The Phnom Penh Post Search

Search form




Logo of Phnom Penh Post newspaper Phnom Penh Post - ការ​ហោះ​ហើរ​របស់​កាតា​នឹង​នាំ​ទេសចរ​វិនិយោគ​ឲ្យ​កម្ពុជា

ការ​ហោះ​ហើរ​របស់​កាតា​នឹង​នាំ​ទេសចរ​វិនិយោគ​ឲ្យ​កម្ពុជា

ការ​ហោះ​ហើរ​របស់​កាតា​នឹង​នាំ​ទេសចរ​វិនិយោគ​ឲ្យ​កម្ពុជា

130219_12
គំរូយន្តហោះរបស់ក្រុមហ៊ុនអាកាសចរណ៍កាតា អ៊ែរវ៉េ ត្រូវបានដាក់តាំងបង្ហាញនៅរដ្ឋតិចសាស់ bloomberg

ភ្នំពេញៈ ក្រុមហ៊ុន​អាកាស​ចរណ៍​កាតា អ៊ែរវ៉េ (Qatar Airway) គឺជា​ក្រុមហ៊ុន​អាកាស​ចរណ៍​មក​ពី​មជ្ឈិម​បូព៌ា​ដំបូង​បង្អស់​ដែល​នឹង​ចាប់​ផ្តើម​ការ​ហោះ​ហើរ​ពី​ក្រុង​ដូហា​មក​កម្ពុជា​នៅ​ថ្ងៃ​ស្អែក​នេះ​។

មន្រ្តី​បាន​អប​អរ​សាទរ​ចំពោះ​ការ​ហោះ​ហើរ​ថ្មី​នេះ​ដោយ​បាន​និយាយ​ថា​វា​នឹង​ជំរុញ​វិស័យ​ទេសចរណ៍​និង​វិនិយោគិន​មក​ពី​មជ្ឈិមបូព៌ា​ចូល​មក​ក្នុង​ប្រទេស​កម្ពុជា​។យោង​តាម​សេចក្ដី​ប្រកាស​ព័ត៌មាន ភ្នំពេញ​ជា​ទិស​ដៅ​ចុង​ក្រោយ​របស់​ក្រុមហ៊ុន​អាកាស​ចរណ៍ កាតា អ៊ែរវ៉េ នៅ​ក្នុង​តំបន់​អាស៊ាន​ហើយ​ភ្នំពេញ​ក៏​ជា​ផ្លូវ​ហោះ​ហើរ​ទី​១១​របស់​ក្រុមហ៊ុន​អាកាស​ចរណ៍​នេះ​នៅ​ក្នុង​សមាគម​នៃ​បណ្តា​ប្រទេស​អាស៊ាន​ផង​ដែរ​បន្ទាប់​ពី​ក្រុម​ហ៊ុន​បាន​ចាប់​ផ្ដើម​ដំណើរ​ការ​ជោគ​ជ័យ​ក្នុង​ការ​ហោះ​ហើរ​ចេញ​ពី​ទីក្រុង​គូឡា​ឡាំពួ បាងកក​បាលី ក្រុង​ហូជីមិញ ហ្សាការតា ហាណូយ សិង្ហបុរី ម៉ានីល ភូកេត និង​យ៉ាំង​ហ្គោន​។

លោក Akbar Al Baker​ប្រធាន​ប្រតិបត្តិ​របស់​ក្រុមហ៊ុន កាតា អ៊ែរវ៉េ បាន​និយាយ​ថា​ជើង​ហោះ​ហើរ​ប្រចាំ​ថ្ងៃ​ពី​ទីក្រុង​ដូហា ប្រទេស​កាតា ឆ្ពោះ​មក​រាជធានី​ភ្នំពេញ​នឹង​ផ្ដល់​ឱកាស​កាន់​តែ​ច្រើន​ចំពោះ​អ្នក​ដំណើរ​ពី​អឺរុប មជ្ឈិម​បូព៌ា និង​អាមេរិក​ខាង​ជើង។

លោក​លើក​ឡើង​ក្នុង​សេចក្ដី​ប្រកាស​ព័ត៌មាន​ថា៖ «​នៅ​ពេល​ដែល​យើង​ពង្រីក​កម្មវិធី​ហោះ​ហើរ​ពេញ​ពិភពលោក​យើង​មាន​សេចក្ដី​រីករាយ​ក្នុង​ការ​ផ្ដល់​ដល់​អតិថិជន​របស់​យើង​ដែល​រង់​ចាំ​ការ​ត​ភ្ជាប់​ទៅ​ប្រទេស​អាស៊ី​មួយ​ក្នុង​ចំណោម​ប្រទេស ដែល​ជា​ទិស​ដៅ​ពេញ​និយម​បំផុត​»​។ លោក​បន្ត​ថា​៖​«​យើង​ទន្ទឹង​រង់​ចាំ​ដើម្បី​ប្រារព្ធ​ពិធី​នៃ​ការ​មក​ដល់​របស់​យើង​ក្នុង​ប្រទេស​កម្ពុជា​យើង​នឹង​ធ្វើ​ការ​ងារ​របស់​យើង​ដើម្បី​ជួយ​ជំរុញ​បន្ថែម​ដល់​ឧស្សាហកម្ម​ទេសចរណ៍ ដែល​ជា​អ្នក​ផ្ដល់​ចំណូល​ធំ​ទី២​របស់​ប្រទេស​នេះ​»​។

