The Phnom Penh Post Search

Search form




Logo of Phnom Penh Post newspaper Phnom Penh Post - ការ​នាំ​ចេញ​អង្ករ​នៅ​ឆ្នាំ​នេះ​អាច​ជួប​ឧបសគ្គ​ខ្លះៗ

ការ​នាំ​ចេញ​អង្ករ​នៅ​ឆ្នាំ​នេះ​អាច​ជួប​ឧបសគ្គ​ខ្លះៗ

ការ​នាំ​ចេញ​អង្ករ​នៅ​ឆ្នាំ​នេះ​អាច​ជួប​ឧបសគ្គ​ខ្លះៗ

អ្នក​លក់​កំពុង​លើក​បាវ​អង្ករ​នៅ​តូប​លក់​អង្ករ​ជិត​រាជាយស្ម័យយាន​រាជធានី​ភ្នំពេញ
អ្នក​លក់​កំពុង​លើក​បាវ​អង្ករ​នៅ​តូប​លក់​អង្ករ​ជិត​រាជាយស្ម័យយាន​រាជធានី​ភ្នំពេញ ម៉ៃ វីរៈ

ភ្នំពេញៈ វិស័យ​អង្ករ​កម្ពុជា​ត្រូវ​បាន​គេ​មើល​ឃើញ​ថា​បាន​កើន​ឡើង​ខ្លាំង​ក្នុង​ឆ្នាំ ២០១៣ នៅ​ពេល​ដែល​ការ​នាំ​ចេញ​សរុប​បាន​កើន​ពី ២០៥ ៧០០ តោន​នៅ​ឆ្នាំ ២០១២ ទៅ​ដល់ ៣៧៨ ៨០០ តោន​នៅ​ក្នុង​ឆ្នាំ ២០១៣ ប៉ុន្តែ​សម្រាប់​ឆ្នាំ ២០១៤ នេះ​វិញ កំណើន​ហាក់​បី​ដូចជា​មាន​ការ​យឺត​យ៉ាវ។

អ្នក​ជំនាញ​ក្នុង​វិស័យ​នេះ​និយាយ​ថា ឆ្នាំ​នេះ​មាន​ឧបសគ្គ​មួយ​ចំនួន​សម្រាប់​វិស័យ​ស្រូវ​អង្ករ​កម្ពុជា ដោយ​សារ​គម្រោង​កិច្ច​សន្យា​ទិញ​ស្រូវ​ពី​កសិករ​ក្នុង​តម្លៃ​ខ្ពស់​ជាង​ទីផ្សារ​របស់​រដ្ឋាភិបាល ថៃ បច្ចុប្បន្ន។

គោល​នយោបាយ​ទិញ​ស្រូវ​ពី​កសិករ​ក្នុង​តម្លៃ​ខ្ពស់​ជាង​ទីផ្សារ​របស់​លោក​ស្រី​នាយក​រដ្ឋ​មន្ត្រី ថៃ យីងឡាក់ ស៊ីណាវ៉ាត្រា ដែល​នឹង​ត្រូវ​បញ្ចប់​ក្នុង​ដំណាច់​ខែ​នេះ​កំពុង​បង្ក​ភាព​ច្របូក​ច្របល់​ដល់​ទីផ្សារ​អង្ករ​សកល។ ប្រទេស ថៃ កំពុង​ស្តុក​អង្ករ​ជាង ១០ លាន​តោន និង​ត្រៀម​បញ្ចេញ​លក់​ក្នុង​ទីផ្សារ​បន្ទាប់​ពី​អង្ករ​ក្នុង​ឃ្លាំង​ដែល​ប្រមូល​ចាប់​ពី​ឆ្នាំ ២០១១ ជា​ឆ្នាំ​ដែល​គោល​នយោបាយ​នេះ​ត្រូវ​បាន​ដាក់​ចេញ​បាន​បន្ត​កើន​ឡើង​យ៉ាង​ច្រើន​លើស​លប់។

កាល​ពី​ខែ មករា ឆ្នាំ ២០១២ កម្ពុជា នាំ​ចេញ​អង្ករ​សរុប​បាន​ចំនួន ៩ ៧០០ តោន ខណៈ​នៅ​ខែ មករា ឆ្នាំ ២០១៣ តួលេខ​នាំ​បាន​កើន​ដល់ ២៥ ៧០០ តោន ប៉ុន្តែ​នៅ​ក្នុង​ខែ​រយៈ​ដំបូង​នៃ​ឆ្នាំ​នេះ ការ​នាំ​ចេញ​បាន​ថយ​ចុះ​នៅ​ត្រឹម ២១ ៥០០ តោន។

