ភ្នំពេញៈ កម្ពុជាបាននាំចេញអង្ករសរុប១៧៥ ៩៥៩ តោន នៅឆមាសទីមួយកើន១២៥ ភាគរយ ប្រៀបធៀបទៅនឹងឆមាសទីមួយឆ្នាំមុន។
ប៉ុន្តែ អ្នកនៅក្នុងឧស្សាហកម្មនេះបានសម្តែងក្តីបារម្ភថា កម្ពុជានឹងមិនអាចរក្សាកំណើនដូច្នេះបានទេនៅពេលអនាគតខណៈដែល មីយ៉ាន់ម៉ាកំពុងក្លាយជាគូប្រជែងថ្មីមួយទៀតរបស់កម្ពុជា។
លោក សុង សារ៉ននាយកប្រតិបត្តិក្រុមហ៊ុននំាចេញអង្ករ អមរុ រ៉ាយស៍ខេមបូឌា បានប្រាប់ភ្នំពេញ ប៉ុស្តិ៍កាលពីម្សិលមិញថា ការនាំចេញអង្ករទៅកាន់បណ្តាប្រទេសនៅអឺរ៉ុបគឺជាប្រភពយ៉ាងសំខាន់ក្នុងការទ្រទ្រង់កំណើនការនាំចេញ ទន្ទឹមនឹងនេះការនាំចេញទៅបណ្តាប្រទេសនៅអាស៊ី និង អាហ្វ្រិកក៏កើនឡើងផងដែរ។
លោកបន្តថា៖ «ការនាំចេញអង្ករនៅរយៈពេល៦ខែដំបូងឆ្នាំនេះមានស្ថានភាពល្អមែនទែន។ យើងអាចរក្សាការនាំចេញទៅទីផ្សារដែលមានស្រាប់នៅដដែលហើយលើសពីនេះយើងក៏បានទទួលជោគជ័យក្នុងការនាំចេញទៅទីផ្សារថ្មីៗផងដែរ»។
ទិន្នន័យពីលេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករបានបង្ហាញថា ប្រទេសប៉ូឡូញបាននាំចូលអង្ករច្រើនជាងគេដែលមាន ២៧ ៧៦៤ តោន បន្ទាប់មកប្រទេសបារាំង ២៦ ៤៣៨ តោន ថៃ ២២ ២៥០ តោន ម៉ាឡេស៊ី ២០ ០៩៥ តោន ចិន ១៣ ០៧៩ តោន។
ទិន្នន័យដដែលបង្ហាញថា ក្រុមហ៊ុន អមរុ រ៉ាយស៍ខេមបូឌា ជាក្រុមហ៊ុននាំមុខក្នុងការនាំចេញដែលនាំចេញ ២២ ៣៩៩ តោន បន្ទាប់មក ក្រុមហ៊ុន ខ្មែរហ្វូត មាន ២១ ៧០៤ តោននិង ហ្កោលដិន រ៉ាយស៍ ១៧ ១៨២ តោន។
ការនាំចេញអង្កររបស់កម្ពុជាបានបន្តកើនឡើងជារៀងរាល់ឆ្នាំ បន្ទាប់ពីរដ្ឋាភិបាលបានដាក់ចេញនូវគោលនយោបាយនាំចេញអង្ករឲ្យ បាន១ លានតោននៅឆ្នាំ ២០១៥។
គំនិតផ្តួចផ្តើមបង្កើតដោយសហគមអឺរ៉ុប ដើម្បីជួយប្រទេសមានការអភិវឌ្ឍតិចតួចឈ្មោះថា «អ្វីៗទាំងអស់លើកលែងតែអាវុធ» បានជួយឲ្យអង្ករកម្ពុជាអាចមានលទ្ធភាពនាំចេញទៅប្រទេសជាសមាជិកសហគមន៍អឺរ៉ុប ដោយមិនចាំបាច់បង់ពន្ធ ខណៈអង្ករនាំចូលពី ថៃ និង វៀតណាមត្រូវបង់ពន្ធប្រមាណ ១៧៥ អឺរ៉ូ (២២៤ ដុល្លារ) ក្នុងអង្ករមួយតោន។
