ភ្នំពេញៈ សមាគមម្រេចកំពតលក់ម្រេចកំពតបាន២១តោន គិតត្រឹមខែឧសភា ឆ្នាំនេះ ក្នុងនោះ៧០ភាគរយត្រូវបាននាំចេញ។ នេះបើតាមទិន្នន័យពីប្រធានសមាគម។
តួលេខបង្ហាញថា ការលក់ម្រេចកំពត ដែលទទួលបានលិខិតបញ្ជាក់សម្គាល់ទីតាំងភូមិសាស្រ្ត(GI)ជាលិខិតបញ្ជាក់ពីកម្មសិទ្ធិបញ្ញាអំពីគុណភាពល្អផ្តាច់គេនៃផលិតផលម្រេចបានធ្លាក់ចុះបើធៀបនឹងរដូវប្រមូលផលឆ្នាំទៅដែលលក់បានចំនួន២២តោន។
ការធ្លាក់ចុះបរិមាណលក់នាឆ្នាំនេះដោយសារម្រេចផ្តល់ផលមិនល្អទៅតាមលក្ខខណ្ឌតម្រូវការទីផ្សារ ដែលបណ្តាលពីអាកាសធាតុមិនអំណោយផល។ នេះបើតាមលោក ងួន ឡាយ ប្រធានសមាគមម្រេចខេត្ដកំពត។
រដូវប្រមូលផលម្រេចនៅខេត្តកំពតគឺធ្វើឡើងនៅចន្លោះពីខែ មករា ដល់ខែឧសភា។
លោក ងួន ឡាយ បានបញ្ជាក់ថា៖ «អាកាសធាតុមានកាប្រែប្រួលលឿនពេក។យើងខ្វះទឹកនៅដើមរដូវ តែនៅពេលមានភ្លៀងបែរជាភ្លៀងខ្លាំងពេក។កត្តានេះបានធ្វើឲ្យគ្រាប់ម្រេចស្វិតនិងប្រែពណ៌ មិនត្រូវស្តង់ដារដែលតម្រូវសម្រាប់ផលិតផលប្រភេទ GI»។
លោកបន្ថែមថា តាមពិតតម្រូវការម្រេចកំពតមានការកើនឡើងជារៀងរាល់ឆ្នាំ បន្ទាប់ពីផលិតផលនេះបានទទួលលិខិតបញ្ជាក់ GI នៅឆ្នាំ ២០១០ ប៉ុន្តែបញ្ហាចម្បងបណ្តាលពីលទ្ធភាពផ្គត់ផ្គង់។អំណោយផលទីតាំងភូមិសាស្រ្តក្នុងការដាំម្រេចដែលមានគុណភាពល្អផ្តាច់គេរហូតទទួលបាន GI បានគ្របដណ្តប់លើស្រុក ៤ ក្នុងខេត្តកំពត និង ស្រុក ២ ទៀតនៅខេត្តកែប។ រហូតមកទល់ពេលនេះ សមគមម្រេចខេត្តកំពតមានសមាជិកសរុបទាំងអស់១៥៣ គ្រួសារ និង ត្រៀមបញ្ចូល ១៣៥ គ្រួសារបន្ថែមទៀតនៅពេលដែលផ្ទៃដីដាំដុះរបស់ពួកគេអាចប្រមូលផលបាន។
យោងតាមព័ត៌មានពីខាងសមាគមម្រេចកំពត ម្រេចកំពតមានបីប្រភេទ ដែលក្នុងចំណោមនោះម្រេចសមានតម្លៃខ្ពស់ជាងគេ គឺ ១៨ ដុល្លារក្នុងមួយគីឡូក្រាម ម្រេចក្រហម ១៥ ដុល្លារនិង ម្រេចខ្មៅ ១១ ដុល្លារក្នុងមួយគីឡូក្រាម។
អ្នកស្រីហ៊ីម អេនណា ប្រធានក្រុមហ៊ុន Bright Starling Holding ដែលជាក្រុមហ៊ុនប្រមូលទិញម្រេចកំពតនិងនាំចេញទៅលក់នៅក្រៅប្រទេសមានប្រសាសន៍ថា ផលិតកម្មម្រេចកំពតកំពុងទទួលបានការគាំទ្រយ៉ាងខ្លាំងនៅលើទីផ្សារជាពិសេសប្រទេសបារាំង សហរដ្ឋអាមេរិក និង កាណាដា។
អ្នកស្រីអះអាងថាក្រុមហ៊ុនបាននាំចេញម្រេចកំពតបាន៦តោនហើយរំពឹងថាបើខាងសមាគមអាចផ្គត់ផ្គង់បរិមាណម្រេចបានតាមការចង់បានរបស់ក្រុមហ៊ុន នោះការលក់ចេញនឹងមានការកើនឡើងច្រើនជាងនេះទៀត។
អ្នកស្រីបន្ថែមថា៖ «មានអតិថិជនជាច្រើនបានកោតសរសើរពីរសជាតិល្អប្លែកគេរបស់ម្រេចកំពត ដែលពួកគេមិនអាចរកម្រេចពីប្រទេសផ្សេងណាមកប្រដូចបាន។ខ្ញុំសង្ឃឹមថាផលិតកម្មនេះនឹងរួមចំណែកយ៉ាងសំខាន់ក្នុងការលើកតម្កើងជីវភាពរបស់កសិករឲ្យកាន់តែប្រសើរឡើង»។
ដើម្បីឆ្លើយតបទៅនឹងកំណើនតម្រូវការនៃផលិតផលម្រេចកំពត និងអាចទាញយកប្រយោជន៍កាន់តែច្រើនពីសក្តានុពលរបស់ដំណាំម្រេចកំពតសមាជិកក្នុងសមាគម កំពុងខិតខំពង្រីកផ្ទៃដីដាំដុះបន្ថែមទៀត។ ជាក់ស្តែងផ្ទៃដីដាំដុះបានកើនឡើងពី២០ ហិកតា ក្នុងឆ្នាំ ២០១២ ដល់ ៤១ ហិកតានៅដើមឆ្នាំ២០១៣ នេះ។តែបច្ចុប្បន្នផ្ទៃដីដែលអាចប្រមូលផលបានមានត្រឹមតែ ២០ ហិកតាតែប៉ុណ្ណោះដោយសារតែផ្ទៃដីដាំដុះថ្មីបន្ថែមនោះត្រូវការរយៈពេល២ឆ្នាំទៀតទើបអាចប្រមូលផលបាន៕