លោក វ៉ាន់ ដេវិត អគ្គ​លេខាធិការ​រង​នៃ​សម្ព័ន្ធ​អ្នក​ផលិត​ស្រូវ និង​នំា​ចេញ​អង្ករ​កម្ពុជា​និយាយ​ថា៖ «អ្នក​ទិញ​កំពុង​អន្ទះសា​រង់​ចាំ​មើល​តម្លៃ​អង្ករ​ដែល​ប្រទេស ថៃ នឹង​ដាក់​លក់ ដោយ​សារ​គោល​នយោបាយ​ទិញ​ស្រូវ​ពី​កសិករ​ក្នុង​តម្លៃ​ខ្ពស់​ជាង​ទីផ្សារ​របស់​រដ្ឋាភិបាល ថៃ នឹង​ត្រូវ​បញ្ចប់​នៅ​ខែ​នេះ។ អ្នក​នាំ​ចេញ​ប្រចាំ​តំបន់​កំពុង​ពិនិត្យ​មើល​ថា​តើ ថៃ នឹង​ទម្លាក់​ថ្លៃ​អង្ករ​របស់​ខ្លួន​ឬ​យ៉ាង​ណា ខណៈ​ពេល​ដែល​អង្ករ​នៅ​ក្នុង​ស្តុក​ត្រូវ​តែ​បញ្ចេញ​ពី​ឃ្លាំង»។ កត្តា​នេះ​ហើយ អាច​ជះ​ឥទ្ធិពល​ដល់​ទីផ្សារ​អង្ករ​នៅ​ទាំង​មូល​ក្នុង​សកលលោក។

យោង​តាម​របាយ​ការណ៍​ពី​ក្រសួង កសិកម្ម របស់​សហរដ្ឋ​អាមេរិក រដ្ឋាភិបាល ថៃ កាល​ពី​ខែ​មុន​បាន​ដាក់​ដេញ​ថ្លៃ​អង្ករ​ប្រមាណ ១៥០ ០០០ តោន​ជា​សាធារណៈ ក្នុង​តម្លៃ​មួយ​ដែល​ទាប​ជាង​តម្លៃ​ទីផ្សារ​ពី ៧ ទៅ ១៩ ភាគរយ។

ប្រទេស ថៃ នៅ​មាន​អង្ករ​ជាច្រើន​តោន​ដែល​ត្រូវ​បញ្ចេញ​លក់​ក្នុង​ទីផ្សារ។ រដូវ​ប្រមូល​ស្រូវ​អង្ករ​នឹង​ត្រូវ​បញ្ចប់​ក្នុង​ខែ​នេះ ប៉ុន្តែ​បើ​គិត​រហូត​មក​ដល់​ដំណាច់​ខែ មករា កន្លង​ទៅ​រដ្ឋាភិបាល ថៃ បាន​ទទួល​ស្រូវ​ដែល​ត្រូវ​ស្តុក​ក្នុង​ឃ្លាំង​នេះ​រហូត​ដល់ ១០,៧ លាន​តោន​រួច​មក​ហើយ។ នេះ​បើ​តាម​របាយ​ការណ៍​ពី​ក្រសួង កសិកម្ម របស់​សហរដ្ឋ​អាមេរិក។

ទីភ្នាក់ងារ​ព័ត៌មាន Bloomberg កាល​ពី​ថ្ងៃ​អង្គារ​បាន​រាយការណ៍​ថា ថៃ គ្រោង​បញ្ចេញ​លក់​អង្ករ ១ លាន​តោន​ក្នុង​មួយ​ខែ​រយៈ​ពេល​បី​ខែ​ដំបូង​នេះ។

អង្ករ​កាន់​តែ​ច្រើន​ក្នុង​ទីផ្សារ មាន​ន័យ​ថា ការ​ប្រកួត​ប្រជែង​កាន់​តែ​ខ្លាំង ហើយ​តម្លៃ​ក៏​នឹង​ធ្លាក់​ចុះ។ ការ​ទម្លាក់​ថ្លៃ​ភ្លាមៗ​នៃ​អង្ករ ថៃ ធ្វើ​ឲ្យ​អ្នក​ផលិត និង​អ្នក​នាំ​ចេញ​អង្ករ​នៅ កម្ពុជា ប្រឈម​ការ​ប្រកួត​ប្រជែង​ខ្លាំង។

