The Phnom Penh Post Search

Search form




Logo of Phnom Penh Post newspaper Phnom Penh Post - ការ​វិនិយោគ​លើ​ដំណាំ​កៅស៊ូ​នៅ​កម្ពុជា​កាន់​តែ​រីក​ធំ

ការ​វិនិយោគ​លើ​ដំណាំ​កៅស៊ូ​នៅ​កម្ពុជា​កាន់​តែ​រីក​ធំ

ការ​វិនិយោគ​លើ​ដំណាំ​កៅស៊ូ​នៅ​កម្ពុជា​កាន់​តែ​រីក​ធំ

140211_11
កម្មករធ្វើការនៅក្នុងកសិដ្ឋានបណ្តុះកូនកៅស៊ូរបស់ក្រុមហ៊ុនឯកជនមួយនៅខេត្តរតនគិរី នាពេលកន្លងមក រូបថត ហេង ជីវ័ន

ភ្នំពេញៈ របាយ​ការណ៍​ប្រចាំ​ឆ្នាំ​របស់​ក្រសួង កសិកម្ម រុក្ខា​ប្រមាញ់ និង​នេសាទ បាន​បង្ហាញ​ថា ផ្ទៃ​ដី​ដាំ​ដុះ​កៅស៊ូ​សរុប​នៅ កម្ពុជា នៅ​ក្នុង​ឆ្នាំ ២០១៣ បាន​កើន​ដល់ ៣២៥ ៩០៥ ហិកតា ជា​តួលេខ​ដែល​កើន ១៦,៣៦ ភាគរយ ធៀប​និង​ឆ្នាំ ២០១២ នៅ​ពេល​ដែល​ផ្ទៃ​ដី​ដាំ​ដុះ​កៅស៊ូ​សរុប​មាន​ត្រឹម ២៨០ ៣៥៥ ហិកតា។

ក្នុង​នោះ​ផ្ទៃ​ដី​ដាំ​ដុះ​ជា​ការ​វិនិយោគ​ឯកជន​មាន​ចំណែក ១៧ ភាគរយ និង​ផ្ទៃ​ដី​ដាំ​ដុះ​ជា​លក្ខណៈ​គ្រួសារ​មាន​ចំណែក ៤១ ភាគរយ កំពុង​ផ្តល់​ជ័រ​កៅស៊ូ ខណៈ​ផ្ទៃ​ដី​ដាំ​ដុះ ៤២ ភាគរយ​ទៀត​ជា​ដី​សម្បទាន​សេដ្ឋកិច្ច​ផ្តល់​ដោយ​រដ្ឋាភិបាល​ដល់​ក្រុមហ៊ុន​វិនិយោគ​បរទេស។

លោក ម៉ែន សុភ័ក្រ អគ្គ​នាយក​រង​ចម្ការ​កៅស៊ូ ជប់ ជា​ក្រុមហ៊ុន​នាំ​ចេញ​កៅស៊ូ​ធំ​មួយ​នៅ​កម្ពុជា​បាន​ឲ្យ​ដឹង​ថា ផ្ទៃ​ដី​ដាំ​ដុះ​ដែល​មាន​ការ​កើន​ឡើង​នេះ​ឆ្លុះ​បញ្ចាំង​ពី​សក្តានុពល​រយៈ​ពេល​វែង​នៃ​ដំណាំ​កសិ-ឧស្សាហកម្ម​នេះ។ លោក​សង្កេត​ឃើញ​តួលេខ​វិនិយោគ​លើ​ដំណាំ​កៅស៊ូ​ជា​លក្ខណៈ​គ្រួសារ​មាន​ការ​កើន​ឡើង បន្ទាប់​ពី​ប្រជា​ពលរដ្ឋ​ទទួល​បាន​ប្លង់​កម្មសិទ្ធិ​ដី​ស្រប​ច្បាប់។

លោក​ថ្លែង​ថា៖ «ការ​មាន​ប្លង់​កម្ម​សិទ្ធិ​ដី​នៅ​ក្នុង​ដៃ​ធ្វើ​ឲ្យ​ប្រជា​ពលរដ្ឋ​មាន​ទំនុក​ចិត្ត​ក្នុង​ការ​វិនិយោគ។ ណា​មួយ​ពួក​គាត់​ឃើញ​ថា ការ​ដាំ​កៅស៊ូ​ផ្តល់​ផល​ច្រើន​ជាង​ការ​ដាំ​ដំណាំ​ផ្សេងៗ ដោយ​សារ​កៅស៊ូ​លក់​មាន​តម្លៃ​ល្អ​ជាង​ដំណាំ​ផ្សេងៗ»។

លោក​បន្ត​ថា បើ​ទោះ​បី​ជា​តម្លៃ​កៅស៊ូ​មាន​ការ​ធ្លាក់​ចុះ​ច្រើន​នៅ​ឆ្នាំ​មុន​ក៏​ដោយ​ក៏​កសិករ​នៅ​តែ​អាច​ចំណេញ។ តម្លៃ​កៅស៊ូ​ពេល​បច្ចុប្បន្ន​ថ្លៃ ២ ២០០ ដុល្លារ​ក្នុង​មួយ​តោន ធ្លាក់​ចុះ​ពី​តម្លៃ ៣ ១០០ ដុល្លារ កាល​ពី​ដើម​ឆ្នាំ ២០១៣។

