.jpg)
ទូកុងតឺន័រផ្ទុកទំនិញជាច្រើនត្រៀមលើកដាក់លើកប៉ាល់សម្រាប់នាំចេញ។ ហេង ជីវ័ន
ភ្នំពេញៈ កម្ពុជា និងម៉ាឡេស៊ីស ម្រេចបានកិច្ចព្រមព្រៀងស្តីពីការចៀសវាងការយកពន្ធត្រួតគ្នាដែលជាការការពារវិនិយោគិនរបស់ប្រទេសនីមួយៗពីការដកពន្ធត្រួតគ្នា ហើយត្រូវបានចាប់អនុវត្តចាប់ពីថ្ងៃទី ១ ខែ មករា ឆ្នាំ ២០២១ តទៅ។
អ្នកក្នុងវិស័យឯកជនសង្ឃឹមថា កិច្ចព្រមព្រៀងនេះនឹងជំរុញការវិនិយោគទ្វេភាគីបន្ថែមទៀត។
សេចក្តីប្រកាសព័ត៌មានរបស់អគ្គនាយកដ្ឋានពន្ធដារចេញផ្សាយកាលពីថ្ងៃទី ៦ ខែមករា ឱ្យដឹងថា ច្បាប់ស្តីពីការអនុម័តយល់ព្រមលើកិច្ចព្រមព្រៀងរវាងរដ្ឋាភិបាលកម្ពុជា និងរដ្ឋាភិបាលម៉ាឡេស៊ីស្តីពីការលុបបំបាត់ការយកពន្ធត្រួតគ្នាពាក់ព័ន្ធនឹងពន្ធលើប្រាក់ចំណូល និងការបង្ការការគេចវេះពន្ធ និងការចៀសវាងពន្ធត្រូវបានប្រកាសឱ្យប្រើប្រាស់ដោយព្រះរាជក្រមលេខ នស/រកម/១១២០/០២៣ ចុះថ្ងៃទី ១៤ ខែ វិច្ឆិកា ឆ្នាំ ២០២០។
សេចក្តីប្រកាសព័ត៌មានបានបន្តថា ដោយអនុលោមតាមមាត្រា ២៩ ស្តីពីការចូលជាធរមាននៃកិច្ចព្រមព្រៀងនេះ និងបន្ទាប់ពីភាគីទាំង ២ បានជូនដំណឹងជាផ្លូវការទៅវិញទៅមកដោយការផ្លាស់ប្តូរកំណត់ទូតអំពីការបំពេញចប់សព្វគ្រប់នីតិវិធីដែលតម្រូវដោយច្បាប់ក្នុងស្រុកដែលនាំឱ្យកិច្ចព្រមព្រៀងនេះចូលជាធរមាន និងមានប្រសិទ្ធភាពអនុវត្តចាប់ពីថ្ងៃទី ១ ខែ មករា ឆ្នាំ ២០២១ តទៅ។
កាលពីខែកញ្ញា ឆ្នាំ ២០១៩ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច ជាមួយនឹងលោក Saifuddin Abdullah រដ្ឋមន្ត្រីក្រសួងការបរទេសម៉ាឡេស៊ីបានចុះកិច្ចព្រមព្រៀងការចៀសវាងយកពន្ធត្រួតគ្នា និងការទប់ស្កាត់ការគេចវេះពន្ធលើប្រាក់ចំណូលរវាងប្រទេសទាំង ២ ផងដែរ។
អគ្គនាយកសភាពាណិជ្ជកម្មកម្ពុជាលោក ងួន ម៉េងតិច បានប្រាប់ ភ្នំពេញ ប៉ុស្តិ៍ កាលពីថ្ងៃព្រហស្បតិ៍ថា កិច្ចព្រមព្រៀងនេះធ្វើឡើងដើម្បីចៀសវាងការយកពន្ធត្រួតគ្នាពីក្រុមវិនិយោគិននៃភាគីទាំង ២ ហើយកិច្ចព្រមព្រៀងនេះនឹងអនុញ្ញាតឱ្យមានការបង់ពន្ធលើប្រាក់ចំណូលនៅទីកន្លែងណាដែលភាគីទាំង ២ បង្កើតប្រាក់ចំណេញ។
