The Phnom Penh Post Search

Search form




Logo of Phnom Penh Post newspaper Phnom Penh Post - ការ​នាំ​ចេញ​សម្លៀក​បំពាក់ ៨ ខែ​កើន​ឡើង ២១ ភាគរយ

ការ​នាំ​ចេញ​សម្លៀក​បំពាក់ ៨ ខែ​កើន​ឡើង ២១ ភាគរយ

ការ​នាំ​ចេញ​សម្លៀក​បំពាក់ ៨ ខែ​កើន​ឡើង ២១ ភាគរយ

ភ្នំពេញៈ ការ​នំា​ចេញ​ផលិតផល​វាយនភ័ណ្ឌ​និង​សម្លៀក​បំពាក់​របស់​កម្ពុជា​នៅ​ក្នុង​រយៈ​ពេល ៨ ខែ​ដំបូង​ឆ្នាំ​នេះ​កើន​ឡើង ២១ ភាគរយ បើ​ធៀប​នឹង​អំឡុង​ពេល​ដូច​គ្នា​កាល​ពី​ឆ្នាំ​មុន។ នេះ​បើ​តាម​ទិន្នន័យ​ពី​ក្រសួង​ពាណិជ្ជកម្ម។

ស្ថិតិ​ខាង​លើ​បង្ហាញ​ថា ប្រទេស កម្ពុជា បាន​នាំ​ចេញ​ផលិតផល​វាយនភ័ណ្ឌ និង​សម្លៀក​បំពាក់​ទៅ​កាន់​ទីផ្សារ​ក្រៅ​ប្រទេស​ក្នុង​ទំហំ​ទឹក​ប្រាក់ ៣,៦៥ ពាន់​លាន​ដុល្លារ​ក្នុង​រយៈ​ពេល ៨ ខែ​ដំបូង ឆ្នាំ ២០១៣ នេះ កើន​ឡើង ២១ ភាគរយ បើ​ធៀប​នឹង ៣,០១ ពាន់​លាន​ដុល្លារ ដែល​បាន​នាំ​ចេញ​កាល​ពី​អំឡុង​ពេល​ដូច​គ្នា​កាល​ពី​ឆ្នាំ ២០១២។

អ្នក​ជំនាញ​អះអាង​ថា កំណើ​នៃ​នេះ​បណ្តាល​មក​ពី​ការ​វិនិយោគ​ទៅ​លើ​ឧស្សាហកម្ម​រោងចក្រ​កាត់​ដេរ​នៅ​កម្ពុជា​ចេះ​តែ​មាន​ការ​រីក​ចម្រើន ខណៈ​កម្ពុជា​មាន​ស្ថិរភាព​នយោបាយ សេដ្ឋកិច្ច និង​សន្តិសុខ​ល្អ ហើយ​ម៉្យាង​ទៀត​នោះ​កម្ពុជា​មាន​លក្ខន្តិកៈ​ច្បាប់​ការងារ​កាន់​តែ​ល្អ​ប្រសើរ។

អ្នក​ជំនាញ​លើក​ឡើង​ទៀត​ថា ភាព​ល្អ​ប្រសើរ​ឡើង​នៃ​ច្បាប់​ការងារ កំពុង​តែ​ទាក់​ទាញ​វិនិយោគិន​ពី​ចិន ជប៉ុន អង់គ្លេស និង ថៃ ឲ្យ​មក​បណ្តាក់​ទុន​លើ​វិស័យ​នេះ​នៅ​កម្ពុជា​កាន់​តែ​ច្រើន។ ម៉្យាង​វិញ​ទៀត​ថ្មីៗ​នេះ​ការ​បញ្ជា​ទិញ​ពី​ទីផ្សារ​សហរដ្ឋ​អាមេរិក និង​អឺរ៉ុប​កំពុង​មាន​កំណើន​ខ្លាំង ដោយ​សារ​តែ​ស្ថានភាព​សេដ្ឋកិច្ច អាមេរិក ក៏​ដូច​ជា​នៅ​បណ្តា​ប្រទេស ចាយ​ប្រាក់​អឺរ៉ូ​កំពុង​តែ​វិវត្ត​ទៅ​រក​ភាព​ល្អ​ប្រសើរ​ឡើង​វិញ។

