.jpg)
លោកនាយករដ្ឋមន្រ្តី ហ៊ុន សែន ចូលរួមកិច្ចប្រជុំកំពូល RCEP លើកទី២ កាលពីឆ្នាំមុន នៅក្នុងប្រទេស សិង្ហបុរី។ AFP
ភ្នំពេញៈ កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដែលមាន ១៦ ប្រទេសចូលរួម និងមានទំហំពាណិជ្ជកម្ម ១ ភាគ ៣ នៃពាណិជ្ជកម្មពិភពលោក ត្រូវបានរំពឹងថានឹងសម្រេចកិច្ចព្រមព្រៀងនាចុងឆ្នាំនេះ។ នេះបើតាមសេចក្តីថ្លែងការណ៍រួមនៃអន្តរកិច្ចប្រជុំរដ្ឋមន្ត្រីលើកទី៧ ដែលធ្វើឡើងនៅខេត្តសៀមរាបកាលពីថ្ងៃសៅរ៍។
កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) គឺជាកិច្ចព្រមព្រៀងពាណិជ្ជកម្មសេរីដ៏ធំមួយដែលត្រូវបានចូលរួមដោយប្រទេស ១៦ រួមមានប្រទេសជាសមាជិកអាស៊ានទាំង ១០ និងប្រទេសដែលមានសេដ្ឋកិច្ចលូតលាស់នៅអាស៊ី រួមមាន ចិន ឥណ្ឌា ជប៉ុន កូរ៉េ អូស្ត្រាលី និងនូវែលសេឡង់។
តាមសេចក្តីថ្លែងការណ៍រួមបន្ទាប់ពីកិច្ចប្រជុំរដ្ឋមន្ត្រីទាំងអស់បានទទួលស្គាល់ថា នៅមានការងារជាច្រើនដែលត្រូវតែសម្រេចឲ្យបាន ដើម្បីជំរុញឲ្យមានភាពជឿនលឿន នូវរាល់ទិដ្ឋភាពទាំងអស់នៃការចរចា។ រដ្ឋមន្ត្រីទាំងអស់បានជំរុញឲ្យប្រទេសជាសមាជិកទាំង ១៦ ធ្វើការដោះស្រាយនូវរាល់បញ្ហារសើបនានា ហើយបន្តធ្វើការដើម្បីសម្រេចឲ្យនូវលទ្ធផលពាណិជ្ជកម្មប្រកបដោយខ្លឹមសារ និងមានតុល្យភាព។
សេចក្តីថ្លែងការណ៍រួមបញ្ជាក់ថា៖ «រដ្ឋមន្ត្រីទាំងអស់ បានធ្វើការរំឭកឡើងវិញ ទៅដល់ការប្តេជ្ញាចិត្តរបស់ថ្នាក់ដឹកនាំដើម្បីបញ្ចប់កិច្ចព្រមព្រៀង RCEP ដែលជាកិច្ចព្រមព្រៀងទំនើបគ្រប់ជ្រុងជ្រោយដែលមានគុណភាពខ្ពស់ និងមានផលប្រយោជន៍ទៅវិញទៅមក និងប្រឹងប្រែងឲ្យអស់ពីលទ្ធភាពដើម្បីសម្រេចឲ្យបានកិច្ចព្រមព្រៀងនេះនៅក្នុងឆ្នាំ ២០១៩»។
ដើម្បីធានាឲ្យសម្រេចបានវឌ្ឍនភាពក្នុងការបំពេញតាមអាណត្តិការងាររបស់ថ្នាក់ដឹកនាំ ក្នុងការបញ្ចប់កិច្ចព្រមព្រៀងនាឆ្នាំ ២០១៩ នេះ រដ្ឋមន្ត្រីបានព្រមព្រៀងជំរុញឲ្យមានការចូលរួម កាន់តែខ្លាំងក្លាថែមទៀត នៅក្នុងរយៈពេលដែលនៅសេសសល់ក្នុងឆ្នាំនេះដោយរៀបចំឲ្យមានអន្តរកិច្ចប្រជុំឲ្យបានកាន់តែច្រើនថែមទៀត។ រដ្ឋមន្ត្រីបានព្រមព្រៀងនឹងជួបប្រជុំលើកក្រោយទៀតនៅអន្តរកិច្ចប្រជុំរដ្ឋមន្ត្រី RCEP ដែលនឹងប្រព្រឹត្តទៅនៅខែសីហា ឆ្នាំ ២០១៩ បន្ទាប់ពីកិច្ចប្រជុំគណៈកម្មាធិការចរចាពាណិជ្ជកម្មរបស់ RCEP លើកទី២៧ និងកិច្ចប្រជុំពាក់ព័ន្ធ។
កិច្ចប្រជុំកាលពីថ្ងៃសៅរ៍នេះត្រូវបានចូលរួមបើកដោយលោកនាយករដ្ឋមន្ដ្រី ហ៊ុន សែន និងត្រូវបានដឹកនាំដោយលោកស្រី ជុតិមា ប៊ុនយាប្រាថាសារ៉ា អនុរដ្ឋមន្ដ្រី និងជារដ្ឋមន្ដ្រីស្ដីទីក្រសួងពាណិជ្ជកម្មថៃ ដោយបានត្រួតពិនិត្យ ការអភិវឌ្ឍចាប់តាំងពីកិច្ចប្រជុំកំពូល RCEP លើកទី២ កាលពីថ្ងៃទី ១៤ ខែវិច្ឆិកា ឆ្នាំ ២០១៨ នៅក្នុងប្រទេស សិង្ហបុរី។
ការចរចាស្ដីពី RCEP បានចាប់ផ្ដើមកាលពីឆ្នាំ ២០១៣។
ប្រសិនបើកិច្ចព្រមព្រៀងនេះសម្រេចបាន វាគ្របដណ្ដប់ប្រហែលពាក់កណ្ដាលនៃប្រជាជនពិភពលោក និងប្រហែល ១ ភាគ ៣ នៃពាណិជ្ជកម្មពិភពលោក។
លោក ប៉ាន សូរស័កិ្ត រដ្ឋមន្ដ្រីក្រសួងពាណិជ្ជកម្ម និងអ្នកនាំពាក្យរបស់ក្រសួងនេះ មិនអាចទាក់ទងសុំការពន្យល់បន្ថែមបានទេ អំពីការរីកចម្រើននៃការចរចានេះកាលពីម្សិលមិញ៕ LA
