ភ្នំពេញៈ រោងចក្រចម្រាញ់ប្រេងនៅ កម្ពុជា តម្លៃ ២,៣ ពាន់លានដុល្លារបានពន្យារពេលបុកគ្រឹះសាងសង់ទៅពាក់កណ្តាល ខែវិច្ឆិកា ឆ្នាំនេះវិញ ដោយសារបញ្ហាបច្ចេកទេស។ នេះបើតាមការឲ្យដឹងពីក្រុមហ៊ុន Cambodia Petrochemical Company (CPC) ជាអ្នកតំណាងដៃគូគម្រោងនៅ កម្ពុជា។
លោក ហាន ឃាង សហប្រធាននិងអ្នកតំណាងក្រុមហ៊ុន CPC ឲ្យដឹងថា ក្រុមការងារកំពុងសិក្សារៀបចំប្លង់លម្អិតរោងចក្រដើម្បីដាក់ជូនក្រសួងពាក់ព័ន្ធសុំការអនុញ្ញាតសាងសង់។ លោកថ្លែងថា៖ «យើងមានគម្រោងបឋមរបស់រោងចក្ររួចហើយ ហើយក៏បានចាប់ផ្តើមចាក់ដីបំពេញបន្ថែមខ្លះនៅតំបន់នោះ។ ឥឡូវយើងកំពុងរៀបចំប្លង់លម្អិតរោងចក្រដើម្បីឲ្យក្រសួងពាក់ព័ន្ធពិនិត្យសម្រេចលើការសាងសង់។
ខ្ញុំជឿថា យើងអាចបុកគ្រឹះនៅពាក់កណ្តាល ខែវិច្ឆិកា»។
លោកបន្ថែមថា រោងចក្រចម្រាញ់ប្រេងនេះនឹងត្រូវសាងសង់នៅលើផ្ទៃដី ៨០ ហិកតានៅចន្លោះ ខេត្តកំពត និង ព្រះសីហនុ ហើយរំពឹងថា នឹងបញ្ចប់ការសាងសង់នៅចុង ឆ្នាំ២០១៦ ខាងមុខ។
រោងចក្រចម្រាញ់ប្រេងនេះជាការវិនិយោគរួមរវាងក្រុមហ៊ុន Cambodia Petrochemical Company (CPC), ក្រុមហ៊ុន Chinese Sinomach China Perfect Machinery Industry Corp និងក្រុមហ៊ុន Sinopec។
តាមការឲ្យដឹងពីលោក ហាន ឃាង រោងចក្រចម្រាញ់ប្រេងនេះនឹងមានលទ្ធភាពចម្រាញ់ប្រេងបាន ៥ លានតោនក្នុងមួយឆ្នាំ។ ក្រុមហ៊ុននឹងនាំចូលប្រេងពី ប្រទេសអារ៉ាប់ ដើម្បីចម្រាញ់។ លោកបន្តថា៖ «២ ភាគ ៣ នៃផលិតផលប្រេងសរុបនឹងត្រូវចែកចាយទៅទីផ្សារក្នុងស្រុក ហើយ ១ ភាគ ៣ នឹងត្រូវនាំចេញក្រៅប្រទេស»។
រោងចក្រចម្រាញ់ប្រេងនេះត្រូវបានពន្យារពេលពីរលើកមកហើយ បន្ទាប់ពីគ្រោងសាងសង់លើកដំបូងនៅដើម ឆ្នាំ២០១៣ និងលើកទីពីរនៅ ខែធ្នូ ឆ្នាំដដែលដោយសារមូលហេតុកង្វះទុននិងទុកពេលដើម្បីបញ្ចប់ការសិក្សាលើផលប៉ះពាល់ដល់បរិស្ថាន។
លោកស្រី គឹម ណាតាសា នាយកប្រតិបត្តិនៃសម្ព័ន្ធភាពកម្ពុជាដើម្បីតម្លាភាពចំណូលធនធាន ឲ្យដឹងថា រោងចក្រចម្រាញ់ប្រេងនេះនឹងជួយឲ្យ កម្ពុជា ត្រៀមខ្លួននៅពេលដែលមានលទ្ធភាពបូមប្រេងបាន ប៉ុន្តែថា ផលប៉ះពាល់បរិស្ថានដែលអាចបង្កឡើងដោយរោងចក្រនេះត្រូវតែឆ្លងកាត់ការវាយតម្លៃដោយហ្មត់ចត់។ លោកស្រីបន្តថា៖ «យើងពឹងផ្អែកលើការនាំចូលប្រេងពីក្រៅប្រទេស ប៉ុន្តែការមានរោងចក្រចម្រាញ់នឹងជួយប្រទេសយើងឲ្យរៀបចំមុននឹងយើងអាចមានលទ្ធភាពបូមប្រេងតែការវាយតម្លៃផលប៉ះពាល់បរិស្ថានត្រូវតែធ្វើឡើងដើម្បីកាត់បន្ថយផលប៉ះពាល់ដល់មនុស្ស និងសង្គម»៕
