ភ្នំពេញៈ ចង្វាក់ផលិតកម្មរោងចក្រកាត់ដេរមួយចំនួននៅក្នុងរាជធានី ភ្នំពេញ នៅមិនទាន់ត្រឡប់មករកសភាពដើមដូចកាលពីមុនពេលបោះឆ្នោតវិញ នៅឡើយទេ ដោយសារកម្មករមួយចំនួនមិនទាន់ហ៊ានត្រឡប់មកធ្វើការងារ ដែលធ្វើឲ្យផ្នែកខ្លះត្រូវរាំងស្ទះ។
លោក អាត់ ធន់ ប្រធានសហជីពការងារកម្ពុជា បានប្រាប់ភ្នំពេញ ប៉ុស្តិ៍ ថា មានកម្មករច្រើនជាង ១០ ភាគរយមិនទាន់ត្រឡប់មកចូលធ្វើការវិញនៅឡើយបន្ទាប់ពីថ្ងៃបោះឆ្នោតថ្នាក់ជាតិដែលធ្វើឡើងកាលពីថ្ងៃទី២៨ កក្កដា ដោយសារពួកគាត់មួយចំនួនមានការព្រួយបារម្ភពីការប្រែប្រួល នៃស្ថានភាពនយោបាយ។ កត្តានេះគឺជាបញ្ហាប្រឈមដែលអាចប៉ះពាល់ដល់ចង្វាក់ផលិតកម្ម ក្នុងរោងចក្រ។
លោក អាត់ ធន់ ថ្លែងថា៖ «បើសិនម្ចាស់រោងចក្រទទួលការកុម្ម៉ង់ទិញ គេត្រូវប្រាកដថានឹងមានផលិតផលលក់នៅពេលកំណត់មកដល់។ រោងចក្រដែលជួបបញ្ហា [កង្វះបុគ្គលិក] អាចត្រូវបង្ខំចិត្តផ្អាកទទួលការកុម្ម៉ង់ពីអ្នកទិញ បណ្តោះអាសន្នសិនព្រោះពួកគេខ្លាចមិនអាចផលិតបានទាន់ពេលកំណត់»។
លោក ខេន លូ អគ្គលេខាធិការ សមាគមរោងចក្រកាត់ដេរនៅកម្ពុជា បាននិយាយកាលពីម្សិលមិញថា រោងចក្រមួយចំនួនអាចជួបប្រទះបញ្ហាប្រឈមខាងលើ តែលោកបានបញ្ជាក់ថា វាមិនបានកើតឡើងជាទូទៅទេ។ យ៉ាងណាក៏ដោយលោកបារម្ភថា ប្រសិនបើស្ថានភាពនយោបាយនៅតែមិនច្បាស់លាស់ កម្មករដែលបានត្រឡប់ និងកំពុងធ្វើការនាពេលនេះអាចត្រឡប់ទៅស្រុកកំណើតវិញ ហើយប្រសិនបើដូច្នេះ បញ្ហានេះនឹងក្លាយជាឧបសគ្គដ៏ធំជាក់ជាមិនខាន។ លោកថ្លែងថា៖ «យើងពិតជាមានការបារម្ភពីបញ្ហានេះ»។
លោក Nam-Shik Kang ម្ចាស់រោងចក្រកាត់ដេរសម្លៀកបំពាក់ Injae ដែលមានសាខាពីរនៅភ្នំពេញបានឲ្យដឹងថា រោងចក្ររបស់លោកក៏ជួបបញ្ហាអវត្តមានកម្មករមួយចំនួនផងដែរជាពិសេសនៅ តាខ្មៅ ដែលជាសាខាទីពីរ តែវាមិនទាន់ជាបញ្ហាធ្ងន់ធ្ងររហូតដល់ស្ទះការផលិតនៅឡើយនោះទេ៖ «វាមិនទាន់ជាបញ្ហាធ្ងន់ធ្ងរនៅឡើយទេ តែយ៉ាងណាក៏ដោយយើងនៅតែបន្តតាមដានស្ថានភាពនយោបាយយ៉ាងយកចិត្តទុកដាក់»៕
