ភ្នំពេញៈ ស្ករត្នោតកំពង់ស្ពឺដែលទទួលបានលិខិតបញ្ជាក់ផលិតផលសម្គាល់ទីតាំងភូមិសាស្រ្ត (GI)បានលក់ចេញចំនួន១២ តោននៅដំណាច់រដូវប្រមូលផលឆ្នាំនេះ គឺមានការថយចុះប្រមាណ៣០ភាគរយ បើធៀបនឹងរដូវប្រមូលផលកាលពីឆ្នាំមុន។
លោក ចន សុខា ទីប្រឹក្សាសមាគមអភិវឌ្ឍន៍ និងលើកកម្ពស់ស្ករត្នោតកំពង់ស្ពឺបានឲ្យដឹងថា ជាទូទៅរដូវកាលផលិតស្ករត្នោត GI គឺចាប់ផ្តើមពីខែ វិច្ឆិកាដល់ខែឧសភា ហើយផលិតកម្មនៅឆ្នាំនេះហាក់មានការថយចុះបន្តិចបន្តួចស្របពេលដែលគ្រួសារមួយចំនួនចាប់ផ្តើមងាកចេញពីការផលិតស្ករត្នោតប្រភេទ GI ទៅផលិតប្រភេទធម្មតាវិញ ព្រោះមិនសូវមានភាពស្មុគស្មាញនិងត្រូវចំណាយពេលតិចជាង។ លោកបានបន្តថា៖ «ផលិតផលស្ករត្នោតប្រភេទ GI នៅតែមានបញ្ហាប្រឈមជាច្រើនក្នុងការប្រកួតប្រជែងជាមួយប្រភេទស្ករត្នោតធម្មតា។ តម្លៃក៏ថ្លៃជាងស្ករធម្មតា ហើយការទទួលស្គាល់ពីគុណភាពរបស់វាក៏នៅមានកម្រិតនៅឡើយ»។
ស្ករត្នោត GI លក់នៅលើទីផ្សារមានពីរប្រភេទសំខាន់ៗ គឺ ស្ករម្សៅ និង ស្ករផែន។ នៅឆ្នាំនេះ ស្ករម្សៅលក់ក្នុងតម្លៃ ៦ ០០០ រៀលក្នុងមួយគីឡូក្រាម គឺកើនឡើងពីត្រឹម៤ ៥០០ រៀលក្នុងមួយគីឡូក្រាមកាលពីឆ្នាំមុន។ រីឯតម្លៃស្ករត្នោតប្រភេទស្ករផែន បានកើនឡើងផងដែរ គឺមានតម្លៃ៤ ០០០ រៀលក្នុងមួយគីឡូក្រាម កើនឡើង៥០០ រៀលពីតម្លៃកាលពីឆ្នាំមុន។
យោងតាម លោក សំ សារឿន ប្រធានសមាគមអភិវឌ្ឍន៍ និង លើកកម្ពស់ស្ករត្នោតកំពង់ស្ពឺថាមានមូលហេតុមួយទៀតដែលធ្វើឲ្យចំនួននៃការលក់ចេញមានការថយចុះក៏អាច បណ្តាលពីការកុម្ម៉ង់ទិញយឺតនាឆ្នាំនេះផងដែរ ព្រោះថា មានក្រុមហ៊ុន ពីរ ទៅ បី ទើបតែបញ្ជាទិញនៅខែមេសានិងឧសភាដែលសមាគមមិនអាចផលិតទាន់។
លោកបានបន្ថែមទៀតថា៖ «ប្រសិនបើពួកគេមករកទិញតាំងពីដើមរដូវ យើងនឹងអាចទទួលការកុម្ម៉ង់នេះបានហើយការលក់ចេញនឹងអាចមានចំនួនច្រើនជាងនេះផងដែរ»។
សម្រាប់គ្រួសារដែលជាសមាជិកក្នុងសមាគមនេះផលិតកម្មស្ករត្នោតគឺជាមុខរបរសំខាន់ទី២ បន្ទាប់ពីដំណាំស្រូវ។ បច្ចុប្បន្ននេះ សមាគមអភិវឌ្ឍន៍ស្ករត្នោតខេត្តកំពង់ស្ពឺ មានសមាជិកសរុប ១៤២ គ្រួសារដែលផលិតស្ករត្នោត GI គឺបានថយចុះពី ១៧២ គ្រួសារកាលពីឆ្នាំមុន។ស្ករត្នោត GI គ្របដណ្តប់ចំនួនស្រុកពីរនៅខេត្តកំពង់ស្ពឺគឺស្រុកឧដុង្គ និង ស្រុកសំរោងទង។
លោក ស៊ូ សាវ៉ន នាយកប្រតិបត្តិ សហគ្រាសសេដាកដែលសហគ្រាសរបស់លោកបានដាក់លក់ស្ករត្នោត GI បានលើកឡើងថា ជាទូទៅអ្នកប្រើប្រាស់ជាច្រើននៅតែមិនទាន់បានដឹងពីលក្ខណពិសេសនៃគុណភាពរបស់ស្ករត្នោតដែលទទួលបានលិខិតបញ្ជាក់ GI នេះនៅឡើយ។
លោកថ្លែងថា៖ «វាអាចជាក្តីបារម្ភដែរនៅពេលដែលផលិតកម្មចាប់ផ្តើមធ្លាក់ចុះ។ វាជាការល្អប្រសិនបើផលិតផលនេះទទួលបានការយកចិត្តទុកដាក់បន្ថែមទៀតក្នុងការផ្សព្វផ្សាយពីគុណសម្បត្តិរបស់វា»៕
