សៀមរាបៈ សមាគមផលិតត្រីប្រហុកក្នុង ខេត្តសៀមរាប ឲ្យដឹងថា អ្នកផលិតត្រីប្រហុកក្នុង ឃុំកំពង់ឃ្លាំង ស្រុកសូទ្រនិគម ខេត្តសៀមរាប បានផ្អាកការផលិតដោយសារតែតម្រូវការទីផ្សារមានដំណើរការយឺត។
ប្រហុកត្រីកំភ្លាញ ជាផលិតផលដែលគ្រោងនឹងចុះបញ្ចីជាផលិតផលសម្គាល់ពីទីតាំងភូមិសាស្ត្រ (GI)។
អ្នកស្រី ព្រំ ហុង ប្រធានសមាគមអ្នកផលិតត្រីប្រហុក ឃុំកំពង់ឃ្លាំង បានឲ្យដឹងថា តម្លៃនៃការផលិតធ្វើពីត្រីកំភ្លាញក្នុងស្រុកដែលធ្វើទៅតាមបែបធម្មជាតិលក់រាយក្នុងតម្លៃ ២០ ០០០ រៀលក្នុងមួយគីឡូក្រាម ខណៈការធ្វើដោយឈ្មួញមួយចំនួនប្រើជាតិគីមីតម្លៃត្រឹមតែ ៦ ០០០ រៀលប៉ុណ្ណោះ។ បើតាមអ្នកស្រី ព្រំ ហុង អ្នកផលិតត្រូវរក្សាត្រីទុករយៈពេលយ៉ាងហោចណាស់ ១២ខែ ទើបអាចយកមកលក់នៅទីផ្សារបាន។
អ្នកស្រី ព្រំ ហុង បាននិយាយថា៖ «អ្នកផលិតមួយចំនួនបានផ្អាកការធ្វើប្រហុកត្រីកំភ្លាញទាំងស្រុងដោយសារតែកង្វះទុន និងតម្រូវការតិចតួចក្នុងទីផ្សារនេះ»។ អ្នកស្រីលើកឡើងថា៖ «អ្នកធ្វើត្រីប្រហុកភាគច្រើនមិនមានដើមទុនដើម្បីធ្វើប្រហុក និងស្ដុកទុកប្រហុកត្រីកំភ្លាញសម្រាប់រយៈពេលស្ដុកទុក ហើយនៅពេលណាពួកគេស្ដុកទុក ទីបញ្ចប់លក់ត្រីប្រហុកនេះ គ្មាននរណាម្នាក់ចង់ទិញទេដោយសារតែវាមានតម្លៃខ្ពស់»។
អ្នកស្រី ព្រំ ហុង បន្តថា អ្នកធ្វើត្រីប្រហុក កំពង់ឃ្លាំង ប្រឈមនឹងការប្រកួតប្រជែងពីអ្នកផ្សេងទៀតដែលពួកគេបានប្រើសារធាតុគីមីដើម្បីឆាប់បានលក់។
នៅក្នុង ឃុំកំពង់ឃ្លាំង មានសមាជិកធ្វើប្រហុកនេះ ៩ ភូមិ ដែលក្នុងមួយភូមិមានជាសមាជិក ១០ គ្រួសារ។
លោក ឡាច ចន ជាអ្នកភូមិម្នាក់ ដែលបានធ្វើប្រហុកត្រីកំភ្លាញអស់រយៈពេលជាង ២០ ឆ្នាំមកហើយ។
លោកបន្តថា៖ «តម្រូវការសម្រាប់ត្រីប្រហុករបស់យើងគឺតិចតួចបំផុត។ មានតែអ្នកចូលចិត្តវាពិតប្រាកដ ហើយដឹងពីរសជាតិដ៏ឆ្ងាញ់ដែលទិញត្រីប្រហុកនេះ»។ លោកបានផ្អាកការផលិតនិងកំពុងរង់ចាំតម្រូវការកើនឡើងមុនពេលលោកគិតពិចារណាពីការចាប់ផ្ដើមឡើងវិញ។
រដ្ឋាភិបាល កម្ពុជា កាលពី ខែកុម្ភៈ បានបន្ថែមត្រីប្រហុក ខេត្តសៀមរាប ទៅក្នុងបញ្ជីផលិតផល (GI)។
លោក គីម លី អនុប្រធានមន្ទីរ ពាណិជ្ជកម្ម ខេត្តសៀមរាប បានថ្លែងថា លោកបានដឹងពីបញ្ហាប្រឈមដែលអ្នកធ្វើត្រីប្រហុកកំពុងជួបប្រទះ។ លោកថ្លែងថា៖ «យើងកំពុងព្យាយាមស្វែងរកទុនពីម្ចាស់អំណោយដើម្បីជួយអ្នកធ្វើត្រីប្រហុកដែលត្រូវបានចុះបញ្ជីនៅក្នុងសមាគមដូច្នេះពួកគេអាចបន្តការផលិតបាន»។
ខេត្តសៀមរាប ផលិតប្រហុកត្រីកំភ្លាញប្រហែលពី ៦០០ ដល់ ៧០០ តោនប្រចាំឆ្នាំ។ រដូវធ្វើប្រហុកត្រីកំភ្លាញចាប់ពី ខែធ្នូ ដល់ ខែមីនា៕ PB