លោកនិយាយថា៖ «បើភាគីម៉ាឡេស៊ីគេយកពន្ធរួចហើយខាងយើងមិនត្រូវយកពន្ធទៀតទេដែលវានឹងសម្រាលបន្ទុកដល់អ្នករកស៊ីទាំងសងខាង»។
លោក ម៉េងតិច ជឿថា កិច្ចព្រមព្រៀងនេះនឹងជួយជំរុញការធ្វើពាណិជ្ជកម្មរវាងប្រទេសទាំង ២ ឱ្យកាន់តែមានភាពល្អប្រសើរឡើងថែមទៀត។
លោកនិយាយថា៖ «កិច្ចព្រមព្រៀងនេះល្អសម្រាប់ភាគីទាំង ២ ធ្វើអាជីវកម្ម ហើយភាគីទាំង ២ នឹងធ្វើការផ្សព្វផ្សាយពីកិច្ចព្រមព្រៀងនេះដើម្បីទាក់ទាញវិនិយោគិនមកវិនិយោគក្នុងប្រទេសនីមួយៗផងដែរ»។
បើយោងតាមក្រុមប្រឹក្សាអភិវឌ្ឍន៍កម្ពុជា (CDC) ប្រទេសម៉ាឡេស៊ីបានឈរនៅលំដាប់ទី ៥ នៃអ្នកវិនិយោគិនបរទេសនៅកម្ពុជាក្នុងរយៈពេល ៥ ឆ្នាំចុងក្រោយ។ កម្ពុជាបានទាក់ទាញការវិនិយោគសរុប ៤៨១ លានដុល្លារពីប្រទេសម៉ាឡេស៊ីចាប់ពីឆ្នាំ ២០១៤ ដល់ឆ្នាំ ២០១៨។
ទំនិញដែលកម្ពុជានាំទៅប្រទេសម៉ាឡេស៊ី ភាគច្រើនជាផលិតផលកសិកម្ម ខណៈការនាំពីប្រទេសម៉ាឡេស៊ីមកវិញ រួមមានគ្រឿងអេឡិចត្រូនិក និងផលិតផលម្ហូបអាហារ ជាដើម។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជានិយាយថា ការចូលជាធរមាននៃកិច្ចព្រមព្រៀងនេះនឹងជួយកាត់បន្ថយបន្ទុកអ្នកប្រើប្រាស់ និងអ្នកផ្គត់ផ្គង់រវាងប្រទេសទាំង ២ បានមួយកម្រិតទៀត។ លោកបន្ថែមថា នេះជាសញ្ញាវិជ្ជមានមួយទៀតដែលប្រទេសទាំង ២ សម្រេចបាន ហើយយន្តការនេះក៏នឹងធ្វើឱ្យទំហំពាណិជ្ជកម្មទ្វេភាគីកើនឡើងផងដែរ។
លោកថ្លែងថា៖ «នេះជាការលើកទឹកចិត្តដល់អ្នកវិនិយោគក៏ដូចជាអ្នកផ្គត់ផ្គង់ ដើម្បីបង្ការកុំឱ្យបន្ទុកពន្ធនេះធ្លាក់ទៅលើអ្នកប្រើប្រាស់។ ការចូលជាធរមាននេះនឹងជួយធ្វើឱ្យតម្លៃលក់ចេញនៃមុខទំនិញប្រទេសទាំង ២ មានភាពធូរស្រាលជាងមុន ហើយវាក៏នឹងបង្កើនភាពប្រកួតប្រជែងសម្រាប់តម្លៃផលិតផលប្រទេសទាំង ២ ផងដែរ»៕LA
