.jpg)
កុងតឺន័រឆ្លងកាត់កំពង់ផែភ្នំពេញ មានកំណើនឡើងជាង ១៣% ទោះបីជំងឺកូវីដ ១៩ បានធ្វើឲ្យប៉ះពាល់យ៉ាងខ្លាំងដល់សេដ្ឋកិច្ចនៅក្នុងតំបន់ និងពិភពលោកក៏ដោយ។ ហេង ជីវ័ន
ភ្នំពេញៈ កំពង់ផែស្វយ័តក្រុងភ្នំពេញ (PPAP) ដែលចុះបញ្ជីនៅផ្សារមូលបត្រកម្ពុជា (CSX) បានរាយការណ៍អំពីភាពប្រសើរឡើងនៃប្រតិបត្តិការអាជីវកម្មរបស់ខ្លួនក្នុងឆមាសទី ១ ឆ្នាំនេះ ទោះបីជំងឺកូវីដ ១៩ បានធ្វើឲ្យប៉ះពាល់យ៉ាងខ្លាំងដល់សេដ្ឋកិច្ចនៅក្នុងតំបន់ និងពិភពលោកក៏ដោយ។
របាយការណ៍របស់ PPAP ដែលផ្ញើទៅ CSX កាលពីថ្ងៃចន្ទបានឲ្យដឹងថា ប្រតិបត្តិការអាជីវកម្មរបស់ PPAP នៅឆមាសទី ១ ឆ្នាំនេះមានកំណើនតិចតួច ដោយចំនួនកុងតឺន័រឆ្លងកាត់បានកើនឡើង ១៣ ភាគរយ និងនាវាដឹកទំនិញ កើន ១ ភាគរយធៀបនឹងរយៈពេលដូចគ្នាពីឆ្នាំមុន។ ចំណែកការដឹកជញ្ជូនទំនិញ និងប្រេងឥន្ធនៈបានធ្លាក់ចុះ ៤ ភាគរយ ចំនួននាវាដឹកអ្នកដំណើរធ្លាក់ចុះ ២៨ ភាគរយ និងចំនួនអ្នកដំណើរធ្លាក់ចុះ ៣៨ ភាគរយ។
លោក Jong Weon Ha អនុប្រធាន CSX បានប្រាប់ភ្នំពេញប៉ុស្ដិ៍កាលពីថ្ងៃចន្ទថា របាយការណ៍ PPAP បានបង្ហាញប្រតិបត្តិការអាជីវកម្មល្អក្នុងអំឡុងពេលវេលាដ៏ពិបាកដោយសារតែវិបត្តិសុខភាព ទោះបីជាសមាសភាគផ្សេងទៀតរបស់កំពង់ផែនេះបានថមថយល្បឿនក៏ដោយ។
លោកថ្លែងថា៖ «ផ្អែកលើប្រតិបត្តិការអាជីវកម្មឆមាសទី ១ របស់ PPAP កំពង់ផែមួយនេះកំពុងធ្វើបានល្អប្រសើរ ខណៈដែលការធ្វើចរាចរណ៍នាវាដឹកកុងតឺន័រ និងនាវាដឹកទំនិញបន្តការកើនឡើង បើធៀបនឹងរយៈពេលដូចគ្នាកាលពីឆ្នាំ ២០១៩»។
លោក ហ៊ី បាវី អគ្គនាយក PPAP បានថ្លែងកាលពីចុងខែមុននៅក្នុងកិច្ចប្រជុំប្រចាំឆ្នាំថា ទោះបីវិបត្តិសុខភាពពិភពលោកក៏ដោយ ក៏ PPAP បានបន្តលើកកម្ពស់ប្រតិបត្តិការអាជីវកម្មរបស់ខ្លួន តាមរយៈការកាត់បន្ថយការចំណាយ និងការពន្យារពេលការវិនិយោគដែលមិនបន្ទាន់។
លោកថ្លែងថា៖ «ក្នុងគ្រានៃស្ថានការបច្ចុប្បន្ន ដោយសារវិបត្តិជំងឺកូវីដ ១៩ នៅតែប៉ះពាល់ដល់កម្ពុជា និងផ្នែកជាច្រើនទៀតនៃពិភពលោក PPAP នៅតែប្រកាន់ខ្ជាប់ទិសដៅក្នុងការកាត់បន្ថយផលប៉ះពាល់ដល់អាជីវកម្ម»។ លោកបន្ថែមថា បុគ្គលិកកំពុងធ្វើការងាររួមគ្នាដើម្បីកាត់បន្ថយការចំណាយដែលមិនចាំបាច់ ដើម្បីទប់ស្កាត់ការធ្លាក់ចុះ។
លោកបន្ថែមថា៖ «បច្ចុប្បន្នយើងបានអនុវត្តវិធានការឆ្លើយតបមួយចំនួន ដែលរួមមានការកែតម្រូវផែនការអាជីវកម្មឆ្នាំ ២០២០ ការកាត់បន្ថយការចំណាយមិនចាំបាច់ ការផ្អាកការវិនិយោគដែលមិនសំខាន់ និងផ្ដោតការយកចិត្តទុកដាក់លើគម្រោងសំខាន់ៗដើម្បីបង្កើតកំណើន»។
របាយការណ៍ត្រីមាសទី ១ របស់ PPAP ឲ្យដឹងថា ប្រាក់ចំណូលសរុប និងប្រាក់ចំណូលផ្សេងទៀតមានចំនួន ៧,៦ លានដុល្លារ។ PPAP ក៏បានរាយការណ៍អំពីការធ្លាក់ចុះប្រាក់ចំណូល ៣ ភាគរយក្នុងរយៈពេល ៥ ខែដំបូងឆ្នាំនេះធៀបនឹងរយៈពេលដូចគ្នាកាលពីឆ្នាំមុន៕ LA
