The Phnom Penh Post Search

Search form




Logo of Phnom Penh Post newspaper Phnom Penh Post - ការ​បញ្ចេញ​ស្តុក​អង្ករ​ឥណ្ឌា​អាច​ប៉ះពាល់​កម្ពុជា

ការ​បញ្ចេញ​ស្តុក​អង្ករ​ឥណ្ឌា​អាច​ប៉ះពាល់​កម្ពុជា

Content image - Phnom Penh Post

ការ​បញ្ចេញ​ស្តុក​អង្ករ​ឥណ្ឌា​អាច​ប៉ះពាល់​កម្ពុជា

ភ្នំពេញៈ រដ្ឋាភិបាល​ឥណ្ឌា​នា​ពេល​ថ្មីៗ​នេះ​បាន​ឲ្យ​ដឹង​ថា​នឹង​បញ្ចេញ​អង្ករ​៥​លាន​តោន​ពី​ឃ្លាំង​ស្តុក​របស់​ខ្លួន​ទៅក្នុង​ទីផ្សារ​ក្នុង​តម្លៃ​ឧបត្ថម្ភធន​ដើម្បី​ទប់ស្កាត់​កំណើន​អតិផរណា។

សហព័ន្ធ​អង្ករ​កម្ពុជា និង​អ្នក​នាំ​ចេញ​អង្ករ​កម្ពុជា​បាន​ថ្លែង​ថា ទោះបី​ជា​មាន​ឬ​មិន​មាន​ការ​បញ្ចេញ​អង្ករ​ក្នុង​ចំនួន​ដ៏ច្រើន​នេះ​ទៅក្នុង​ទីផ្សារ​ពិភពលោក​ក៏ដោយ ក៏​តម្លៃ​អង្ករ​នឹង​នៅ​តែ​កើនឡើង​ដែរ។

សេចក្តី​រាយការណ៍​របស់ Bloomberg កាលពី​ថ្ងៃ​ទី​១៩ បាន​ឲ្យ​ដឹង​ថា ប្រទេស​ឥណ្ឌា​នឹង​បញ្ចេញ​អង្ករ​ប្រហែល​១​ភាគ​៤​ពី​ស្តុក​អង្ករ​របស់​ខ្លួន និង​បន្ធូរបន្ថយ​ការ​រឹតបន្តឹង​លើ​ការ​លក់​ផ្លែឈើ និង​បន្លែ​ដើម្បី​ទប់ស្កាត់​កំណើន​អតិផរណា​ដែល​លឿន​បំផុត​របស់​អាស៊ី​មួយ​នេះ ខណៈ​រដូវវស្សា​មាន​ទឹកភ្លៀង​តិច​គំរាមកំហែង​ទិន្នផល​កសិកម្ម។

លោក Ram Vilas Paswan រដ្ឋមន្ដ្រី​ស្បៀង​អាហារ​ប្រាប់​អ្នក​យក​ព័ត៌មាន​នៅ​ទីក្រុង​ញូវដែលី​កាលពី​ថ្ងៃ​ទី​១៨​មិថុនា​ថា រដ្ឋការ​លោក​នាយករដ្ឋមន្ដ្រី Narendra Modi នឹង​លក់​អង្ករ​៥​លាន​តោន​ចេញ​ពី​ឃ្លាំង​ស្តុក​កណ្ដាល​នៅក្នុង​តម្លៃ​ឧបត្ថម្ភធន​ឲ្យ​បាន​ឆាប់​តាម​ដែល​អាច​ធ្វើ​ទៅ​បាន។

លោក វ៉ាន់ វិចិត្រ អគ្គលេខាធិការ​ស្ដីទី​សហព័ន្ធ​ស្រូវ អង្ករ​កម្ពុជា​(CRF)​ដែល​ទើប​បង្កើត​ឡើង​ថ្មី​ថ្លែង​ថា​៖ «​ទោះបី​រដ្ឋាភិបាល​ឥណ្ឌា​អាច​សម្រេច​បាន​ផែនការ​ខ្លួន​ក្នុង​ការ​បញ្ចេញ​អង្ករ​ចំនួន​ច្រើន​ទៅក្នុង​ទីផ្សារ​ពិភពលោក​ក៏ដោយ ក៏​ទិដ្ឋភាព​នៃ​ផលប៉ះពាល់​អវិជ្ជមាន​ត្រូវ​គេ​មើល​ឃើញ​ដែល​អាច​កើត​មាន​ឡើង​ដោយសារ El Nino (​ការ​ឡើង​កម្តៅ​ផែនដី​)​»។

លោក​លើក​ឡើង​ថា​៖ «​ប៉ុន្តែ​បើ​រដ្ឋាភិបាល​ឥណ្ឌា​ពិតជា​បញ្ចេញ​អង្ករ​ក្នុង​ចំនួន​ច្រើន​ទៅក្នុង​ពាណិជ្ជកម្ម​អង្ករ​ពិភពលោក​ជាមួយ​នឹង​តម្លៃ​កាន់តែ​ទាប តម្លៃ​ទីផ្សារ​ពិភពលោក​ពិតជា​នឹង​រង​ផលប៉ះពាល់​ដោយសារ​តម្លៃ​អាច​បន្ត​ចុះ​ទាប ដូច្នេះ​វា​នឹង​ជំរុញ​សមត្ថភាព​នាំ​ចេញ​អង្ករ​របស់​កម្ពុជា​ទៅ​កាន់​ទីផ្សារ​ក្រៅ​ប្រទេស​ថែម​ទៀត​»។

