The Phnom Penh Post Search

Search form




Logo of Phnom Penh Post newspaper Phnom Penh Post - ការ​លក់​រថយន្ត​ទំនើប​កើន​ឡើង​តិច​តួច

ការ​លក់​រថយន្ត​ទំនើប​កើន​ឡើង​តិច​តួច

ការ​លក់​រថយន្ត​ទំនើប​កើន​ឡើង​តិច​តួច

140109_11
រថយន្ត BMW ដែលដាក់តាំងលក់នៅក្រុមហ៊ុនចែកចាយផ្តាច់មុខនៅរាជធានីភ្នំពេញនាពេលកន្លងមក ផា លីណា

ភ្នំពេញៈ ការ​លក់​រថយន្ត​ទំនើប​នៅ​កម្ពុជា​មាន​ការ​កើន​ឡើង​បន្តិច​បន្តួច​ក្នុង ឆ្នាំ ២០១៣ ជា​ឆ្នាំ​ដែល​មាន​ការ​រៀបចំ​ការ​បោះឆ្នោត ខណៈ​អ្នក​រក​ស៊ី​ក្នុង​ឧស្សាហកម្ម​នេះ​រំពឹង​ថា នឹង​មាន​ការ​កើន​បន្ត​ទៀត​នៅ​ឆ្នាំ​នេះ។

ក្រុមហ៊ុន​លក់​រថយន្ត​ម៉ាក ល្បីៗ​មាន​ដូចជា តូយ៉ូតា Ford, BMW និង Mercedes Benz មាន​មតិ​អំពី​សន្ទុះ​នៃ​ការ​លក់​រថយន្ត​ផ្សេងៗ​គ្នា។

ការ​លក់​របស់​ក្រុមហ៊ុន តូយ៉ូតា (ខេមបូឌា) ជា​ក្រុមហ៊ុន​ចែក​ចាយ​រថយន្ត​ម៉ាក តូយ៉ូតា ដ៏​ពេញ​និយម​បំផុត​នៅ​លើ​ទីផ្សារ​កម្ពុជា បាន​កើន​ដល់​ជាង ១ ០០០ គ្រឿង​ក្នុង ២០១៣ ជា​កំណើន​តិច​តួច​ពី​ការ​លក់​ក្នុង ២០១២។ នេះ​បើ​តាម​ការ​អះអាង​របស់​លោក គង់ ងួន អគ្គ​នាយក​ក្រុមហ៊ុន តូយ៉ូតា (ខេមបូឌា)។

ខណៈ​ការ​លក់​បាន​កើន​ឡើង​តិច​តួច​មែន​តែ​លោក គង់ ងួន រំពឹង​ថា លោក​នឹង​អាច​លក់​រថយន្ត​រហូត ១ ៤០០ គ្រឿង ក្នុង​ឆ្នាំ ២០១៤ នេះ ដោយសារ​កំណើន​សេដ្ឋកិច្ច​កម្ពុជា​បន្ត​កើន​ឡើង។ លោក​ថ្លែង​ថា៖ «៩០ ភាគរយ​នៃ​រថយន្ត​នៅ​កម្ពុជា​ជា​រថយន្ត​ដែល​បាន​ប្រើ​ប្រាស់​រួច។

បច្ចុប្បន្ន​អតិថិជន​ហាក់​មាន​ទំនោរ​ងាក​មក​ប្រើ​ប្រាស់​រថយន្ត​ថ្មី​វិញ។ ក្រុមហ៊ុន​មាន​គម្រោង​នាំ​ចូល​រថយន្ត​ម៉ូដែល​ថ្មីៗ​ជាច្រើន​ទៀត​ដើម្បី​បន្ថែម​ជម្រើស​សម្រាប់​អតិថិជន​ជា​គ្រួសារ»។

លោក សេង វឹង អ្នក​គ្រប់​គ្រង​ទូទៅ​ប្រចាំ​ក្រុមហ៊ុន R.M Asia Co., Ltd ដែល​បាន​នាំ​ចូល​រថយន្ត​ម៉ាក Ford ក៏​បាន​បង្ហាញ​សុទិដ្ឋនិយម​សម្រាប់​ទីផ្សារ​នៅ​ឆ្នាំ ២០១៤ នេះ​ដែរ។