នៅ​ឆ្នាំ ២០១៣ កម្ពុជា​បាន​នាំ​ចេញ​កៅស៊ូ​សរុប​ចំនួន ៧៤ ១៩៨ តោន មាន​តម្លៃ​ជា​ទឹក​ប្រាក់ ១៧០ លាន​ដុល្លារ។ របាយ​ការណ៍​សរសេរ​ទៀត​ថា ដំណាំ​កៅស៊ូ​នៅ​លើ​ដី​សម្បទាន​សេដ្ឋកិច្ច​ដែល​មាន​ទំហំ ១៣៥ ៤៤៦ ហិកតា ស្មើ​នឹង ៤២ ភាគរយ​នៃ​ផ្ទៃ​ដី​ដាំ​ដុះ​សរុប​នោះ នៅ​មិន​ទាន់​ផ្តល់​ជា​ផលិតផល​កៅស៊ូ​ឬ​ផ្តល់​ចំណូល​ដល់​សេដ្ឋកិច្ច​ជាតិ​នៅ​ឡើយ​ទេ។

តួ​លេខ​ពី​ក្រសួង កសិកម្ម បង្ហាញ​ថា រហូត​មក​ដល់​ខែ មិថុនា ឆ្នាំ ២០១២ រដ្ឋាភិបាល​កម្ពុជា​បាន​ផ្តល់​ដី​សម្បទាន​សេដ្ឋកិច្ច​សរុប​ចំនួន ១ ២០៤៧៥០ ហិកតា ដល់​ក្រុមហ៊ុន​ឯកជន ១១៨ ក្រុមហ៊ុន។

តាម​គេហទំព័រ​របស់​ក្រសួង កសិកម្ម រុក្ខា​ប្រមាញ់ និង​នេសាទ​សរសេរ​ថា រដ្ឋាភិបាល​ផ្តោត​ទៅ​លើ​ការ​វិនិយោគ​ទៅ​លើ​ដី​សម្បទាន​សេដ្ឋកិច្ច​ត្រូវ​បាន​ផ្តល់​ទៅ​ឲ្យ​ក្រុមហ៊ុន​ឯកជន​ដើម្បី​ដាំ​ដុះ​ដំណាំ​កសិកម្ម និង កសិ-ឧស្សាហកម្ម​ផ្សេងៗ​សម្រាប់​ការ​នាំ​ចេញ​ដោយ​រំពឹង​ថា ការ​ផ្តល់​ដី​សម្បទាន​សេដ្ឋកិច្ច​នេះ​នឹង​បង្កើត​ការងារ​ប្រាក់​ចំណូល​ដល់​ប្រជាជន​រស់​នៅ​ក្នុង​សហគមន៍​នោះ។

ផ្ទុយ​ពី​ការ​រំពឹង​ទុក​ការ​ផ្តល់​ដី​សម្បទាន​សេដ្ឋកិច្ច​មិន​បាន​ធ្វើ​ឲ្យ​ជីវភាព​ប្រជាជន​ប្រសើរ​ឡើង​នោះ​ទេ។

លោក អ៊ូច ឡេង មន្ត្រី​កម្មវិធី​ដីធ្លី របស់​អង្គការ អាដហុក បាន​ឲ្យ​ដឹង​ថា ប្រជា​ពលរដ្ឋ​ប្រមាណ ១៥ ម៉ឺន​គ្រួសារ​នៅ​ក្នុង ១៧ ខេត្ត ក្រុង កំពុង​រងគ្រោះ​ដោយសារ ដី​សម្បទាន​សេដ្ឋកិច្ច។

លោក​បាន​បន្ត​ថា៖ «ការ​សម្បទាន​ដី​សេដ្ឋកិច្ច​មិន​បាន​ធ្វើ​ឲ្យ​ជីវិត​ពួក​គាត់​ប្រសើរ​ឡើង នោះ​ទេ។ ប្រជា​ពលរដ្ឋ និង​ជនជាតិ​ដើម​រស់​នៅ​អាស្រ័យ​ដី និង​ព្រៃឈើ។ នៅ​ពេល​ដែល​មិន​មាន​ដី មិន​មាន​ព្រៃ ឲ្យ​គាត់​រស់​យ៉ាង​ណា?»។

លោក​បន្ថែម​ថា កន្លង​មក​លោក​មិន​ឃើញ​ថា អាជ្ញាធរ​បាន​ផ្តល់​ដំណោះស្រាយ​សមស្រប​ដល់​ប្រជា​ពលរដ្ឋ​ដែល​ត្រូវ បាត់បង់​ដី​ធ្លី ឬ​ត្រូវ​ប្រឈម​នឹង​ការ​ជម្លៀស​ចេញ​នោះ​ទេ។