លោក Hiroshi Suzuki អគ្គ​នាយក និង​ជា​ប្រធាន​សេដ្ឋវិទូ​នៅ​វិទ្យាស្ថាន ស្រាវជ្រាវ ពាណិជ្ជកម្ម កម្ពុជា មាន​ប្រសាសន៍​ថា៖ «កម្ពុជា​មាន​សក្ដានុពល​ដ៏​ល្អ​ក្នុង​ការ​ទាក់​ទាញ​ឧស្សាហកម្ម​ប្រើ​ប្រាស់​កម្លាំង​ពលកម្ម​ច្រើន​មិន​គ្រាន់​តែ​វិស័យ​កាត់ដេរ និង​ស្បែក​ជើង​ប៉ុណ្ណោះ​ទេ ប៉ុន្តែ​ថែម​ទាំង​ផលិតផល​គ្រឿង​បន្លាស់​ផង​ដែរ»។

បច្ចុប្បន្ន​កម្ពុជា​មាន​រោងចក្រ​កាត់ដេរ​ប្រមាណ ៤៥០ រោងចក្រ​ម៉ៅការ​បន្ត​ប្រមាណ ១២០ និង​រោងចក្រ​ស្បែក​ជើង ៤៥ ដែល​ស្រូប​កម្លាំង​ពលកម្ម​ប្រមាណ​ជា ៦០ ម៉ឺន​នាក់ ក្នុង​នោះ​អ្នក​បម្រើ​ការងារ​ក្នុង​ឧស្សាហកម្ម​នេះ​អាច​ទាញ​យក ចំណូល បាន​ប្រមាណ​ជា ៤០ លាន​ដុល្លារ​អាមេរិក​ក្នុង​មួយ​ខែ។

ស្ថិតិ​ពី​ក្រសួង ពាណិជ្ជកម្ម បង្ហាញ​ទៀត​ថា កាលពី ២០១២ កម្ពុជា​នាំ​ចេញ​ផលិតផល វាយនភ័ណ្ឌ​សម្លៀក​បំពាក់ និង​ស្បែក​ជើង បាន​ប្រមាណ ៤,៦១ ពាន់​លាន​ដុល្លារ។

គម្រោង​វិនិយោគ​ដែល ត្រូវ​បាន​អនុម័ត​នៅ​ឆមាស​ទី១ ឆ្នាំ​នេះ​បាន​កើន​ឡើង​ជាង ២០០ ភាគរយ​បើ​ធៀប​រយៈ​ពេល​ដូច​គ្នា​កាល​ពី​ឆ្នាំ ២០១២។ ទិន្នន័យ​ផ្លូវ​ការ​បាន​ពី​ក្រសួង សេដ្ឋកិច្ច និង​ហិរញ្ញវត្ថុ​បង្ហាញ​ថា គម្រោង​វិនិយោគ​ដែល​អនុម័ត​កើន​ឡើង​ពី ៦៩២ លាន​ដុល្លារ ដល់​ជាង ២,៣១ ពាន់​លាន​ដុល្លារ។ ទិន្នន័យ​ដដែល​បង្ហាញ​ថា រដ្ឋាភិបាល​បាន​យល់​ព្រម​លើ​គម្រោង​វិនិយោគ​ក្នុង​វិស័យ​កាត់ដេរ ៦៨ និង​វាយនភ័ណ្ឌ​មាន ៣៦ គម្រោង​មាន​តម្លៃ​ជាង ២០០ លាន​ដុល្លារ៕ PB

អត្ថបទគួរចាប់អារម្មណ៍