លោក​បព្ជាក់​ថា ការ​លក់​រថយន្ត​បាន​កើន ៣០ ភាគរយ​ក្នុង​ឆ្នាំ ២០១៣ ធៀប​នឹង​ឆ្នាំ ២០១២ ជា​តួលេខ​ដែល​លោក​អះអាង​ថា អាច​នឹង​កើន​ខ្ពស់​ប្រសិន​បើ​មាន​ការ​ផ្គត់​ផ្គង់​រថយន្ត​គ្រប់​គ្រាន់​តាម​តម្រូវការ។ រថយន្ត Ford Explorer និង​រថយន្ត Ford Ranger ជា​ម៉ូដែល​ដែល​ពេញ​និយម​ជាង​គេ។ លោក​បន្ត​ថា៖ «តម្រូវការ​រថយន្ត Ford Ranger នៅ​ជុំវិញ​ពិភពលោក​បាន​ឈាន​ដល់​តម្រូវការ​ខ្ពស់​បំផុត​ដូច្នេះ​មាន​កង្វះ​ក្នុង​ការ​ផ្គត់​ផ្គង់​ក្នុង​រយៈ​ពេល​ខ្លី ខណៈ​តម្រូវការ​នៅ កម្ពុជា មាន​កម្រិត​ខ្ពស់។ យើង​មិន​មាន​រថយន្ត​លក់​ឲ្យ​អតិថិជន​មួយ​រយៈ​ពេល»។

ដោយ​បើក​ដំណើរការ​នៅ​កម្ពុជា​កាល​ខែ សីហា ឆ្នាំ​មុន​រថយន្ត​ម៉ាក BMW ដែល​ជា​យីហោ​មួយ​ក្នុង​ចំណោម​យីហោ​ឈាន​មុខ​គេ​ក្នុង​ពិភពលោក បាន​មើល​ឃើញ​ពី​ការ​លក់​បាន​ឡើង​ហួស​ពី​ទិស​ដៅ​កំណត់។ លោក Peter Brongers អគ្គ​នាយក​ក្រុមហ៊ុន​ចែកចាយ​រថយន្ត​ BMW ក្នុង​ស្រុក និយាយ​កាល​ពី​ម្សិលមិញ​ថា៖ «រថយន្ត​យីហោ BMW លក់​អស់ ១២០ គ្រឿង ហើយ​រំពឹង​ថា ការ​លក់​នឹង​កើន​ឡើង​ទ្វេ​ដង​នៅ​ឆ្នាំ​នេះ»។

លោក​បន្ថែម​ថា ស្រប​ពេល​ដែល​ប្រជាជន​មាន​ចំណូល​មធ្យម​កំពុង​កើន​ឡើង​រួម​ទាំង​កំណើន​សេដ្ឋកិច្ច​កម្ពុជា​ផង​នោះ​អតិថិជន​កាន់​តែ​ច្រើន​កំពុង​ស្វែង​រក​រថយន្ត​កាន់​តែ​ទំនើប និង​មាន​សោភ័ណ្ឌភាព​ប្រសើរ​ជាង​មុន។ លោក​ថ្លែង​ថា៖ «និន្នាការ​កំពុង​ផ្លាស់​ប្តូរ! នៅ​ពេល​នេះ​ប្រជាជន​កាន់​តែ​ច្រើន​ឡើងៗ​មាន​លទ្ធភាព​ក្នុង​ចំណាយ​លើ​រថយន្ត​ទំនើប​និង​ថ្មី»។

លោក Pily Wong អគ្គ​នាយក​ក្រុមហ៊ុន​Hung Hiep (Cambodia) ចែក​ចាយ​រថយន្ត Mercedes-Benz និង Volkswagen ទំនង​ជា​ក្រុមហ៊ុន​ចែក​ចាយ​តែ​មួយ​គត់​ដែល​ការ​លក់​ត្រូវ​បាន​ទទួល​រង​ផល​ប៉ះពាល់​ដោយ​ការ​បោះឆ្នោត។ លោក បាន​ថ្លែង​កាល​ពី​ម្សិលមិញ​ថា ចំនួន​រថយន្ត​កំពុង​លក់​បាន​ថយ​ចុះ​ប្រមាណ ៦០ ភាគរយ​ធៀប​នឹង​ឆ្នាំ ២០១២។

