ភ្នំពេញៈ កម្ពុជា និងហ្វីលីពីននៅតែមិនទាន់ពិភាក្សាគ្នាលម្អិត ពីបរិមាណជាក់ស្តែង និងពេលវេលាជាក់លាក់ណាមួយក្នុងការនាំចេញនៅឡើយទេបន្ទាប់ ពីមានកិច្ចព្រមព្រៀងមក។
កិច្ចព្រមព្រៀងបឋមបានធ្វើឡើងកាលពីដើមខែមេសា តាមរយៈការចុះហត្ថលេខាលើអនុសារណៈយោគយល់គ្នា។
លោក ធន វីរៈ អគ្គនាយកក្រុមហ៊ុននាំចេញអង្ករ Green Trade ប្រាប់ភ្នំពេញ ប៉ុស្តិ៍ កាលពីម្សិលមិញថា រហូតមកទល់ពេលនេះក្រុមហ៊ុននៅកំពុងរង់ចាំការជួបប្រជុំជាមួយតំណាងខាងហ្វីលីពីនលោកបន្តថា៖ «យើងនៅចាំគណៈប្រតិភូខាងហ្វីលីពីនមកកម្ពុជាដើម្បីពិ ភាក្សាលម្អិតពីកិច្ចព្រមព្រៀងនេះ។ យើងគ្រោងនឹងផ្ញើលិខិតអញ្ជើញទៅពួកគេ តែប្រហែលជាត្រូវចាំបន្តិចទៀតរហូតរដ្ឋាភិបាលថ្មីត្រូវបានបង្កើតបន្ទាប់ពីបោះឆ្នោតហើយ»។
កាល ពីពាក់កណ្តាលឆ្នាំមុន គម្រោងស្រដៀងគ្នាទាក់ទងនឹងកិច្ចព្រមព្រៀងពាណិជ្ជកម្មអង្ករ នេះ ក៏បានគ្រោងនឹងធ្វើឡើងផងដែររវាងកម្ពុជា និង ហ្វីលីពីន តែត្រូវផ្អាកទៅវិញរហូតមកទល់នឹងខែមេសាឆ្នាំនេះដោយសារតម្លៃ មិនត្រូវគ្នា។
ឆមាសទីមួយឆ្នាំនេះ កម្ពុជានាំចេញអង្ករ ១៧៥ ៩៥៩ តោន កើនប្រមាណ ១២៥ ភាគរយធៀបឆមាសទីមួយឆ្នាំមុន៕