លោក កាន់ គន្ធី នាយក​ប្រតិបត្តិ​ក្រុមហ៊ុន Battambang Rice Investment (Brico) ដែល​ជា​រោង​ម៉ាស៊ីន​កិន​ស្រូវ​និង​ជា​ក្រុមហ៊ុន​នាំ​ចេញ​ដែរ​នោះ បាន​ថ្លែង​ប្រាប់ ភ្នំពេញ ប៉ុស្តិ៍ កាល​ពី​ម្សិលមិញ​ថា៖ «យើង​បារម្ភ​ខ្លាំង​មែន​ទែន ទី​មួយ​ប្រសិន​បើ​យើង​មើល​អង្ករ​ម្លិះ ថៃ ពី​មុន​តម្លៃ ១១៦០ តម្លៃ​អង្ករ​របស់​យើង ៩៥០ ដុល្លារ វា​ខុស​គ្នា ជិត​ពីរ​រយ​ដុល្លារ​បើ​គិត​ការ​នាំ​ចេញ​ទៅ​អឺរ៉ុប​ពន្ធ ២០០ ដុល្លារ ទៀត វា​ខុស​គ្នា​ជិត ៤០០ ដុល្លារ។

គេ​ព្យាយាម​បញ្ចេញ​ស្តុក លក់​ត្រឹម ៩៥០ តែ​ជាក់​ស្តែង​លក់ ថោក​ជាង​នេះ​ទៀត។ អ៊ីចឹង​ម្លិះ​យើង​គាំង​តែ​ម្តង និង​ពិបាក​លក់​ចេញ»។

លោក កាន់ គន្ធី ព្យាករ​ថា ការ​នាំ​អង្ករ​ចេញ​របស់ កម្ពុជា នឹង​បន្ត​ធ្លាក់​ចុះ​ទៀត​នៅ​ខែ​ក្រោយ នេះ។ លោក​បន្ថែម​ថា កំណើន​នៃ​ការ​នាំ​ចេញ​អង្ករ​របស់ កម្ពុជា នៅ​ពេល​នេះ​គឺ ត្រូវ​ពឹង​ផ្អែក​លើ​ការ​សម្រេច​នៃ​ទីផ្សារ​អង្ករ​របស់ ថៃ។ លោក​ថា៖ «ទីផ្សារ​ឥឡូវ​គឺ​ពឹង​ផ្អែក​លើ ថៃ ព្រោះ​ឥឡូវ ថៃ លក់​អង្ករ​ថោក ហើយ​សម្រុក​ចេញ​ក្នុង​ទីផ្សារ​ទៀត»។

លោក ម៉ី កល្យាណ ទីប្រឹក្សា​ជាន់​ខ្ពស់​នៃ​ឧត្តម​ក្រុមប្រឹក្សា​សេដ្ឋកិច្ច​កម្ពុជា និយាយ​ថា ឥទ្ធិពល​អាក្រក់​ក្នុង​រយៈ​ពេល​ខ្លី​គឺ​ចៀស​មិន​ផុត​ឡើយ នៅ​ពេល​ការ​ផ្គត់​ផ្គង់​ក្នុង​ទីផ្សារ​មាន​ចំនួន​លើស​តម្រូវការ​នោះ។

ប៉ុន្តែ​និយាយ​ចំពោះ​ស្ថានភាព​នៅ កម្ពុជា លោក​ថា ការ​បង្កើន​ភាព​ប្រកួត​ប្រជែង​នៅ​ក្នុង​ទីផ្សារ​ជាមួយ​នឹង​ប្រទេស​ជិត​ខាង ដោយ​ផ្តោត​លើ​ការ​បង្កើន​ផលិតភាព និង​គុណភាព​កាន់​តែ​ល្អ​ប្រសើរ​ជាង​មុន នឹង​ជួយ​ដល់​កំណើន​ក្នុង​វិស័យ​នេះ​ក្នុង​រយៈ​ពេល​វែង​នៅ​ពេល​ស្ថានការណ៍​នៅ​ក្នុង​ប្រទេស ថៃ ត្រូវ​បាន​ដោះស្រាយ​រួច។

លោក​លើក​ឡើង​ថា៖ «កាល​ណា​ផលិតផល​យើង​ល្អ គេ​នឹង​ទិញ​ពី​យើង មិន​ថា​ក្នុង​តម្លៃ​ណា​នោះ​ទេ»៕

អត្ថបទគួរចាប់អារម្មណ៍