លោក​ថា៖ «កាល​ពី​ដើម​ឆ្នាំ​នេះ ការ​លក់​ដូរ​មាន​ដំណើរការ​ល្អ។ ប៉ុន្តែ​នៅ​ឆមាស​ទីពីរ ចាប់​តាំង​មាន​ការ​រៀបចំ​បោះឆ្នោត និង​បន្ទាប់​ពី​ក្រោយ​ពេល​បោះឆ្នោត​រហូត​មក​ដល់​ពេល​នេះ អាជីវកម្ម​មិន​ដំណើរការ​ល្អ​ទេ​ដោយ​សារ​ការ​បោះឆ្នោត និង​ការ​ធ្វើ​បាតុកម្ម​ដ៏​ធំ»។

លោក​បង្ហាញ​ពី​ការ​បារម្ភ​អំពី​ការ​លក់​នៅ​ឆ្នាំ​នេះ​ដូច្នេះ​ថា៖ «វា​អាស្រ័យ​លើ​ស្ថានភាព​នយោបាយ និង​ការ​គាំទ្រ​រដ្ឋាភិបាល​ដល់​ឧស្សាហកម្ម​រថយន្ត»។ លោក​និយាយ​សំដៅ​ទៅ​លើ​ការ​នាំ​ចូល​រថយន្ត​ក្រៅ​ផ្លូវ​ការ​ដែល​បាន​បង្ក​ឲ្យ​មាន​ការ «ប្រកួត​ប្រជែង​មិន​មាន​យុត្តិធម៌» សម្រាប់​ក្រុមហ៊ុន​ចែក​ចាយ​ដែល​មាន​អាជ្ញាប័ណ្ណ។ លោក​ថា៖ «នេះ​គឺជា​បញ្ហា​ដ៏​ធំ​មួយ​សម្រាប់​ក្រុមហ៊ុន​ដូច​ពួក​យើង។ យើង​មាន​ជំនាញ​ក្នុង​ការ​នាំ​ចូល ហើយ​យើង​គឺជា​ក្រុមហ៊ុន​ចែក​ចាយ​មាន​អាជ្ញាប័ណ្ណ។ យើង​ត្រូវ​តែ​វិនិយោគ​ទឹក​ប្រាក់​ក្នុង​ចំនួន​ច្រើន​ដើម្បី​បង្កើន ការ​ជួយ​សម្រួល​បាន​ល្អ​ក្នុង​ការ​បណ្ដុះ​បណ្ដាល​បុគ្គលិក​របស់​យើង ថែម​ទាំង​វិនិយោគ​លើ​ឧបករណ៍ និង​កុំព្យូទ័រ​ដើម្បី​ត្រួត​ពិនិត្យ​រថយន្ត»។

ទាំង​លោក Peter និង​លោក Pily ស្នើ​សុំ​ឲ្យ​រដ្ឋាភិបាល​ដាក់​ចេញ​បទ​បញ្ញត្តិ​គ្រប់ គ្រង​លើ​ការ​នាំ​ចូល​រថយន្ត​ក្រៅ​ផ្លូវ​ការ​ដើម្បី​ការពារ​ឧស្សាហកម្ម​នេះ។

ទិន្នន័យ​ក្រសួង ពាណិជ្ជកម្ម បង្ហាញ​ថា កម្ពុជា​ចំណាយ​ប្រាក់​ជាង ៥១៨ លាន​ដុល្លារ​ក្នុង​ការ​នាំ ចូល​រថយន្ត​សរុប ៧០១ ៥២៥ គ្រឿង​ក្នុង​រយៈ​ពេល ៩ខែ ឆ្នាំ ២០១៣ ធៀប​នឹង ១ ៦៦៤ ៧១២ គ្រឿង​តម្លៃ ៤២១ លាន​ដុល្លារ​ក្នុង​ឆ្នាំ ២០១២៕PB

អត្ថបទគួរចាប់អារម្មណ៍