លោក​បន្ថែម​ថា​ការ​ហោះ​ហើរ​របស់​ក្រុមហ៊ុន​អាកាស​ចរណ៍​កាតា អ៊ែរ​វ៉េ​ពី​ដូហា មក​ភ្នំពេញ​នឹង​បើក​ដំណើរ​ការ​ជាមួយ​យន្ត​ហោះ​ប្រភេទ A330 ដែល​មាន​កៅអី​២៤៨​សម្រាប់​(Economy Class)និង​ប្រភេទ Business Class មាន​កៅអី​ចំនួន​៣៦​។

ជើង​ហោះ​ហើរ​នឹង​ចាប់​ផ្ដើម​តាម​រយៈ​ក្រុង​ហូជីមិញ​។

លោក ថោង ខុន រដ្ឋ​មន្រ្តី​ក្រសួង​ទេសចរណ៍​បាន​មាន​ប្រសាសន៍​ថា កាតា​គឺជា​ប្រទេស​មួយ​នៅ​មជ្ឈិម​បូព៌ា​ដែល​ទាក់​ទាញ​អ្នក​ទេសចរ​បរទេស​ជាច្រើន​រាល់​ឆ្នាំ។​លោក​បាន​បន្ត​ទៀត​ថា៖ «អាកាសចរណ៍​កាតា​អ៊ែរវ៉េ គឺជា​ប្រភេទ​ក្រុមហ៊ុន​អាកាស​ចរណ៍​ដែល​មាន​គុណភាព​ខ្ពស់​បំផុត​»​។

លោក គង់ សុភារៈ ប្រធាន​នាយក​ដ្ឋាន​ស្ថិតិ​នៅ​ក្រសួង​ទេសចរណ៍​បាន​និយាយ​ថា​ចំនួន​អ្នក​ទេសចរ​មក​ពី​មជ្ឈិម​បូព៌ា​គឺ​មាន​ចំនួន​ទាប​នៅ​ឡើយ​ប៉ុន្តែ​លោក​និយាយ​ថា​ការ​ភ្ជាប់​ទំនាក់​ទំនង​ជា​ការ​រួម​វិភាគ​ទាន​ដ៏​ធំ​សម្រាប់​ទាំង​វិស័យ​ទេសចរណ៍ និង​ការ​វិនិយោគ​។

លោក​បាន​បន្ត​ថា៖ «​យើង​ពិត​ជា​មាន​សេចក្ដី​រីក​រាយ​ដែល​មាន​ការ​ភ្ជាប់​ជើង​ហោះ​ហើរ​ទោះ​ជា​ពួក​គេ​បាន​រួម​ចំណែក​តូច​មួយ​ខាង​វិស័យ​ទេសចរណ៍​នៅ​ពេល​នេះ​ក៏​ដោយ​។​ប៉ុន្តែ​ខ្ញុំ​អាច​សង្ឃឹម​ថា​យើង​នឹង​ទទួល​បាន​ការ​កើន​ឡើង​ដ៏​ធំ​មួយ​ក្នុង​ពាណិជ្ជកម្ម​និង​ការ​វិនិយោគ​ពី​ពួក​គេ​ព្រោះ​ពួក​គេ​មាន​ចំណាប់​អារម្មណ៍​នៅ​ក្នុង​វិស័យ​កសិកម្ម​របស់​យើង​»។

កាល​ពី​ខែ​កញ្ញា ឆ្នាំ​២០១២ រដ្ឋ​មន្ត្រី​ក្រសួង​ពាណិជ្ជកម្ម​កម្ពុជា​ឲ្យ​ដឹង​ថា​មជ្ឈិម​បូព៌ា​នឹង​ក្លាយ​ជា​ទី​ផ្សារ​នាំ​ចេញ​ដ៏​ធំ​សម្រាប់​អង្ករ​របស់​កម្ពុជា​ក្នុង​ឆ្នាំ​ខាង​មុខ​នេះ៕ PB

អត្ថបទគួរចាប់អារម្មណ៍