ភ្នំពេញៈ ប្រទេសកម្ពុជា និងចិន បានបញ្ចប់កិច្ចព្រមព្រៀងពាណិជ្ជកម្មសេរីទ្វេភាគីក្នុងជុំទី ២ ដើម្បីឈានទៅសម្រេចបានកិច្ចព្រមព្រៀងពាណិជ្ជកម្មសេរីក្នុងឆ្នាំ ២០២០ នេះ។ នេះបើតាមសេចក្តីប្រកាសព័ត៌មានរបស់ក្រសួងពាណិជ្ជកម្ម។
សេចក្តីប្រកាសព័ត៌មានបានឲ្យដឹងថា ការចរចាកិច្ចព្រមព្រៀងសេរីកម្ពុជា និងចិនបានបញ្ចប់ការចរចាក្នុងជុំទី ២ កាលពីថ្ងៃទី ៩ ខែមេសា ដែលការចរចានេះបានធ្វើឡើងតាមរយៈវីដេអូអនឡាញដោយភាគីកម្ពុជាមានលោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មកម្ពុជា និងភាគីចិនតំណាងដោយលោក Yang Zhengwei អគ្គនាយករងក្រសួងពាណិជ្ជកម្មរបស់ប្រទេសចិន។
ការចរចាជុំទី ២ នេះគឺជាការចរចាបន្តពីជុំទី ១ ដែលបានធ្វើឡើងកាលពីថ្ងៃទី ២០ ដល់ ២១ ខែមករា កន្លងមកនៅក្នុងទីក្រុងប៉េកាំង ប្រទេសចិន ដើម្បីពិនិត្យមើលពីវឌ្ឍនភាពការងារតាមក្រុមតូចៗរបស់ភាគីទាំង ២ និងដោះស្រាយបញ្ហាសេសសល់មួយចំនួន។
សេចក្តីប្រកាសព័ត៌មានបានបញ្ជាក់ថា កិច្ចព្រមព្រៀងសេរីបានធ្វើឡើងក្នុងគោលបំណងពង្រីកការធ្វើពាណិជ្ជកម្ម វិនិយោគ សេវាកម្ម និងកិច្ចសហប្រតិបត្តិការកាន់ស៊ីជម្រៅសម្រាប់ជាឧត្តមប្រយោជន៍នៃប្រជាជនទាំង ២។
សេចក្តីប្រកាសព័ត៌មានបានបន្តថា ក្នុងការចរចាជុំទី ២ នេះភាគីទាំង ២ បានវាយតម្លៃខ្ពស់ចំពោះលទ្ធផលសម្រេចបានដោយក្រុមការងារចរចាទាំង ១០ ក្រុមនាពេលកន្លងមក។ ការចរចានេះក៏បានផ្លាស់ប្តូរយោបល់ និងចរចាយ៉ាងសកម្មតាមមធ្យោបាយអនឡាញ បើទោះបីប្រទេសទាំង ២ កំពុងប្រយុទ្ធប្រឆាំងនឹងការរាតត្បាតជំងឺកូវីដ១៩ ក៏ដោយ។
សេចក្តីប្រកាសព័ត៌មានបន្តថា៖ «ក្រុមការងារចរចានៃប្រទេសទាំង ២ បានឯកភាពគ្នាលើជំពូកមួយចំនួននៅក្នុងការចរចាជុំទី ២ នេះរួមមានជំពូកទាក់ទងនឹងកិច្ចសហប្រតិបត្តិការវិនិយោគ កិច្ចសហប្រតិបត្តិការសេដ្ឋកិច្ច និងបច្ចេកទេស ព្រមទាំងកិច្ចសហប្រតិបត្តិការគំនិតផ្តួចផ្តើមខ្សែក្រវាត់ និងផ្លូវ និងពាណិជ្ជកម្មតាមប្រព័ន្ធអេឡិចត្រូនិក»។
សេចក្តីប្រកាសព័ត៌មានសរសេរថា៖ «ក្រុមចរចាទាំង ១០ ក្រុមតូចរវាងកម្ពុជានិងចិននឹងបន្តពិភាក្សាលើបញ្ហាមិនទាន់ដោះស្រាយមួយចំនួន ហើយរាយការណ៍ទៅប្រធានក្រុមចរចាមិនឲ្យលើសពីពាក់កណ្តាលខែឧសភា ឆ្នាំ ២០២០ ដើម្បីឲ្យប្រធានក្រុមចរចាភាគីទាំង ២ យកទៅពិភាក្សាផ្ទៃក្នុងរៀងៗខ្លួន សំដៅឈានដល់ការឯកភាពគ្នាទាំងស្រុង និងបញ្ចប់ការចរចាកិច្ចព្រមព្រៀងនេះនៅខែមិថុនាតាមការគ្រោងទុក»។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា (CRF) បានប្រាប់ភ្នំពេញប៉ុស្តិ៍ថា កិច្ចព្រមព្រៀងនេះនឹងជួយសម្រួលដល់ការពង្រីកការនាំចេញអង្ករទៅកាន់ទីផ្សារចិន។
លោកថ្លែងថា៖ «ប្រសិនបើយើងមានកិច្ចព្រមព្រៀងពាណិជ្ជកម្មសេរីជាមួយចិនវានឹងជួយសម្រួលការនាំចេញអង្កររបស់កម្ពុជាបន្ថែមទៀត ខណៈការនាំចេញអង្ករកម្ពុជាទៅកាន់ទីផ្សារចិនប្រមាណ ៨០ ភាគរយ តាមរយៈកូតានាំចេញរបស់ចិន»។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍កាលពីថ្ងៃសុក្រថា ក្រៅពីប្រទេស ចិន រដ្ឋាភិបាលកំពុងធ្វើការចរចាពាណិជ្ជកម្មសេរីជាមួយកូរ៉េខាងត្បូង និងរុស្ស៊ី ខណៈកម្ពុជាក៏កំពុងសិក្សាពីកិច្ចព្រមព្រៀងជាមួយឥណ្ឌា អង់គ្លេស និងជប៉ុន ។
របាយការណ៍វឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ ២០១៩ និងទស្សនវិស័យឆ្នាំ ២០២០ របស់ធនាគារជាតិនៃកម្ពុជាបង្ហាញថា លំហូរវិនិយោគផ្ទាល់ពីបរទេសមកកម្ពុជាមានតម្លៃ ៣ ៥៨៨ ពាន់ដុល្លារ កើនឡើងជិត ១២ ភាគរយ បើធៀបនឹងឆ្នាំ ២០១៨៕