ក្រុងហុងកុងៈ ក្រុមវិនិយោគិនអាស៊ីកាលពីថ្ងៃចន្ទបានអបអរសាទរកិច្ចព្រមព្រៀងពាណិជ្ជកម្មដោយផ្នែកដែលសម្រេចបានរវាងប្រទេស ចិន និងសហរដ្ឋអាមេរិក ដែលបានជំរុញផ្សារហ៊ុននានាក្នុងតំបន់ឲ្យឡើងថ្លៃ បើទោះជាក្រុមអ្នកសង្កេតទីផ្សារនៅមានមន្ទិលសង្ស័យអំពីសារៈសំខាន់រួមនៃកិច្ចព្រមព្រៀងនេះក៏ដោយ។
ក្រុមហ៊ុនឈ្មួញជើងសារមូលបត្រនានាទទួលបានលទ្ធផលល្អនៅតំបន់ហិរញ្ញវត្ថុ Wall Street បន្ទាប់ពីក្រុមអ្នកចរចាជាន់ខ្ពស់មកពីប្រទេសមហាអំណាចទាំង ២ បានបញ្ចប់កិច្ចពិភាក្សាពាណិជ្ជកម្មរយៈពេល ២ ថ្ងៃ ដោយពួកគេនិយាយថា ពន្ធគយអាមេរិកដែលគ្រោងនឹងចូលជាធរមាននៅសប្តាហ៍នេះនឹងត្រូវពន្យារពេល ហើយចិននឹងបង្កើនការទិញផលិតផលកសិកម្មរបស់អាមេរិក។
ក្រុមអ្នកចរចាទាំងនេះក៏បានព្រមព្រៀងផងដែរលើបញ្ហាផ្សេងទៀតរួមទាំងបញ្ហាកម្មសិទ្ធិបញ្ញា សេវាហិរញ្ញវត្ថុ និងរូបិយប័ណ្ណ។
ដំណឹងនេះបានផ្តល់ការគាំទ្រដែលត្រូវការយ៉ាងខ្លាំងមួយចំនួនដល់ទីផ្សារភាគហ៊ុននៅទ្វីបអាស៊ី ដោយផ្សារហ៊ុនក្រុងស៊ាងហៃ និងទីផ្សារភាគហ៊ុនក្រុងហុងកុងបានឡើងថ្លៃទាំងពីរគឺជាង ១ ភាគរយ។
ផ្សារហ៊ុនក្រុងស៊ីដនីបានឡើងថ្លៃជាង ០,៧ ភាគរយ ហើយផ្សារភាគហ៊ុនក្រុងសិង្ហបុរីឡើងថ្លៃ ០,៤ ភាគរយ ខណៈផ្សារក្រុងវែលីងតោន ផ្សារហ៊ុនក្រុងតៃប៉ិ និងផ្សារហ៊ុនក្រុងសេអ៊ូលក៏បានឡើងថ្លៃជាង ១ ភាគរយផងដែរ។
ផ្សារហ៊ុនក្រុងម៉ានីល និងក្រុងហ្សាការតាបានមើលឃើញកំណើនដ៏ល្អ។
ទោះយ៉ាងណា ខណៈកិច្ចព្រមព្រៀងនេះត្រូវបានស្វាគមន៍ដោយលោក ត្រាំ ថាជា «កិច្ចព្រមព្រៀងដ៏អស្ចារ្យបំផុត និងធំបំផុតមិនធ្លាប់មានសម្រាប់កសិករអាមេរិកដ៏អស្ចារ្យនៅក្នុងប្រវត្តិសាស្ត្រប្រទេសរបស់យើង» នោះក្រុមអ្នកវិភាគមានសុទិដ្ឋិនិយមតិចតួចថែមទៀតប៉ុណ្ណោះ៕ KC