លោក គឹម សាវុធ ប្រធាន​ក្រុមហ៊ុន ខ្មែរហ្វូដ ជា​ក្រុមហ៊ុន​នាំ​ចេញ​អង្ករ​ឈាន​មុខ​គេ​មួយ​នៅ​កម្ពុជា​បាន​លើក​ឡើង​ពី​ការ​បារម្ភ​ផង​ដែរ​ប្រសិន​បើ​មាន​ការ​បញ្ចេញ​អង្ករ​របស់​ប្រទេស​ឥណ្ឌា​ទៅកាន់​ទីផ្សារ​ពិភពលោក។

លោក​បាន​បន្ត​ថា​៖ «​ពេល​នេះ​ខ្ញុំ​កំពុង​អង្កេត​មើល​វា​ខណៈ​រដ្ឋាភិបាល​ឥណ្ឌា​បញ្ចេញ​អង្ករ​ក្នុង​ចំនួន​ច្រើន​សម្រាប់​ទីផ្សារ​របស់​ខ្លួន​ដើម្បី​ទប់ស្កាត់​ការ​កើនឡើង​អតិផរណា។ ប៉ុន្តែ​ខ្ញុំ​មាន​ការ​បារម្ភ​ថា ការ​បញ្ចេញ​អង្ករ​ដ៏ច្រើន​នេះ​នឹង​ចូល​ទៅក្នុង​ទីផ្សារ​ពិភពលោក ច្បាស់​ណាស់​យើង​នឹង​ទទួល​រងផលប៉ះពាល់​»។

លោក ខាន់ គន្ធី ម្ចាស់​រោងម៉ាស៊ីន​កិនស្រូវ និង​ជា​អ្នក​នាំចេញ​ក្នុង​ស្រុក​មួយ​បាន​ទទួល​ស្គាល់​ថា ការ​បញ្ចេញ​នេះ​នឹង​ទប់ស្កាត់​ការ​នាំចេញ​សរុប​របស់​កម្ពុជា​នៅ​ឆ្នាំ​នេះ​។ លោក​លើក​ឡើង​ថា​៖ «​ប្រហែល​នឹង​ប៉ះពាល់​ដល់​តម្លៃ​អង្ករ​ពិភពលោក​ដោយសារ​ការ​ផ្គត់ផ្គង់​កាន់តែ​ច្រើន​ក្នុង​ទីផ្សារ​នេះ។ ប៉ុន្តែ​ខ្ញុំ​គិត​ថា​វា​នឹង​មិន​រង​ផលប៉ះពាល់​ដល់​អង្ករ​ក្រអូប​របស់​យើង​ទេ​»។

លោក វ៉ាន់ វិចិត្រ ថ្លែងថា បច្ចុប្បន្ន​ប្រទេស​ឥណ្ឌា​មាន​ការ​ប្រកួតប្រជែង​ខ្លាំង​សូម្បីតែ​អង្ករ​ស គ្រាប់​វែង​ទាំង​មាន​គុណភាព​ល្អ និង​គុណភាព​ទាប។

តាម​ទិន្នន័យ​បាន​ពី​ក្រសួង​កសិកម្ម រុក្ខាប្រមាញ់ និង​នេសាទ កម្ពុជា​បាន​នាំ​ចេញ​អង្ករ​១២០ ២៩១ តោន​ទៅ​ទីផ្សារ​ពិភពលោក​ពិសេស​អឺរ៉ុប​ក្នុង​រយៈពេល​៤​ខែ​ដំបូង​ក្នុង​ឆ្នាំ​២០១៤ ធៀប​នឹង​១១៨ ៥០៤​តោន​ក្នុង​រយៈពេល​ដូច​គ្នា​ពី​ឆ្នាំ​មុន​ដែល​ចំនួន​នេះ​កើនឡើង​តែ​១,៥​ភាគរយ​ប៉ុណ្ណោះ។ ក្នុង​ចំណោម​ចំនួន​នេះ​ការ​នាំ​ចេញ​អង្ករ​ក្រអូប​មាន​៥២,៥៥​ភាគរយ ខណៈ​ការ​នាំ​ចេញ​អង្ករស​គ្រាប់​វែង​មាន​៤១,៤​ភាគរយ។

ទិន្នន័យ​ពី​អាជ្ញាធរ​អភិវឌ្ឍន៍​ការ​នាំ​ចេញ​ផលិតផល​ស្បៀងអាហារ​កែច្នៃ និង​កសិកម្ម​នៅ​ឥណ្ឌា​ឲ្យ​ដឹង​ថា ឥណ្ឌា​គឺជា​ប្រទេស​នាំ​ចេញ​អង្ករ​ច្រើន​ជាង​គេ​របស់​ពិភពលោក​កាលពី​ឆ្នាំ​២០១២ និង​ឆ្នាំ​២០១៣។ ឥណ្ឌា​នាំ​ចេញ​អង្ករ​សរុប​ចំនួន​១០,៧៨​លានតោន គិត​ពី​ថ្ងៃ​ទី​១​ខែ​មេសា ឆ្នាំ​២០១៣ ដល់ ថ្ងៃ​ទី​៣១​ខែ​មីនា ឆ្នាំ​២០១៤ កើនឡើង​ប្រហែល​៦​ភាគរយ​ធៀប​នឹង​១០,១៥​លាន​តោន​ដែល​បាន​នាំ​ចេញ​នៅក្នុង​ឆ្នាំ​២០១២-១៣៕ PB

អត្ថបទគួរចាប់អារម្មណ៍