ភ្នំពេញ: NagaCorp ជាក្រុមហ៊ុនមេរបស់ក្រុមហ៊ុន NagaWorld ដែលជាប្រតិបត្តិករកាស៊ីណូតែ ១ គត់នៅទីក្រុងភ្នំពេញបានរាយការណ៍ពីការស្ទុះងើបឡើងវិញដ៏ល្អនៃប្រតិបត្តិការអាជីវកម្មរបស់ខ្លួនដែលត្រូវបានរងផលប៉ះពាល់យ៉ាងខ្លាំងដោយការរីករាលដាលជំងឺកូវីដ ១៩ ក្នុងរយៈពេលជាច្រើនខែ។
របាយការណ៍ហិរញ្ញវត្ថុរបស់ក្រុមហ៊ុននេះបានឱ្យដឹងថា ក្នុងអំឡុងពេល ៦ ខែគិតត្រឹមថ្ងៃទី ៣០ ខែ មិថុនា ឆ្នាំ ២០២០ ប្រាក់ចំណេញសុទ្ធមានចំនួន ២០,៦ លានដុល្លារអាមេរិក។ ប្រាក់ចំណូលការលេងល្បែងភ្នាល់ដុល (GGR) នៅឆមាសទី ១ ឆ្នាំ ២០២០ មានចំនួន ៣៧២ លានដុល្លារអាមេរិក។
លោកប្រធាន Timothy Patrick McNally បានឱ្យដឹងនៅក្នុងរបាយការណ៍នេះថា៖ «យើងសម្រេចបានដូចនេះ ទោះបីជារយៈពេល ៣ ខែនៃប្រតិបត្តិការអាជីវកម្មលេងល្បែងភ្នាល់ក្នុងអំឡុងពេលនេះក៏ដោយ ដោយសារតែការរីករាលដាលជំងឺកូវីដ ១៩ ដែលបណ្ដាលឱ្យមានការរំខានយ៉ាងខ្លាំងដល់សេដ្ឋកិច្ចពិភពលោក»។
លោកថា៖ «ខណៈដែលលទ្ធផលហិរញ្ញវត្ថុប្រចាំត្រីមាសទី ១ របស់យើងមានស្ថិរភាព ហើយយើងរំពឹងថានឹងទទួលបានជោគជ័យនៅត្រីមាសទី ២ ជំងឺកូវីដ ១៩ បានបណ្ដាលឱ្យពួកយើងបញ្ឈប់ប្រតិបត្តិការលេងល្បែងភ្នាល់ទាំងអស់កាលពីថ្ងៃទី ១ ខែ មេសា ឆ្នាំ ២០២០ រហូតដល់រដ្ឋាភិបាលកម្ពុជាអនុញ្ញាតឱ្យពួកយើងបើកដំណើរការប្រតិបត្តិការលេងល្បែងភ្នាល់ឡើងវិញកាលពីថ្ងៃទី ៨ ខែ កក្កដា ឆ្នាំ ២០២០»។
របាយការណ៍នេះបានឱ្យដឹងថា ក្នុងអំឡុងឆមាសទី ១ ឆ្នាំ ២០២០ ទំហំអាជីវកម្មទីផ្សារទូទៅ និង GGR បានធ្លាក់ចុះភាគច្រើនដោយសារតែការបិទប្រតិបត្តិការកាស៊ីណូបណ្ដោះអាសន្នកាលពីត្រីមាសទី ២ ដោយសារតែការរីករាលដាលជំងឺកូវីដ១៩លើពិភពលោក។
លោកបានថ្លែងថា៖ «ការធ្លាក់ចុះនេះមួយផ្នែកត្រូវបានកាត់បន្ថយតាមរយៈទីតាំងផ្ដាច់មុខរបស់យើង នៅទីក្រុងភ្នំពេញជាកន្លែងដែលមានការកើនឡើងខាងទ្រព្យសម្បត្តិ និងសហគមន៍ជនបរទេសចំនួនច្រើនភាគច្រើនជនជាតិចិន។ ទោះបីជាការធ្លាក់ចុះការមកដល់ភ្ញៀវទេសចរក្នុងអំឡុងឆមាសទី ២ ឆ្នាំ ២០២០ ដោយសារតែការរីករាលដាលជំងឺកូវីដ១៩ក៏ដោយ ក៏ដំណើរកម្សាន្តមកកាន់កាស៊ីណូ NagaWorld នៅតែមានដំណើរការល្អប្រសើរមុនពេលការបិទជាបណ្ដោះអាសន្ននៃប្រតិបត្តិការកាស៊ីណូនេះ»។
