន្ទាប់ពី មីយ៉ាន់ម៉ា ដែលមានទឹកប្រាក់ ២៨៧ លានដុល្លារ។
លោក គីយ៉ូតាកា ដូហូ តំណាង JETRO នៅកម្ពុជាធ្លាប់បានប្រាប់ភ្នំពេញ ប៉ុស្តិ៍ ថា ការនាំចេញរបស់កម្ពុជាទៅទីផ្សារប្រទេសជប៉ុនកំពុងមានកំណើនហើយនៅពេលនេះកម្ពុជាមិនត្រឹមតែនាំចេញផលិតផលសម្លៀកបំពាក់ប៉ុណ្ណោះទេ ថែមទាំងបានបន្ថែមការនាំចេញផលិតផលដែលមានតម្លៃបន្ថែមខ្ពស់ជា មុនដូចជា គ្រឿងម៉ាស៊ីនអគ្គិសនី ដែលដំឡើងដោយក្រុមហ៊ុនជប៉ុននៅកម្ពុជាផងដែរ។
លោកបន្តថា៖ «ខ្ញុំគិតថា និន្នាការនៃការនាំចេញនឹងនៅតែបន្តកើនឡើង ហើយភាពចម្រុះនៃផលិតផលនាំចេញនឹងនៅតែបន្តមានព្រោះថា រោងចក្រជប៉ុនថ្មីៗដែលចូលមកវិនិយោគនៅកម្ពុជានឹងធ្វើឲ្យមានពិពិធកម្មផលិតផលនៅកម្ពុជាដើម្បីនាំចេញ»។ លោកបន្ថែមថាមានរោងចក្រឧស្សាហកម្មកាន់តែច្រើនមកវិនិយោគ នៅកម្ពុជាដើម្បីដំឡើងយានយន្ត និងត្រៀមនាំចេញត្រឡប់ទៅជប៉ុនវិញ។
ពាណិជ្ជកម្មទ្វេភាគីកម្ពុជា ជប៉ុននៅឆមាសទីមួយឆ្នាំនេះសម្រេចបាន ៣៤៧ លានដុល្លារ កើនឡើងពី ២៩២ លានដុល្លារនៅឆមាសទីមួយកាលពីឆ្នាំមុន៕