បើ​តាម​ការ​ឲ្យ​ដឹង​ពី លោក អ៊ូច ឡេង តំបន់​ដែល​កំពុង​មាន​បញ្ហា​ទំនាស់​ដីធ្លី​ដ៏​ក្តៅ​គគុក​ដោយ​ការ​ផ្តល់​ដី​សម្បទាន​សេដ្ឋកិច្ច មាន​ដូចជា ខេត្ត រតនគិរី មណ្ឌលគិរី ក្រចេះ ព្រះវិហារ កំពង់ស្ពឺ និង​ខេត្ត កោះកុង ជាដើម។

លោក ស្រី ចន្ធី អ្នក​វិភាគ​សេដ្ឋកិច្ច​ឯករាជ្យ​បាន​មាន​ប្រសាសន៍​ថា ការ​ផ្តល់​ដី​សម្បទាន​សេដ្ឋកិច្ច​សម្រាប់​ដាំដុះ​ដំណាំ​កៅស៊ូ អាច​រក​ចំណូល​ដល់​សេដ្ឋកិច្ច​ជាតិ តាម​រយៈ​ការ​ប្រមូល​ពន្ធ​ដី​ពន្ធ​ពី​លើ​ការ​នាំ​ចេញ​ឈើ​ដែល​មាន​នៅ​លើ​ដី​សម្បទាន​នោះ​ស្រាប់ និង​នៅ​ពេល​ដែល​ជ័រ​កៅស៊ូ​ត្រូវ​បាន​នាំ​ចេញ​ជាដើម។

លោក​បាន​អះអាង​ថា បើ​ទោះ​បី​ដំណាំ​កៅស៊ូ​នៅ​លើ​ដី​សម្បទាន​សេដ្ឋកិច្ច​មិន​ទាន់​ផ្តល់ ចំណូល​ដល់​រដ្ឋ​នៅ​ឡើយ តែ​វា​បាន​បង្កើត​ការងារ​ដល់​កម្មករ​នៅ​ក្នុង​រយៈ​ពេល​ដាំ​ដុះ ហើយ​លោក​បាន​ព្យាករ​ថា នៅ​ក្នុង​រង្វង់ ១៥ ឆ្នាំ​ខាង​មុខ​នេះ ផលិតផល​កៅស៊ូ​នឹង​អាច​ក្លាយ​ជា​វិស័យ​ដែល​ជួយ​ជំរុញ​សេដ្ឋកិច្ច​ជាតិ​ខ្លាំង​ជាង​វិស័យ​ស្រូវ​អង្ករ​ទៅ​ទៀត។

ប៉ុន្តែ​លោក ស្រី ចន្ធី បាន​បញ្ជាក់​ថា ដី​សម្បទាន​សេដ្ឋកិច្ច​គួរ​តែ​ធ្វើ​ឡើង​នៅ​លើ​ដី​ព្រៃ​ដែល​រេចរឹល​មិន​គួរ​ផ្តល់​ព្រៃ​ស្តុក​ជា​ដី​សម្បទាន​នោះ​ទេ។ លោក​បាន​ថ្លែង​ថា៖ «ការ​កាប់​ព្រៃ​ក្រាស់​ដើម្បី​ដាំ​កៅស៊ូ​អាច​ធ្វើ​ឲ្យ​ខូច​ដល់​ជីវចម្រុះ»។

លោក​បាន​បន្ថែម​ថា ផ្តល់​ដី​សម្បទាន​ដែល​សមស្រប អាច​នាំ​ប្រយោជន៍​ដល់​សេដ្ឋកិច្ច​ជាតិ​ច្រើន។

របាយ​ការណ៍​ព្យាករ​ថា ផ្ទៃ​ដី​ដាំដុះ​កៅស៊ូ​នៅ​កម្ពុជា​អាច​នឹង​កើន​ដល់​ប្រមាណ ៤៥ ម៉ឺន​ហិកតា​នៅ​ឆ្នាំ ២០២០ ដែល​នឹង​អាច​ផ្តល់​ជ័រ​កៅស៊ូ​ប្រមាណ ៤០ ទៅ ៥០ ម៉ឺន​តោន​ក្នុង​មួយ​ឆ្នាំៗ។

ផលិតផល​កៅស៊ូ​ពាក់​កណ្តាល​សម្រេច​របស់ កម្ពុជា ត្រូវ​បាន​នាំ​ចេញ​ទៅ​កាន់​ប្រទេស ចិន ជា​ទីផ្សារ​ធំ ដែល​ឆ្លង​កាត់​ប្រទេស ម៉ាឡេស៊ី សិង្ហបុរី និង វៀតណាម ហើយ​ក៏​មាន​មួយ​ចំនួន​តូច​ទៅ​ដល់​សហគមន៍​អឺរ៉ុប​ផង​ដែរ។

បច្ចុប្បន្ន​កម្ពុជា​មាន​រោងចក្រ​សិប្បកម្ម​កែច្នៃ​ផលិត​ផល​កៅស៊ូ​ចំនួន ៦០។

លោក ម៉ែន សុភ័ក្រ រំពឹង​ទុក​ថា ការ​នាំ​កៅស៊ូ​ចេញ នៅ​ឆ្នាំ​នេះ​នឹង​កើន ១៥ ភាគរយ៕

អត្ថបទគួរចាប់អារម្មណ៍