ទោះបីជាសន្ទុះនៃការនាំចេញក្នុងរយៈពេល៦ខែដំបូងសម្រេចបានក្នុងកម្រិតល្អមួយតែតំណាងក្រុមហ៊ុននាំចេញអង្ករមួយចំនួនមិនបង្ហាញក្តីសង្ឃឹមខ្លាំងពីការរក្សាអត្រាកំណើនដូចគ្នានេះសម្រាប់៦ខែចុងក្រោយនោះទេដោយបារម្ភថា មីយ៉ាន់ម៉ា ដែលមានសក្តានុពលលើឧស្សាហកម្មអង្ករដែរនោះអាចនឹងក្លាយជាគូរប្រកួតប្រជែងដ៏ចម្បងមួយរបស់កម្ពុជា ខណៈសហគមន៍អឺរ៉ុប ទើបសម្រេចលើកលែងទណ្ឌកម្មសេដ្ឋកិច្ចដែលអនុញ្ញាតឲ្យទំនិញពី មីយ៉ាន់ម៉ាអាចនាំចូលទៅសហគមន៍អឺរ៉ុបដោយទទួលបានការអនុគ្រោះពន្ធផងដែរ។
លោក វ៉ាន់ ដេវីឌ អគ្គលេខាធិការរង សម្ព័ន្ធអ្នកផលិតស្រូវ និង នាំចេញអង្ករកម្ពុជាលើកឡើងថាប្រទេសមីយ៉ាន់ម៉ាអាចនឹងក្លាយជាគូប្រកួតប្រជែងដ៏ស្រួចស្រាល់មួយរបស់កម្ពុជាបន្ទាប់ពីមានការលើកលែងទណ្ឌកម្មសេដ្ឋកិច្ច ជាពិសេសពេលសមាហរណកម្មក្នុងតំបន់ចូលមកដល់។ លោកថ្លែងថា៖ «មីយ៉ាន់ម៉ាមានសមត្ថភាពនាំចេញអង្ករបាន១ លានតោនរួចទៅហើយ និងកំពុងគ្រោងបន្ថែមការនាំចេញបីដងទៀតនៅឆ្នាំបន្ទាប់ៗ»។
លោក សុង សារ៉ន ក៏បានលើកឡើងពីក្តីបារម្ភស្រដៀងគ្នានេះដែរ ដោយអះអាងថា បើអង្ករមីយ៉ាន់ម៉ា ត្រូវបានពង្រឹងគុណភាព និង មានការគាំទ្រពីទីផ្សារអន្តរជាតិកាន់តែខ្លាំងនោះ ការលើកលែងទណ្ឌកម្មសេដ្ឋកិច្ចរបស់ទីផ្សារធំៗដូចជា អឺរ៉ុបជាដើមនឹងធ្វើឲ្យភាពប្រកួតប្រជែងលើការនាំចេញអង្កររបស់ មីយ៉ាន់ម៉ាកាន់តែខ្លាំងឡើង។ ក្នុងបរិបទបែបនេះ កម្ពុជានឹងប្រឈមមុខនឹងគូរប្រកួតប្រជែងថ្មីមួយទៀត ដែលនេះក៏ជាក្តីបារម្ភសម្រាប់ក្រុមហ៊ុននាំចេញនៅកម្ពុជាផងដែរ។
លោកស្រី ចន្ទី ប្រធានស្តីទីសមាគមសេដ្ឋកិច្ចកម្ពុជា លើកឡើងថា វានឹងមិនមែនជាការបារម្ភដល់ការនាំចេញរបស់កម្ពុជាក្នុងរយៈពេលខ្លីនេះឡើយ។ លោកបន្តថា៖ «បើគ្រាន់តែមានទឹកនៅក្នុងអាងតែមួយមុខមិនគ្រប់គ្រាន់នោះ ឡើយ តែវាទាមទារឲ្យមាន ទុយោបូមទឹក និងប្រព័ន្ធបង្ហូរទឹកផ្សេងៗទៀត ដើម្បីផ្ទេរទឹកទៅកន្លែងដែលយើងចង់បាន»។ លោក ចន្ទីចង់សំដៅថា មីយ៉ាន់ម៉ាត្រូវការពង្រឹងការវិនិយោគបន្ថែមជាច្រើនទៀតលើហេដ្ឋារចនាសម្ព័ន្ធនៃឧស្សាហកម្មអង្ករ និងការកសាងកេរ្តិ៍ឈ្មោះនៅលើទីផ្សារ៕