កាលពីខែមីនា លោកនាយករដ្ឋមន្ដ្រី ហ៊ុន សែន បានចេញបញ្ជាឱ្យបិទប្រតិបត្តិការកាស៊ីណូទាំងអស់បណ្ដោះអាសន្ននៅក្នុងប្រទេសកម្ពុជា ដើម្បីចៀសផុតពីការរីករាលដាលជំងឺកូវីដ ១៩។ ទោះយ៉ាងណាលោកបានលុបចោលការហាមឃាត់នេះកាលពីថ្ងៃទី ៣ ខែកក្កដា ប៉ុន្តែតុលេងល្បែងត្រូវតែស្ថិតចម្ងាយយ៉ាងហោចណាស់ ១ ម៉ែត្រពីគ្នា។ ការលេងល្បែងជាក្រុមត្រូវបានហាមឃាត់។
យោងតាមរបាយការណ៍របស់ក្រុមហ៊ុន Naga ក្នុងអំឡុងឆមាសទី ១ ឆ្នាំ ២០២០ ប្រាក់ចំណូលមិនមែនល្បែងបានធ្លាក់ចុះភាគច្រើនដោយសារតែការបិទប្រតិបត្តិការកាស៊ីណូបណ្ដោះអាសន្នកាលពីត្រីមាសទី២ និងការរឹតបន្តឹងគោលនយោបាយធ្វើដំណើរនៅក្នុងប្រទេសកម្ពុជា និងបណ្ដាប្រទេសក្នុងតំបន់ផ្សេងទៀត។
របាយការណ៍នេះឱ្យដឹងថា ក្រុមហ៊ុននេះត្រូវបានរំពឹងថា Naga 3 នឹងបំពេញបន្ថែមអគារកាស៊ីណូដែលមានស្រាប់របស់ Naga 1 និង Naga 2។ ក្រុមហ៊ុនបានរំពឹងថា នឹងបញ្ចប់ការសាងសង់អគារ Naga 3 ត្រឹមឆ្នាំ ២០២៥។ ដូច្នេះអគារ NagaWorld រួមបញ្ចូលគ្នាជាមួយនឹង Naga 1, Naga 2 និង Naga 3 នឹងមានប្រហែល ៥ ០០០ បន្ទប់សណ្ឋាគារតុលេងល្បែង ១ ៣០០ និងម៉ាស៊ីនហ្គេមអេឡិចត្រូនិក (EG-M) ចំនួន ៤ ៥០០ គ្រឿង និងការទាក់ទាញមិនមែនការលេងល្បែងជាច្រើនផ្សេងទៀត ហើយត្រូវបានរំពឹងថា នឹងក្លាយជាទីកន្លែងកម្សាន្តមួយនៅក្នុងចំណោមទីកន្លែងកម្សាន្តរួមបញ្ចូលគ្នាឈានមុខគេជាច្រើនលើពិភពលោក។
ក្នុងការបើកដំណើរការសម័យប្រជុំពេញអង្គលើកទី៥ នីតិកាលទី៦ កាលពីថ្ងៃចន្ទ រដ្ឋសភាជាតិ (NA) បានអនុម័តសេចក្ដីព្រាងច្បាប់ជាប់ទាក់ទងនឹងការគ្រប់គ្រងអាជីវកម្មការលេងល្បែងភ្នាល់។ ច្បាប់នេះស្ដីពីការលេងល្បែង ភ្នាល់ពាណិជ្ជកម្មនឹងជួយរក្សាស្ថិរភាពនយោបាយ លើកកម្ពស់សន្ដិសុខ និងកសាងហេដ្ឋារចនាសម្ព័ន្ធសេដ្ឋកិច្ចជាតិ និងការជួយសម្រួលដល់ការកើនឡើងជាប្រចាំនៃការវិនិយោគនៅក្នុងវិស័យកាស៊ីណូ៕ LA
វីដេអូ៖