.jpg)
លោក កៅ ថាច អគ្គនាយកនៃធនាគារអភិវឌ្ឍន៍ជនបទ និងកសិកម្ម (ឆ្វេង) ក្នុងជួបពិភាក្សាការងារជាមួយអ្នកវិនិយោគមកពីប្រទេសកូរ៉េ។ រូបថត ARDB
ភ្នំពេញៈ ក្រុមហ៊ុនរបស់កូរ៉េខាងត្បូង ១ បានចាប់អារម្មណ៍ចំពោះការវិនិយោគបង្កើតរោងចក្រផលិតចំណីសត្វ និងផលិតជីកសិកម្មនៅកម្ពុជា ខណៈការវិនិយោគនៅក្នុងស្រុកលើវិស័យនេះនៅមានកម្រិតតិចតួចដែលទាមទារឲ្យមានការវិនិយោគបន្ថែមទៀត។
លោក កៅ ថាច អគ្គនាយកនៃធនាគារអភិវឌ្ឍន៍ជនបទ និងកសិកម្ម (ARDB) ប្រាប់ភ្នំពេញ-ប៉ុស្តិ៍ថា ក្នុងជំនួបពិភាក្សាមួយកាលពីសប្តាហ៍មុន វិនិយោគិនមកពីប្រទេសកូរ៉េខាងត្បូងបានបង្ហាញការចាប់អារម្មណ៍យ៉ាងខ្លាំងក្នុងការវិនិយោគលើការបង្កើតរោងចក្រផលិតចំណីសត្វ ជីកសិកម្ម និងថ្នាំកសិកម្មនៅកម្ពុជា។
លោកថ្លែងថា៖ «គាត់ប្រាប់ថា គាត់មានគោលដៅចង់បង្កើតរោងចក្រនៅក្នុងប្រទេសយើង ហើយគាត់និយាយថា បើគាត់បង្កើតរោងចក្រគឺមិនត្រឹមតែផ្គត់ផ្គង់ក្នុងស្រុកប៉ុណ្ណោះទេ ប៉ុន្តែនឹងផលិតសម្រាប់នាំចេញទៅកូរ៉េ និងប្រទេសចិនផងដែរ»។
បើតាមលោក ថាច តំណាងក្រុមហ៊ុនមកជួបលោកនាពេលនោះគឺក្នុងគោលបំណងដើម្បីស្វែងយល់ពីគោលនយោបាយឥណទានរបស់ធនាគារអភិវឌ្ឍន៍ជនបទ និងកសិកម្មទាក់ទងនឹងការគាំទ្រហិរញ្ញប្បទានដល់វិស័យឯកជនដែលចង់វិនិយោគលើការបង្កើតរោងចក្រនេះ។
លោកបញ្ជាក់ថា៖ «ពួកគាត់ចង់ដឹងពីឥណទានថា តើរដ្ឋាភិបាលគាំទ្រដល់វិស័យឯកជនក្នុងការបង្កើតរោងចក្រផលិតជី និងថ្នាំកសិកម្មដែរឬទេ?។ ខ្ញុំក៏បានប្រាប់គាត់ថា រដ្ឋាភិបាលកម្ពុជាពិតជាគាំទ្រយ៉ាងខ្លាំងចំពោះគម្រោងវិនិយោគនេះ ព្រោះយើងចង់ឲ្យមានរោងចក្រផលិតនៅក្នុងស្រុក ដើម្បីឲ្យផលិតផលទាំងនោះមានតម្លៃទាបសមរម្យ និងគុណភាពល្អ។ ប្រសិនបើមានអ្នកក្នុងស្រុកចង់បង្កើតរោងចក្រ យើងនឹងគាំទ្រដល់ពួកគេលើផ្នែកហិរញ្ញវត្ថុ»។
ទិន្នន័យរបស់ក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា ប្រទេសកម្ពុជាបាននាំចូលជី និងថ្នាំកសិកម្មក្នុងបរិមាណជាង ១,២ លានតោនកាលពីឆ្នាំ ២០១៩ កើនប្រមាណជាង ៩ ភាគរយបើធៀបទៅនឹងឆ្នាំ ២០១៨ ដែលមានចំនួនជាង ១,១ លានតោន។ មានជី និងថ្នាំកសិកម្មប្រមាណ ២ ៦០០ ប្រភេទត្រូវនាំចូលមកកាន់ប្រទេសកម្ពុជា។
បច្ចុប្បន្ននៅកម្ពុជាមានរោងចក្រផលិតចំណីសត្វក្នុងស្រុកចំនួន ១៨ កំពុងប្រតិបត្តិការដែលរោងចក្រទាំងអស់នេះមានសមត្ថភាពផលិតចំណីសត្វសរុបបានជាង ១,២ លានតោន ក្នុង ១ ឆ្នាំ ស្មើនឹង ៥៦ ភាគរយ នៃការផ្គត់ផ្គង់ទូទាំងប្រទេស។ នេះបើយោងតាមលោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្ម រុក្ខាប្រមាញ់ និងនេសាទ។
លោក លឹម ហេង អនុប្រធានសភាពាណិជ្ជកម្មកម្ពុជាបានឲ្យដឹងថា សព្វថ្ងៃរដ្ឋាភិបាលកំពុងខិតខំប្រឹងប្រែងជំរុញលើកទឹកចិត្ត និងទាក់ទាញវិនិយោគិនបរទេសឲ្យចូលមកវិនិយោគនៅកម្ពុជា ដើម្បីបង្កើតរោងចក្រផលិតចំណីសត្វ ជី និងថ្នាំកសិកម្ម។ លោកកត់សម្គាល់ថា ខណៈផលិតផលទាំងអស់នេះមានតម្រូវការខ្ពស់នៅកម្ពុជា ការវិនិយោគលើការបង្កើតរោងចក្រនេះពុំទាន់មានច្រើនទេនាពេលនេះ។
លោកថ្លែងថា៖ «ប្រសិនបើរោងចក្រនេះបង្កើតនៅស្រុកយើងវានឹងចូលរួមចំណែកជួយឲ្យជី និងថ្នាំកសិកម្មមានតម្លៃទាប។ ខ្ញុំគិតថា ដើម្បីទាក់ទាញការវិនិយោគលើវិស័យនេះ យើងត្រូវពង្រឹងប្រព័ន្ធហេដ្ឋារចនាសម្ព័ន្ធ និងធ្វើយ៉ាងណាឲ្យថ្លៃដើមផលិតទាប»។
ក្រសួងកសិកម្ម រុក្ខាប្រមាញ់ និងនេសាទបានផ្តល់វិញ្ញាបនបត្របញ្ជាក់បញ្ជិកាថ្នាំ និងជីកសិកម្មចំនួន ២៣៥ ក្រុមហ៊ុននៅទូទាំងប្រទេសកាលពីឆ្នាំ ២០១៩។ មានក្រុមហ៊ុនសរុប ២២៦ ត្រូវបានក្រសួងកសិកម្ម ចេញលិខិតអនុញ្ញាតឲ្យនាំចូលជី និងថ្នាំកសិកម្មកាលពីឆ្នាំមុនក្នុងនោះក្រុមហ៊ុននាំចូលជីកសិកម្ម មាន ១០៧ និងក្រុមហ៊ុននាំចូលថ្នាំ ចំនួន ៦១ ព្រមទាំងក្រុមហ៊ុននាំចូលទាំងជី និងថ្នាំកសិកម្មចំនួន ៥៨៕ LA
